15-ГОДИШНИК СО КАМЕН ГО УДИРАЛ ПО ГЛАВА Жена легнала врз сопругот за да го спаси од тројцата напаѓачи

Основното јавно обвинителство Скопје отвори истражна постапка против татко и син од Батинци, осомничени за кривично дело „Насилство“, откако со уште едно 15-годишно дете, вториот син, брутално претепале маж по претходна расправија. Обвинителството соопшти дека жртвата е со тешки телесни повреди, а насилството предизвикало страв и вознемиреност кај целото семејство и соседите.

– Обвинителството постапува решително и без компромис кога се во прашање насилни инциденти со тешки последици врз животот и телото на оштетените лица. Насилството не смее да остане неказнето, особено кога е извршено пред очи на други членови на семејството и јавноста – велат од Основното јавно обвинителство Скопје.

Инцидентот се случил во селото Батинци, каде татко на 41-годишна возраст и неговите двајца синови – еден полнолетен (18 години) и друг малолетен (15 години), дошле пред куќата на оштетениот поради претходен вербален конфликт со детето. Наскоро, заканите преминале во физички напад, го удирале оштетениот со клоци и тупаници по главата и телото, по што тој паднал на земја. Малолетното дете продолжило со удар со камен, нанесувајќи дополнителни сериозни повреди.

Во обид да го заштити, сопругата на жртвата легнала врз него, додека нивните деца и соседи се обидувале да го прекинат нападот. Жртвата претрпела фрактури и други тешки телесни повреди.

– Со бруталниот напад, осомничените предизвикале чувство на страв не само кај оштетениот, туку и кај неговото семејство и пошироката јавност – додаваат од Обвинителството.

Јавниот обвинител до судијата на претходна постапка достави предлог за определување мерка притвор за полнолетните лица. За малолетникот, постапката се води согласно Законот за правда за децата.