СУДСКИОТ СИСТЕМ НА УНГАРИЈА ОДЛУЧУВА ЗА ГРУЕВСКИ Поранешниот премиер на Македонија не е во надлежност на Владата на Унгарија
Ова не е политичко, туку правно прашање. Тоа е работа за судскиот систем и во Унгарија политичарите во врска со тоа не може да поставуваат прашање - изјави Петер Сијарто, министерот за надворешни работи на Унгарија.
Унгарскиот министер за надворешни работи Петер Сијарто, кој денеска е во посета на земјава, изјави дека екстрадицијата на поранешниот македонски премиер Никола Груевски е правно прашање за кое е задолжен судскиот систем.
– Ова не е политичко, туку правно прашање. Тоа е работа за судскиот систем и во Унгарија политичарите во врска со тоа не може да поставуваат прашање – изјави Сијарто на заедничката прес-конференција во МНР со шефот на дипломатијата Бујар Османи, одговарајќи на новинарско прашање зошто Унгарија не го испорачува Груевски.
Поранешниот македонски премиер Никола Груевски побегна во Будимпешта во 2018 година каде доби политички азил. Тој е обвинет во повеќе судски процеси и осуден во предметот „Тенк“ на две години затвор за набавката на луксузниот мерцедес.
Министерот Сијарто на денешната средба со Османи, ја реафирмираше унгарската поддршка за Македонија, со заложби истата да продолжи со несмален интензитет во натамошниот период. Двајцата министри констатираа дека интеграцијата на Западен Балкан е геостратешки интерес на Европската Унија, што придонесува за безбедноста и просперитетот на целиот континент и оневозможување на несоодветни влијанија и интереси од трети држави.