ЗДРАВИЦА НА ПЕНДАРОВСКИ ВО ГРЧКАТА ПРЕТСЕДАТЕЛСКА ПАЛАТА Вие сте наш промотор

Во оваа посета која ја чекавме цели 30 години дојдовме како ваши пријатели. Денес, за време на сите мои средби уште еднаш се уверив дека напорите кои ги вложуваме во насока на уште поголемо зближување на нашите држави и народи, се двострани и искрени, рече претседателот на Северна Македонија Стево Пендаровски за време на официјалната свечена вечера во негова чест во Претседателската палата.

Претседателот за време на здравицата, го изрази задоволството што е првиот претседател на С Македонија кој во тоа својство ја посетил Грција, а се осврна и на новата ера на соработка, веќе трета година по ред, по потпишувањето на Преспанскиот договор „со кој успеавме да затвориме едно компликувано прашање во нашите односи“.

– Договорот беше тежок чекор за двете држави, но, го постигнавме во интерес на нашата заедничка иднина –  истакна претседателот.

Тој додаде дека она што стана реалност, потоа за нас е членството во НАТО „каде што сме веќе и формални сојузници, посветени на промовирање и одбрана на заедничките вредности“, а во функција на стабилноста и просперитетот на регионот и на целата евро -атлантска зона.

– Постигнавме видливи резултати за краток период и покрај сите предизвици. Речиси и да не постои сфера каде што немаме заеднички интерес за прогрес. Длабоко сум уверен дека во периодот што претстои ќе го зголемиме обемот на трговска размена и инвестиции. Сиве овие изминати години релациите меѓу двете бизнис заедници не прекинаа. Време е ние сега да креираме подобри услови за нивна уште поголема соработка. Дозволете уште еднаш искрено да се заблагодарам за континуираната грчка поддршка за процесот на интеграција на С Македонија во Европската унија, каде што и покрај сите блокади со кои сме соочени, Вие сте наш доследен поддржувач и промотор – порача претседателот.

Тој истакна дека со грчката претседателка имаат толку многу теми за разговор, што искрено посакува што побрзо да ја види во Скопје, поканувајќи ја да ја посети Северна Македонија за да ги запознае нашите природни убавини и „се разбира, час поскоро, да продолжиме со нашите конструктивни разговори“.

– Госпоѓо Сакeлaропулу, нека Вашиот мандат придонесе за понатамошен сестран напредок на вашата држава. Ве уверувам дека од наша страна ние сме подготвени посветено да работиме за просперитет и вечно пријателство меѓу нашите два народи – рече претседателот Пендаровски, наздравувајќи во чест на грчката претседателка.

Грција и Северна Македонија, како земји со заедничка граница, имаме уште поголема одговорност кон нашите народи да работиме заедно и да ги зајакнеме нашите билатерални односи со почитување на принципот на добрососедство и на меѓународното право, во корист и на нашите земји и на поширокиот регион, истакна претседателката на Грција, Катерина Сакеларопулу во нејзината здравица за време на вечерата во чест на претседателот Стево Пендаровски.

Сакелароулу уште еднаш се осврна на важноста на првата официјална посета на претседател на државава на Грција, потенцирајќи дека „веќе е отворено едно важно поглавје во нашите билатерални односи, што им дава нов импулс“.

Таа додаде дека тие веруваат во заемно корисен однос помеѓу двете земји, како соседи, како земји членки на НАТО, како и во рамките на Европската Унија, а ја спомена и ЕУ интегравцијата на регионот како стратешка цел за Грција уште од  2003 година и конференцијата во Солун, „која за прв пат ја препозна нивната европска перспектива и која се уште претставува пресвртница и референтна точка“.

Во поздравниот говор, Сакеларопулу повтори дека целосно и со добра волја спроведувањето на Преспанскиот Договорот е неопходен елемент за непречен развој на односите меѓу двете земји.

Шефот на државата и неговата сопруга, пред вечерата, во присуство на претседателката на Грција и нејзиниот партнер се потпишаа во книгата на гости.

На свечената вечера во Претседателската палата во Атина, присуствуваа и министри од грчката Влада, како и претставник на опозициската СИРИЗА.