ИНЦИДЕНТОТ СО ПЦОВКИТЕ Е ГОЛЕМА КАТАСТРОФА ЗА УГЛЕДОТ НА СОБРАНИЕТО Јас во животот никогаш не сум опцул и не сакам граѓаните да ме перцепираат така
Претседателот на Собранието Африм Гаши вели дека Комисијата за деловнички и мандатно имунитетски прашања треба да констатира дека имало прекршување на Етичкиот кодекс на пратениците, а Комисијата се свикува по пријава за инцидентот од кој било пратеник. Досега нема пријава, но од разговори со пратениците Гаши очекува тоа наскоро да се случи.
Во Етичкиот кодекс на пратениците е јасно што е помало, а што потешко прекршување. Имаше псовки и навреди, целата јавност го виде тоа и според мене, имаше тешка повреда на Кодексот, рече денеска на брифинг со новинарите претседателот на Собранието Африм Гаши, во врска со инцидентот од минатата недела кога пратениците на Левица и ВМРО-ДПМНЕ разменија псовки и навреди на седницата за пратенички прашања од опозицијата, а инцидентот беше на граница на тепачка.
Гаши вели дека Комисијата за деловнички и мандатно имунитетски прашања треба да констатира дека имало прекршување на Кодексот, а Комисијата се свикува по пријава за инцидентот од кој било пратеник. Тој вели дека досега не е пуштена пријава до Комисијата, но од разговори со пратениците очекува тоа наскоро да се случи.
– И јас право да поднесам претставка, но јас како претседател на Собранието се гледам како човек кој зближува и сака да остане неутрален. Очекувам пратениците тоа да го сторат. Јас дента дадов пауза за камерите да не снимаат, лично отидов кај пратениците од Левица и од ВМРО-ДПМНЕ и за пет минути ја смиривме ситуацијата. Навистина сум им благодарен на пратениците што ме послушаа, но за угледот на Собранието тоа е голема катастрофа. Јас многу жалам што сè уште може да се слушне таков тон во Собранието, а тоа е моделот кој ние го покажуваме пред граѓаните, без разлика кој е пратеникот ли пратеничката група. Граѓаните нас не нè ни делат, туку велат „вие пратениците“… Тоа значи, ме вклучуваат и мене, а јас не сакам ниту еден граѓанин мене да ме перцепира како човек кој се однесува така. Јас никогаш во животот никого и никогаш не сум пцуел. Моите пријатели го знаат тоа. За мене е неразбирливо во Собранието, во пленарната сала да има таков однос – рече претседателот Гаши.
Тој објаснува дека нема предвидени особени санкции во Кодексот кога ќе се констатира прекршување, само јавна опомена, но според него, самата констатација дека некој пратеник го прекршил кодексот треба да му претставува најголема казна.
Гаши вели дека Етичкиот кодекс е донесен во 2018 година и дека наскоро може да биде дополнет. Рече и дека Комисијата од 2018 година до денес ниту еднаш не заседавала во врска со прекршување на Етичкиот кодекс, иако во поседниве години имаше многу инциденти во Собранието.