Џафери: Јас не сум Фејсбук политичар туку практичар кој почитува прописи

Координаторот на пратеничката група на ВМРО-ДПМНЕ Никола Мцевски побара пауза еден час бидејќи опозицијата сака да ги види материјалите оти, како што кажа, претседателот на Собранието Талат Џафери шверцерски закажува седница.

– Дали сте свесни дека денеска правите преседан кој го нема направено ниту еден претседател на парламент во изминатит 30 години. Дека првпат се прекинува седница за пратенички прашања и дека никогаш во ден за пратенички прашања не се закажува друга седница. Го кратите рокот на седницата, а имате предлог од ВМРО-ДПМНЕ за елегантено да го решите ова прашање. На насилнички начин го менувате дневниот ред. Нашиот предлог ви е на масса. На паузата да закажеме седница на која ќе се изгласа дневниот ред од четирите точки – рече Мицевски.

Џафер возврати дека точките кои ги бара опозицијата се на седница и дека нивна е одлуката.

– Јас нема да правам преседан за исти точки кои се на седница да свикам нова седница.Јас не сум фејсбук политичар туку практичар кој спроведува прописи – рече Џафери.

Координаторот на пратеничката група на СДСМ Јован Митрески повика на разум.

– Повикувам да има  седница за да им излеземе во пресрет на граѓаните и фирмите и дека таа не е криминална седница и за тоа треба да им се извините на граѓаните. Влезете во сала дај да завршиме седницата и повторувам нека се продолжат после пратеничките прашања, мнозинството ќе се откаже од поставување прашања – рече Митрески.

И Арбр Адеми од ДУИ рече дека пратениците од ДУИ ќе се откажат од поставување пратенички прашања во полза на опозицијата.

Џафери прогласи пауза од еден час и ги повика шефовите на пратеничките групи на координација.