6 ЧЕКОРИ ОД КОИ ВИ ЗАВИСИ ЖИВОТОТ: Правила за живот по срцев удар, за никогаш да не се повтори

Многу е важно оние кои имаат проблем со некоја од срцевите заболувања редовно да го проверуваат своето здравје.

По миокарден инфаркт, на срцевиот мускул често останува лузна, поради што функцијата на срцето делумно се губи. Покрај тоа, причината за срцев удар – артериосклероза (атеросклероза), односно задебелување и непроодност на срцевите артерии – сè уште постои и, згора на тоа, може постепено, а понекогаш и брзо да напредува.

Сето ова ни кажува дека по срцев удар, човекот повеќе не може да биде целосно здрав. Задачата на секој срцев пациент е да направи сѐ за неговиот квалитет на живот да биде задоволителен, во некои случаи речиси целосно нормален. Секако, ќе мора да следите некои правила, но тоа не би требало да биде тешко, со оглед на тоа дека тие се пожелни за сите, а не само за некој кој преживеал инфаркт.

 

Чекор 1: Заборавете на тутунскиот чад

Бидете сигурни дека една од најзначајните причини за срцев удар е токму страста кон цигарите. И ако упорно продолжите со оваа навика (не мора да ви истакнеме дека е штетна навика, нели!?), станувате еден од првите кандидати за срцев удар и уште десетина крајно опасни болести од следните причини:

• количината на маснотии во крвта на пушачите е поголема од онаа на непушачите, што е директен пат до атеросклероза;
• кај пушачите, згрутчувањето на крвта се забрзува за 15 до 26 проценти, што води до формирање на згрутчување на крвта (тромб);
• утврдено е дека никотинот предизвикува зголемен крвен притисок, така што пушачите се изложени на ризик да развијат пушачка склероза на крвните садови.

 

Чекор 2: Лековите се задолжителни!

Мора да ги земате лековите што ви ги препишал вашиот лекар. Најпрво, пациентите земаат аспирин, кој го намалува згрутчувањето на крвта и на тој начин го спречува создавањето на згрутчување на крвта што ја затнува срцевата артерија и предизвикува срцев удар. Пациентите на кои им бил вграден стент во срцевата артерија, покрај аспирин, мора да земаат и дополнителни лекови.

Во терапијата по миокарден инфаркт се користат и статини кои ефикасно го намалуваат нивото на „лошиот“ холестерол (ЛДЛ холестерол). Ова ја забавува атеросклерозата, која ги стеснува артериите на срцето и мозокот и другите важни органи. Кај пациенти со хипертензија се препорачуваат препарати кои го намалуваат високиот крвен притисок и го запираат проширувањето на левата срцева комора, кое често се зголемува по срцев удар.

Чекор 3: Внимавајте на холестеролот

Треба да го намалите холестеролот во крвта. Тоа е главната причина за артериосклероза. За тоа значително придонесува храната богата со холестерол (жолчка, црн дроб и други животински внатрешни органи, свинско…) и заситени масни киселини (полномасни млечни производи, масти од животинско потекло).

Како што знаете, холестеролот може да биде „лош“ и „добар“. Кога се зголемува „лошиот“ холестерол, нивото на „добриот“ холестерол се намалува и се јавува болест. За разлика од „лошиот“, „добриот“ холестерол не може да се внесе со храната. Тој се произведува во телото при умерена физичка активност. Мора редовно да одите на тестови на крвта и следење на нивото на холестерол. Во вашата ситуација, дури и најмалото зголемување треба да се сфати многу сериозно.

 

Чекор 4: Контролирајте го крвниот притисок

Борба против хипертензија, односно висок крвен притисок. Ова е важен фактор на ризик за артериосклероза, што значи дека со висок крвен притисок се зголемува ризикот од нов срцев удар, а вие не сакате да си го дозволите тоа на себе или на вашите најблиски, нели!?

Високиот крвен притисок поврзан со артериосклероза го зголемува ризикот од срцев удар и други кардиоваскуларни заболувања дури за пет пати, а потоа ја забрзува артериосклерозата и доведува до компликации. Денес, со соодветен третман, приближно една третина од пациентите со хипертензија може целосно да се излечат.

Во други случаи, следењето на препораките на лекарот го спречува нејзиниот напредок.

Важно е лековите да се земаат редовно, бидејќи хипертензијата има својство постојано да напредува. Исто така, треба да се нагласи дека покрај терапијата важно е и спиењето (најмалку седум часа), дека треба да се избегнува стресот и другите емоционални возбудувања.

Чекор 5: Внимавајте на вашата тежина
Ако не сте го правеле тоа досега, сега е вистинското време да почнете да се грижите за вашата тежина. Поради дебелината, срцето кое веќе е ослабено од срцев удар тешко ги извршува своите задачи. Во борбата против вишокот килограми помагаат: физичка активност, одредена од лекар (значи, не смеете да вежбате на своја рака) и нискокалорична исхрана.

 

Чекор 6: Движете се повеќе
Кај луѓето кои систематски се занимаваат со физичка активност, по 30 минути најмалку три пати неделно, анализата на крвта покажува дека се намалуваат масните наслаги, се намалува тенденцијата за формирање на згрутчување на крвта, се развиваат дополнителни мали крвни садови кои го хранат срцевиот мускул, холестеролот е нормализиран, а постепено се намалува количеството на масни наслаги во телото.

Доколку активно сте се занимавале со спорт пред срцевиот удар, мора да го намалите интензитетот на вежбите. Одењето со умерено брзо темпо не може никому да му наштети и тоа е доволно за почеток. Како што закрепнувате, договорете се со вашиот лекар за приспособена програма за вежбање.

Конечно, не заборавајте да се фокусирате повеќе на себе и на работите што ги сакате. Срцевиот удар најчесто е предупредување дека не сте го слушале вашето тело кога ви испраќало „сигнали“ дека повеќе не може да го следи темпото со кое живеете… Ако сега не е време да го смените тоа, кога точно мислите да го направите тоа?