ОНЛАЈН НАСИЛСТВОТО БЕЛЕЖИ РАСТ Општина Центар презема итни мерки за заштита на жените и на девојчињата
Градоначалникот Герасимовски ги нагласи и резултатите од истражувањата, според кои речиси 70 проценти од жените во Македонија биле изложени на онлајн вознемирување, што бара засилена институционална акција.
Општина Центар презема активности за подигнување на свеста и спречување на насилството врз жените и девојчињата, во рамките на иницијативите за обележување на Меѓународниот ден за борба против насилството врз жените. Градоначалникот Горан Герасимовски ја истакна важноста од поддршката за жртвите и превенцијата како клучни фактори за справување со овој проблем.
– Покрај психичкото и физичкото насилство кое е секојдневно, особено загрижува растечкиот тренд на онлајн насилство. Општина Центар ќе продолжи да создава поддржувачка средина, да ги поттикнува жртвите да го пријавуваат насилството, ќе ја засили соработката со институциите и стручните служби и ќе организира активности за едукација на младите за опасностите од дигиталната агресија – изјави Герасимовски.
Тој ги нагласи и резултатите од истражувањата, според кои речиси 70 проценти од жените во Македонија биле изложени на онлајн вознемирување, што бара засилена институционална акција.
„Во соработка со Националниот совет за родова рамноправност, Општина Центар обезбедува бесплатни советодавни услуги од страна на тимови составени од психолог, правник и социјален работник. Целта е да им се понуди соодветна помош и поддршка на граѓаните кои претрпеле насилство или злоупотреба. Општината ги повика сите граѓани да се приклучат во создавањето безбедна средина за жените и девојчињата, со порака дека секојдневната акција е важна за борбата против насилството“, велат од Општина Центар.