50% ОД ДЕЦАТА ВО СКОПСКИТЕ ГРАДИНКИ НЕ СЕ КОМПЛЕТНО ВАКЦИНИРАНИ Во другите градови вакцинираноста е повеќе од 95%
Сметам дека оваа акција треба да продолжи и во следните денови. Директорите на градинките дадоа уверување дека ќе ја почитуваат мерката, а ние ќе провериме, рече в.д. директорка на Државниот санитарен и здравствен инспекторат, Рената Младеновска.
Речиси 50 отсто од децата кои одат во градинките во Скопје не се вакцинирани, изјави в.д. директорка на Државниот санитарен и здравствен инспекторат, Рената Младеновска споделувајќи ги со јавноста првичните информации по извршениот надзор. Таа укажа дека освен градинките, ќе бидат казнувани и одговорните лица, доколку биде затекнато дете кое е невакцинирано.
– Скоро 50 проценти од децата кои посетуваат градинки во Скопје се невакцинирани или се нецелосно вакцинирани со ди-те-пер. Лично сметам дека тоа е поразителен факт за ова општество. Вчера ги добивме и списоците со децата кои се невакцинирани или нецелосно вакцинирани. Сметам дека оваа акција треба да продолжи и во следните денови. Директорите на градинките дадоа уверување дека ќе ја почитуваат мерката, а ние ќе провериме – рече Младеновска.
Директорката кажа дека проблемот е во Скопје, а дека децата кои сега се вакцинираат не треба да седат дома 21 ден.
– Нема мерка од нас или од кого било издадено дека дете треба да седи дома 21 ден по вакцина. Во текот на вчерашниот ден, направивме вонредни инспекциски надзори и во другите градови. Од првичните информации вакцинирани се над 95 проценти од децата. Таму родителите се одговорни и ја почитуваат мерката. Очигледно дека проблемот ни е во градот Скопје – нагласи Младеновска.
Покрај државните градинки, директорката Младеновска истакна дека се контролираат и приватните и дека нема отстапување за никого, бидејќи мора да се почитува решението кое го издаде Министерството за здравство.
Како и за претходната имунизација за морбили, така и за оваа, исклучок за невакцинирање ќе се прави кај оние деца кои поради оправдани здравствени состојби не можат да бидат вакцинирани. За тоа да се докаже родителите ќе треба да приложат картон од специјалистичко конзилијарно мислење од Детската клиника од терцијарно ниво.
Поради опасноста од ширење на големата кашлица, министерот за здравство ги прифати препораките од Комисијата за заштита од заразни болести. Родителите кои ќе одбијат да ги вакцинираат своите деца се соочуваат со казни од 300 до 650 евра.