ПРИВЕДЕНИ ЧЕТВОРИЦА ОД ГРУПАТА ШТО ДИВЕЕШЕ ВО КОНТРОЛА НА ЛЕТАЊЕ Зградата на М-НАВ под полициско обезбедување

„МВР ја известува јавноста дека во полициска станица се четири лица инволвирани во нападот врз вработени во МНАВ, кој беше пријавен денеска (04.01.2024) околу 15.15 часот и со нив се вршат службени разговори, по што во координација со ОЈО ќе бидат поднесени соодветни поднесоци. Исто така, се преземаат мерки за пронаоѓање на уште четири лица.

Ја известуваме јавноста и дека МВР во наредниот период континуирано ќе ја обезбедува зградата на МНАВ“ – стои во соопштението од МВР.

Денеска околу 15:15 часот во ПО Петровец лице вработено во М-НАВ пријавило дека во објектот имало нарушување на јавниот ред и мир односно дека Б.Н. (лице вработено во институцијата) заедно со уште неколку непознати лица физички ги нападнале П.Б., Е.К. и Б.Р. (лица вработени во институцијата). Веднаш по добиената пријава, полициски службеници од СВР Скопје се упатиле кон местото на настанот за расчистување на инцидентот.

Според првичните сознанија објавени во медиумите, упадот во М-НАВ го предводел Беким Незири, поранешен министер за економија од ДУИ.

Претседателот на Струковиот синдикат на контролори на летање (ССКЛ), Александар Тасевски, претходно објави дека во објектот на Контрола на летање дошле неколку возила од кое излегле неколку лица кои влегле во објектот, предизвикале караница и нападнале вработени во Контролата на летање. Според него, возилата влегле без да бидат спречени од страна на обезбедувањето.

Нападот се случил по денешната прес-конференција на Тасевски во која тој информираше дека 20 до 30 контролори на летање и нивни помошници во М-НАВ се очекува од денеска да почнат да поднесуваат оставки од раководните позиции во М-НАВ, образложувајќи дека оставките се за поддршка на синдикалните активности и реакции за последниот оглас за вработувања во оваа институција.