ДАЛИ ТОПЛАНИТЕ НАВРЕМЕ ЌЕ ДОБИЈАТ ГАС? ЕСМ Продажба објави нов повик за снабдување и тоа отворен

ЕСМ Продажба објави повик за прибирање понуди од домашни и странски компании кои имаат можност да обезбедат и да испорачаат потребна количина на природен гас за производство на топлинска енергија за топланите Исток, Запад, Енергетика и Скопје Север, како и за останатите потрошувачи на природен гас во Р. С. Македонија, пред сè поголемите производствени и услужни капацитети.

„Со оглед на тоа што на претходно распишаниот повик од АД ЕСМ имаше понуди кои не беа верификувани, а досегашниот испорачател Промгас – Макпетрол со кој досега имавме договор не достави понуда, нов повик е распишан од страна на ЕСМ Продажба.

Повикот ќе биде од отворен карактер, и во однос на количините и во однос на времетраењето на испораката од страна на снабдувачите, за периодот 1. јануари – 30. април 2023 година“ – се вели во соопштението на ЕСМ Продажба.

Макпетрол вчера објави дека го прекинува увозот на пророден гас, незадоволен од условите на кои се согласила државата во  Договорот за интерконективно поврзување со Бугарија, кои го засегаат нејзиното работење. Макпетрол е досега најголемиот снабдувач со гас на топланите и на ЕСМ Топлификација, а често е и единствен понудувач на јавните повици. Министерот за Економија Крешпник Бектеш го нарече  однесувањето на Макпетрол неодговорно, рече дека компанијата била детално информирана за потпишаниот договор со Бугарија, и најави за денеска разговори и контакти со менаџментот на Макпетрол.