Трамп ја обвини Кина за епидемијата, Пекинг остро му возврати ВИДЕО
Многу полесно ќе поминевме доколку за вирусот знаевме неколку месеци порано, рече претседателот на САД.
Светот плаќа огромна цена поради тоа што Кинезите не реагираа навреме и не го предупредија светот за опасноста од коронавирусот, рече американскиот претседател Доналд Трамп на прес-конференција и додаде дека не може да се смета за расизам тврдењето дека коронавирусот е кинески вирус.
– Многу полесно ќе поминевме доколку за вирусот знаевме неколку месеци порано – рече Трамп.
На оваа негова изјава веднаш реагираше портпаролот на кинеското МНР, Генг Шуанг, кој му возврати дека САД сакаат да ја оцрнат работата на Кина против епидемијата и на тој начин да избегаат од својата одговорност.
– Таквото однесување на американскиот претседател ги занемарува жртвите што Кина ги направи за да обезбеди санитарна безбедност – рече Шуанг.
Тој додаде дека кинеските власти од 3 јануари годинава почнале да ги информираат САД за ситуацијата со епидемијата и дека уште од првиот ден одржувале редовна комуникација.