ЗОШТО ИЗЈАВАТА НА МАКРОН ПРЕДИЗВИКА ТОЛКАВ СКАНДАЛ? Францускиот лидер замислува Европа без вазалство кон САД
Кинескиот претседател Си Џинпинг токму сака преку Макрон да ги оддалечи САД и старата дама. Макрон е привлечен човек за оваа работа со тоа што постојано се нуди да посредува, како што се среќаваше и разговараше со Владимир Путин за Украина.
Европа мора да му одолее на притисокот да остане вазал на САД, рече францускиот претседател во заедничко интервју за Политико и Лес Екос за потоа еден куп луѓе од двете страни на Атлантикот веднаш да го искараат. Идејата на Макрон дека ЕУ треба да биде трет пол, независна од Вашингтон и од Пекинг не остана мирна во воздухот. Речиси сите коментари на „соколите“ од Западот се против оваа идеја и се во стилот „ти не зборуваш во име на Европа“.
Германски пратеник од Бундестагот, Норберт Ротген, твитна дека Макрон „успеал да го претвори своето патување во Кина во ПР-државен удар за Си и во надворешнополитичка катастрофа за Европа“ и дека Макрон „сè повеќе се изолира себеси во Европа“.
Американскиот републикански сенатор Марко Рубио напиша дека ако Европа „не одбере страна меѓу САД и Кина поради Тајван, тогаш можеби и ние не треба да избираме страни (за Украина)“.
Паскал Конфавр, портпарол на француската амбасада во Соединетите држави, рече дека коментарите на Макрон биле премногу толкувани и напиша дека „САД се наш сојузник со кој ги споделуваме нашите вредности“.
Елисејската палата одби да коментира.
Во меѓувреме, во нова статија на Стјуарт Алу за Политико анализира дека кинескиот претседател Си Џинпинг токму сака преку Макрон да ги оддалечи САД и старата дама. Макрон е привлечен човек за оваа работа со тоа што постојано се нуди да посредува, како што се среќаваше и разговараше со Владимир Путин за Украина.
Се потсетува и дека Си го прими Макрон во Големата сала на народот во Пекинг и дека меѓу другото 36 кинески и француски бизниси потпишаа договори. Макрон му рекол на Си дека Франција не избира страни ниту пак блоковска конфронтација.
А, како гласеше оригиналната реченица на Макрон во интервјуто? Па, дека „најлошото нешто би било да мислиме дека ние Европејците мора да станеме следбеници на оваа тема(за Тајван) и да се прилагодиме на американскиот ритам или на кинеската претерана реакција“.
– Прашањето што Европејците треба да го одговорат е … дали е во наш интерес да ја забрзаме кризата во Тајван? Не – додаде Макрон во интервјуто.
Вкрстувањето или невкрстувањето на американските и европските интереси се гледа во економијата. Американскиот притисок издејствува Холанѓаните да стават нова контрола на извозот на продажбата на напредна полупроводничка опрема во Кина, пишува Политико.
Исто така ЕУ го забрани ТикТок во јавната администрација. Тоа не го спречи американскиот претседател Џо Бајден да најави дека за претседателските избори идната година ќе ангажира тим од инфлуенсери на ТикТок за да му помогнат во кампањата против ривалите Трамп и Де Сантис.
Реакциите кон идејата на Макрон уште се во етерот.
Полскиот премиер Матеуш Моравјецки денеска се изјасни против идејата Европската унија да развива стратешка автономија од САД, и наместо тоа се залагаше за градење уште посилно стратешко партнерство и предупреди дека некои западни лидери сè уште сонуваат за ризична соработка со сите, вклучувајќи ја и Русија и некои сили на Далечниот Исток.
Третманот кој Макрон го доби на својот чај со Џинпинг не е ни приближно ист со тој што го доби Урсула Фон Дер Лајен која го придружуваше на патувањето.