Пронајдено телото на актерката која се удави во езерото

Телото на актерката Наја Ривера, sвездата на ТВ-серијата „Гли“ е пронајдено во езерото во Јужна Калифорнија, соопштија официјалните лица, јавува Си-eн-eн.

Според Си-eн-eн, шерифот Бил Ајуб изјавил дека телото на актерката е пронајдено како лебди на езерото Пиру. Тој додал дека нема индикации дека станува збор за убиство или за самоубиство.

Веста ја потврди полицијата.

Актерката се водеше како исчезната откако нејзиниот четиригодишен син беше пронајден сам во чамецот на езерото.

„Тело е пронајдено утрово во езерото Пиру. Обработката е во тек“, се наведува во краткиот пост на официјалниот профил на Твитер на полициската станица Вентура.

Актерката исчезна минатата среда на подрачјето на езерото Пиру, каде изнајмила чамец со својот четиригодишен син и потоа отишла да плива.

Снимките од надзорната камера ја прикажуваат како доаѓа на брегот на езерото во нејзиниот автомобил „мерцедес“, а потоа оди со нејзиниот син за да го изнајми чамецот.

Неколку часа подоцна, екипажот на друг брод го нашол нејзиниот син како спие сам во чамецот и ја известиле полицијата.