16 ПЛИВАЧИ СЕ ПРИЈАВИЛЕ НА ОХРИДСКИОТ МАРАТОН Наградниот фонд изнесува 15.000 евра
Дваесет и петкилометарската патека „Климе Савин“ ќе ја пливаат 10 маратонци и шест маратонки.
Шеснаесет пливачи од шест држави ќе учествуваат на 38. издание на Охридскиот пливачки маратон што ќе се одржи утре во водите на Охридското Езеро од Свети Наум до Охридското пристаниште.
Дваесет и петкилометарската патека „Климе Савин“ ќе ја пливаат 10 маратонци и шест маратонки.
Во женска конкуренција ќе настапат пливачките: Елена Лионело – Италија, Росана Гошева – Македонија, Алисја Гедриш – Полска, Милица Љубисављевиќ – Србија, Ерика Абигал Јенсен – Аргентина, Мајте Ајлен Пука – Аргентина. Настапот на Охридскиот пливачки маратон, поради повреда го откажа пливачката од Турција Еда Сајин.
Во машка конкуренција ќе се натпреваруваат 10 пливачи од кои четворица се од Македонија – Александар Илиевски, Леонид Мишевски, Петар Цеков и Лазар Поп Трајков, потоа Акуилес Балаудо и Матиас Дијас Хернандес од Аргентина, Италијаните Федерико Тамборино, Марко Инглима и Матео Фурлан, како и Хуго Риберио од Португалија.
Организатор на маратонот е пливачкиот клуб „Охридски бранови 2008“, а се одржува под покровителство на претседателката на државата Гордана Сиљановска Давкова, Министерството за спорт, Пливачката асоцијација на Македонија и Општина Охрид.
Наградниот фонд, како што информира организаторот, изнесува 15.000 евра.
Охридскиот пливачки маратон и оваа година е дел од Фестивалот на спортови на вода (Ohrid Water Festival).
Оваа година Општина Охрид му ја додели наградата „Климе Савин“ на Павел Групчев, еден од основоположниците на Охридскиот пливачки маратон. Наградата во негово име ја прими Виолета Групчева.
Признание за афирмација и промоција на Охридскиот пливачки маратон му беше доделено на познатиот македонски маратонец Томи Стефановски. Тој по повод одбележувањето 16 години од препливувањето на каналот Ла Манш преплива 16 км од Охридското Езеро, а подвигот го посвети во хуманитарни цели, односно за инклузија и подигнување на свеста и креирање услови на лицата со атипичен развој и индивидуализираните лица во спортот и физичкото образование.
Охридскиот пливачки маратон годинава одбележува седум децении од славните почетоци. Најважните моменти од историјата на оваа значајна спортска манифестација се преточени во документарниот филм „Време, вода, наследство: Охрид“ на режисерот Илија Пиперкоски, кој премиерно беше прикажан синоќа во предворјето на црквата „Св. Софија“ во Охрид.