АРСОВСКА Е НА ПОТЕГ Приватните превозници бараат зголемување на цената на услугите преку член на Советот на Град Скопје
Арсовска е на потег, приватните превозници бараат зголемување на цена на услуги преку член во Советот на Град Скопје, стои во објавата на Трајко Славески, што ја пренесува Центарот за комуникации на ВМРО-ДПМНЕ.
Претседателот на Советот на Град Скопје, Трајко Славески, вечерва на социјалната мрежа Икс објави дека приватните превозници бараат зголемување на цена на услуги преку член во Советот и дека на потег е градоначалничката Данела Арсовска. Тој сподели документи: Барањето за мислење со предлог по иницијатива од член на Совет на Град Скопје за покачување на цената на услугата на приватните превозници, ангажирани од Јавното сообраќајно претпријатие – Скопје и Иницијативата за отпочнување постапка за покачување на цената од членот на Советот на Град Скопје, Горан Арсов.
- АРСОВСКА ВО ТАЈНОСТ ГО ПОДГОТВУВА БУЏЕТОТ Никој не знае каде ќе завршат парите на скопјани, советниците се исклучени од процесот
- „КУМАТА НА ХАОСОТ НА ЈАВНИОТ ПРЕВОЗ ГО ДОВЕДЕ СКОПЈЕ НА РАБ НА КОЛАПС“ Советниците од ВМРО-ДПМНЕ се спремни да го поддржат предлогот за нови автобуси
„Ве известувам дека членот на Совет на град Скопје, Горан Арсов, на 26.11.2024 година до Претседателот на Совет достави иницијатива бр. 27-12827/1 за отпочнување на постапка за покачување на цената на услугата по изминат километар која ја добиваат приватните превозници ангажирани од ЈСП -Скопје. Ве молам да ми доставите ваш став по Иницијативата, конкретно за следните прашања што произлегуваат од иницијативата на членот на Совет на град Скопје, г. Горан Арсов“, се наведува во Барањето за мислење со предлог по иницијатива од членот на Совет на Град Скопје, Горан Арсов.
Во Барањето се наведени неколку прашања и предлози за градоначалничката Арсовска.
1. Со оглед на тоа што вие сте потписник на договорите за вршење услуги со приватните превозници, чиј што рок на примена истекува во мај 2025 година по спроведена постапка за избор на даватели на услуги и пропишани услови за кои Совет на град Скопје воопшто не бил информиран, ниту, пак, бил субјект во постапката, дали се согласувате со промена на условите од договорите кои се однесуваат на цената пред истекот на важноста на договорите со приватните превозници?
2. Доколку вашиот став по Т.1 од овој допис е позитивен, ве молам до Совет на град Скопје да доставите конкретен предлог за зголемување на цената, со образложение врз основа на кои параметри го темелите предлогот.
3. Како вашиот евентуален предлог за зголемување на тарифата за изминат километар за услугите на приватните превозници би се одразил на финансиското работење на ЈСП-Скопје, со оглед на тоа надоместокот кон приватните превозници го врши ова ЈП од прибраните приходи?
4. Како планирате да се надомести евентуалното намалување на приходите на ЈСП-Скопје со ваш евентуален предлог за зголемување на тарифата за изминат километар за приватните превозници? Дали можеби ќе предложите зголемување на цената на услугите кои ЈСП ги наплаќа од граѓаните, или ќе предложите зголемување на износот на субвенции кои од Буџет на град Скопје во континуитет му се исплаќаат на ЈСП?
Во Иницијативата за отпочнување постапка за покачување на цената на услугата која ја добиват приватните превозници, ангажирани од ЈСП, се наведува отпочнување постапка преку која би се разгледале можностите за покачување на цената на услугата која приватните превозници, кои учествуваат во реализацијата на линискиот превоз на ЈСП, според однапред определените со договор градски и приградски линии, а ја добиваат за изминат километар.
„Арсовска е на потег, приватните превозници бараат зголемување на цена на услуги преку член во Советот на Град Скопје“, стои во објавата на Славески, што ја пренесува Центарот за комуникации на ВМРО-ДПМНЕ.
Претходно денеска приватните превозници ги исклучија автобусите од сообраќај во знак на револт откако и на денешната седница на Град Скопје не беше разгледно нивното барање за зголемување на таксата по километар.
Според информациите, иницијативата на приватните превозници била доставена вчера околу 15:30 часот до претседателот на Советот на Град Скопје, Трајко Славески. Тој на денешната седница информираше дека иницијативата била доставена доцна за да биде вклучена на седницата.
Од Град Скопје, пак, реагираа дека советниците на ВМРО-ДПМНЕ одбиле да ја стават на дневен ред точката по барање на приватните превозници, со која тие бараат зголемување на надоместот за јавен превоз, сѐ со цел за да се продлабочи кризата и зголеми хаосот.