83 МЕСТО ЗА ЈАДА НА 10 КИЛОМЕТРИ Македонскиот нордиец го заокружи својот настап во Милано–Кортина
Ставре Јада го имаше својот втор и последен настап на Игрите, додека Македонија продолжува со алпско скијање.
Македонскиот нордиец Ставре Јада го освои 83 место во трката на 10 километри крос-кантри, слободен стил, на Зимските олимписки игри во Милано–Кортина.
Јада патеката ја мина со време од 25:28.9 минути, со заостанување од 4:52.7 минути зад победникот, норвешкиот ас Јоханес Хоесфлот Клаебо, кој уште еднаш ја потврди својата доминација во оваа дисциплина.
Трката ја завршија вкупно 111 натпреварувачи, што дополнително ја отсликува силната конкуренција во нордиското трчање на олимписко ниво.
За Јада ова беше втор настап на Олимписките игри во Милано–Кортина, откако претходно се натпреваруваше и во спринт дисциплината. Со ова, македонските нордијци ги заокружија своите настапи на годинашното олимписко издание.
Во нордиско трчање настап забележа и Ана Цветановска, која ја претставуваше Македонија во женска конкуренција.
Македонското учество на ЗОИ продолжува со алпското скијање.
На патеките ќе се појават:
Виктор Петков – 15 февруари
Јана Атанасовска – 18 февруари
Со нивните настапи ќе биде заокружено македонското учество на Игрите во Италија.