Во тек е исплата на правата од социјална и детска заштита

Министерството за труд и социјална политика информира дека во тек е исплатата на правата од социјална и детска заштита за април 2020 година: Гарантиран детски додаток, Детски додаток, Посебен додаток за мај 2020, Еднократна парична помош за новороденче, Родителски додаток за трето дете, Родителски додаток за четврто дете и Единствен родителски додаток.

Во тек е и исплатата за Образовен додаток – Студирање, Гарантирана минимална помош, Туѓа нега, Постојана парична помош, Еднократна парична помош, Мобилност и слепило, Цивилна инвалиднина, Социјално домување, Социјална сигурност- социјална пензија, Азиланти домување, Парична помош за згрижувач и Паричен надоместок за згрижувачко семејство.

МТСП информира дека исплатата на правата на парична помош од социјална и детска заштита на шалтерите на банките се врши етапно, по дефиниран редослед по азбучен ред, според почетната буква од презимето и тоа:

– 4 мај 2020 (понеделник) исплата за А, Б, В, Г + Д (прва буква на презиме)

– 5 мај 2020 (вторник) исплата за Ѓ, Е, Ж, З, Ѕ, И, Ј, К + Л (прва буква на презиме)

– 6 мај 2020 (среда) исплата за Љ, М, Н, Њ, О, П + Р (прва буква на презиме)

– 7 мај 2020 (четврток) исплата за С, Т, Ќ, У, Ф, Х, Ц, Ч, Џ + Ш (прва буква на презиме)

„Етапната исплата на паричните права од социјална и детска заштита е направена со цел да се избегне метежот пред банките и да се овозможи поголема заштита на корисниците на овие права, во услови на опасност од вирусот ковид-19. Корисниците на права од социјална и детска заштита кои користат платежни картички поврзани со трансакциската сметка на која се исплаќаат правата од социјална и детска заштита, паричните средства можат да ги подигнат на банкоматите на банките, да ги користат за безготовински плаќања во продажната мрежа или преку електронско и мобилно банкарство, сметано од 4 мај 2020 година“, соопшти МТСП.

Министерството за труд и социјална политика потсетува на обврската за носење лична заштита заради спречување на ширење на коронавирусот и за заштита на населението за време на вонредна состојба.

„Сите кои ќе подигнуваат пари од банкомати или од филијали и експозитури на банките, се должни да носат каква било форма на заштита којашто ги покрива пределот на носот и устата (респираторна маска, хируршка маска за еднократна употреба, текстилна маска за повеќекратна употреба, свилена марама или шал, памучна марама или шал, бандана и слично). Исто така, при чекање ред пред и внатре во банките, треба да се запази минимум потребно растојание од најмалку два метра“, наведува Министерството во соопштението.