ДУДУШ Ѝ РЕЧЕ НА ДАНЕЛА ДЕКА ДОЛГО Ѝ ГО КРИЕЛ СРАМОТ Таа бара да се утврди дали тој правел депонија на свој плац

„Само во Македонија кога функционер е фатен во криминал, организира протести за да го покрие сопствениот срам. За жал, таков е и случајот со градоначалникот на Општина Шуто Оризари, Курто Дудуш, кој е доволно храбар ем да им наплаќа на сопствените сограѓани противправно ‘услуга’ за собирање смет, истиот тој смет да го собира со општински возила и нелегално да го фрла на дива депонија формирана на приватен плац сопственост на Курто Дудуш“.

Ова се вели во реакцијата на Град Скопје на денешниот пост на градоначалникот на Шуто Оризари, Курто Дудуш, на неговиот профил на Фејсбук.

„Срамота е во 21 век, во 2024 година вакви луѓе да зборуваат и да обвинуваат други за наводен расизам. Во време кога здравата животна средина е императив, да ги труеш своите сограѓани креирајќи диви депонии не е расизам, туку екоцид врз сопствениот народ. Ги повикуваме надлежните органи, МВР и Јавното Обвинителство сериозно да ги разгледаат доказите кои се состојат од видео и фото материјали, записници, документации и изјави, а кои ќе бидат доставени од градот Скопје. Следниот пат кога Дудуш ќе ги повика жителите на својата општина на протести, нека им објасни што всушност крие и дека градот Скопје нема намера да ги чисти депониите кои тој лично ги прави“, се вели во реакцијата на Град Скопје.

Инаку, претходно, Дудуш ја обвини градоначалничката за зголемениот отпад во општината Шуто Оризари.

„Доволно долго ти го криев срамот Данела! Поради нефункционирање на Град Скопје и нередовно подигање комунален отпад од општина Шуто Оризари, граѓаните на општината се принудени својот отпад да го истураат на улица и со тоа да се ствараат диви депонии во населбата. По протестот на граѓаните, со поддршка на општината, со кој се искажа револтот на граѓаните за нефунционирањето на ЈСП, како знак на “реваншизам” сите инспектори на Градот Скопје се во општина Шуто Оризари и ги следат нашите комунални активности и работници кои ја вршат работата на Градот во ситуација кога општината е заборавена од Данела. За да излеземе во пресрет на нашите граѓани, а во насока на продолжување на нашата работа во одржување на чиста средина од денес ќе поставиме големи контејнери на сите критични точки во општината, во кои граѓаните ќе може да го одлагаат својот отпад доколку не се опслужени од Градот, а службите на Градот Скопје како надлежни ќе мора редовно да ги одржуваат и одлагаат. Ги замолуваме сите граѓани кои се соочуваат со проблем од областа на редовен комунален сервис од Град Скопје да предложат локации за поставување на контејнерите. Контејнерите се добиени во рамки на аплициран и добиен проект на општината од Министерство за животна средина.“ објави тој на својот профил на Фејсбук.