7.000 евра казна за лицето кое на Вевчанскиот карневал го запали бугарското знаме

Струшкото јавно обвинителство издавало казнен налог за три лица кои на Вевчанскиот карневал го запалија бугарското знаме. Првообвинетиот треба да плати 7.000 евра, додека останатите двајца ќе треба да платат по 5.000 евра, информира Обвинителството.

– Обвинетите, на 14 јануари, за време на самоиницијативниот собир на граѓани по повод верскиот празник Св.Василиј во Вевчани, со намера за исмејување јавно го изложиле на подбив знамето на Република Бугарија. Еден од нив го запалил знамето, а останатите двајца го кревале и замавнувале со запаленото и подгореното знаме – велат од Обвинителството.

Јавниот обвинител на Основниот суд во Струга му предложи на првообвинетиот да му изрече парична казна од 100 дневни глоби со поединечна вредност на дневната глоба од 70 евра во денарска противвредност, додека за останатите двајца обвинети се предложени парични казни од по 100 дневни глоби од по 50 евра во денарска противвредност.​