ПРОМОТИВНА КАНЦЕЛАРИЈА НА ВЕСКОВСКИ ВО ТАФТАЛИЏЕ Повеќе велосипеди, помалку автомобили

Отворањето на промотивната канцеларија во Тафталиџе на кандидатот на СДСМ за градоначалник на Карпош, Душко Весковски денеска започна со поделба на промотивен материјал и презентација на предвидените проекти во овој реон.

– Планирано е зголемување на зелените паркови и површини. Во согласност со општата политика за зголемување на зелените површини и нивно редовно одржување, уште во првата година од мандатот ќе изработиме сеопфатна програма за хортикултурно уредување, реновирање на постојната и поставување нова урбана опрема и реновирање и изградба на детски игралишта, во постојните парковите во овие две урбани заедници – рече Весковски.

Целта е да овозможиме што почиста и поздрава околина за живот на нашите сограѓани, додаде тој. вклучувајќи ги и најмалите жители. Реализацијата на оваа програма ќе се спроведува етапно во текот на сите четири години од мандатот.

– Одлучни сме целосно да го искористиме овој потенцијал преку поставување и одржување на уште повисоки стандарди на хумано и планско урбано живеење. Нашата визија за наредните четири години е Карпош, а со тоа и Тафталиџе, да се развие во општина со највисок степен на дигитализација на јавните услуги, со хумана и планска урбанизација што го штити јавниот интерес, ја почитува приватната сопственост и придонесува за економскиот развој, со највисок процент на зелени површини во градот и државата, со чисти улици по кои ќе се движат повеќе велосипеди, а помалку автомобили, со развиена социјална и културна инфраструктура. Промотивната канцеларија останува отворена за прашања и предлози. Затоа што Карпош го заслужува најдоброто – истакна кандидатот за градоначалник на Карпош.