300 СРПСКИ ПОЛИЦАЈЦИ ПОДНЕСОА ОСТАВКА Ги соблекоа униформите во Косовска Митровица

Околу 300 српски полицајци, командири на станици и раководители од четири општини од северот на Косово попладнево официјално поднесоа оставки во полициската станица во Косовска Митровица, а нивните преостанати колеги тоа ќе го сторат утре, пишуваат српските медиуми.

Тие се собраа пред станицата во Косовска Митровица носејќи ги оставките напишани на кирилица, а потоа влегоа во зградата на станицата. Набрзо си заминаа и ги предадоа оставките.

Оставки поднесоа и српските полицајци на граничните премини „Јариње“ и „Брњак“.

Командантите и раководителите во полицијата на состанокот на претставниците на Србите на северот на Косово, во општина Звечан, пред камерите ги соблекоа униформите.

Во Северна Митровица денеска се одржа голем народен собир кај Споменикот на принцот Лазар. Градот беше украсен со српски знамиња, а митингот започна со интонирање на српската национална химна.

фото: Танјуг