ИЗРАЕЛСКИ АВИОНИ ГО РАКЕТИРАА ЛИБАН Насилството ескалира во ек на преговорите за примирје

Израелската војска продолжи со бомбардирањето на Газа, без напредок во разговорите за примирје, а насилството избувна и на границата меѓу Израел и Либан. Регистрирани се израелски напади во различни делови на Газа, особено во центарот на енклавата, во раните утрински часови.

Во Либан, државната новинска агенција ННА во петокот објави за смртта на цивили и бројни повредени во израелски воздушен напад во близина на Тир на југот на земјата. Израелскиот напад следуваше по тешкиот ракетен напад на либанскиот Хезболах врз северен Израел во четвртокот.

One woman has died in an Israeli air strike on Thursday in Tyre, Lebanon, leaving at least seven others injured, the country’s official news agency reported. pic.twitter.com/ieHiHENqSa

— Middle East Eye (@MiddleEastEye) June 14, 2024

Францускиот претседател Емануел Макрон во четвртокот на самитот на Г7 објави дека Франција, САД и Израел ќе работат во „троен“ формат на францускиот план за намалување на тензиите на израелско-либанската граница. Планот конкретно предлага прекин на насилството од двете страни и повлекување на силите Ал Радван, елитната единица на либанското шиитско движење Хезболах и други вооружени групи на 10 километри од израелската граница, според либанските власти. Сепак, Хезболах, тврдејќи дека ги извршил бомбардирањата во изминатите два дена како одмазда за смртта на еден од неговите највисоки команданти во израелски напад, во моментов одбива да учествува во разговорите додека не се воспостави траен прекин на огнот во Газа.

Планот за примирје во Газа објавен на 31 мај од Џо Бајден, главниот сојузник на Израел, досега не се оствари, а израелската влада и палестинското исламистичко движење Хамас ги задржаа своите позиции.

– Што добивме од оваа војна освен убивање, уништување, истребување и гладување?- извика Оум Чади, 50-годишна Палестинка, повикувајќи го Хамас „веднаш да ја прекине војната“.

Додека надежите за примирје редовно се уриваат, жителите на Газа како Оум Чади го критикуваат Хамас и повикуваат на примирје во време кога опустошената палестинска територија се соочува со голема хуманитарна криза и закана од глад.

Во исто време во Ерусалим, студентите протестираа пред израелскиот парламент мавтајќи со фотографии од Израелците киднапирани за време на нападот на Хамас на 7 октомври и држени во Газа. Тие исто така, ја повикаа владата на премиерот Бенјамин Нетанјаху да ја прекине војната и да ги врати заложниците дома.

Сепак, Нетанјаху во неколку наврати ја изрази својата решеност да ја продолжи војната до поразот на Хамас, кој владее со Газа од 2007 година и се смета за терористичка организација од страна на Израел, САД и Европската унија.