11 ЛИЦА ПРИВЕДЕНИ НА ИЗБОРИТЕ, ЕДЕН БИЛ ВРАБОТЕН ВО ДИК И покрај инцидентите ова беа најмирните избори во поновата историја, смета Тошковски

Министерот за внатрешни работи, Панче Тошковски, изјави дека денешните локални избори поминале во исклучително мирна и безбедна атмосфера, оценувајќи ги како „најмирните избори во поновата историја на Македонија“.

– Изборниот процес започна во 7 часот, освен на 84 избирачки места каде што имаше задоцнувања од најмногу два часа, претежно поради технички проблеми со уредите за идентификација – изјави Тошковски.

Според податоците на Министерството, во текот на денот биле регистрирани 29 прекини на гласањето, во траење од 15 до 30 минути, најчесто поради технички потешкотии.

– На територијата на целата држава пријавени се 91 настан – дел од нив се однесуваат на агитирање и можен поткуп, дел за сликање на гласачки ливчиња, лепење плакати и закани. По преземените мерки, за 42 случаи постапките се завршени, а во најголем број не се потврдени неправилности – рече министерот.

Тошковски потврди дека 11 лица биле приведени поради различни инциденти – поткуп, уништување на гласачко ливче и фотографирање на избирачко ливче.

– Четири лица се веќе ослободени, а за останатите по завршувањето на постапката очекуваме тие да бидат пуштени. Секторот за внатрешна контрола ќе постапи по сите случаи каде што имало инволвираност на полициски службеници – нагласи министерот.

Тој напомена дека во текот на денешниот ден имало приведување и на едно лице вработено во Државната изборна комисија, но за време на лишувањето од слобода, немало работни задачи.

– Согласно информациите кои ги имам, едно од лицата кое е лишено од слобода е во работен однос во рамките на Државната изборна комисија, но истиот при лишувањето од слобода не ги извршувал своите работни обврски, и е лишано од слобода затоа што одбил да се идентификува – изјави Тошковски.

Тошковски информирааше дека биле пријавени седум настани во кои биле инволвирани полициски службеници, но за шест од нив е утврдено дека нема неправилности, додека еден случај сè уште се расчистува.

Секторот за компјутерски криминал регистрирал и 19 објави на социјални мрежи поврзани со изборите, кои ќе бидат предмет на дополнителна проверка.

– Сакам да им се заблагодарам на сите полициски службеници кои професионално си ја завршија задачата и овозможија граѓаните без проблеми да го остварат своето право на глас. Исто така, им благодарам и на граѓаните за фер и демократскиот пристап – порача Тошковски.