22 АВГАНИСТАНЦИ ОД МАКЕДОНИЈА ЗАМИНАА ЗА КАНАДА Неколку стотици сѐ уште се во земјава
Со ова продолжува успешната мисија за трајно решавање на статусот на мирољубивото население на Авганистан кое е во животна опасност од талибанскиот режим. Северна Македонија активно учествува грижејќи се за неколку стотини кои до сега пристигнаа во земјава, велат од владината прес-служба.
Дваесет и двајца авганистански цивили, кои во изминатиот период престојуваа во Северна Македонија, добија престој во Канада. Со лет од Меѓународниот аеродром во Скопје денеска заминаа вработени и соработници на меѓународната организација „Отворено владино партнерство“ и членови на нивни семејства, соопшти прес-службата на Владата.
„Со ова продолжува успешната мисија за трајно решавање на статусот на мирољубивото население на Авганистан кое е во животна опасност од талибанскиот режим. Северна Македонија активно учествува грижејќи се за неколку стотини кои до сега пристигнаа во земјава.
Повеќе институции и невладини организации се ангажирани пружајќи им ја сета помош и поддршка додека се сместени во објекти во Скопје. Вклучени се здравствени работници, волонтери на Црвениот крст, а со правна помош за обезбедување документи потребни за заминување во трети земји асистира Македонското здружение на млади правници“, информира владината прес-служба.