📽️ 📷 10 МРТВИ И НАД 40 ПОВРЕДЕНИ ВО ТЕРНОПОЛ Жесток руски напад врз Украина со 470 дронови и 48 ракети
Русија нападна со стотици дронови и десетици ракети, уништувајќи станбена зграда во Тернопол и оставајќи илјадници Украинци без струја на екстремно ниски температури.
Десет загинати и најмалку 40 повредени е црниот биланс од ноќешниот масовен руски напад со ракети и дронови врз Украина, во кој е погодена станбена зграда во западниот град Тернопол. Горните катови се срамнети со земја, зградата гори, а црн чад се издига над населбата додека спасувачите се борат да стигнат до заробените под урнатините.
Нападот бил насочен и кон енергетската и транспортната инфраструктура низ Украина, предизвикувајќи итни исклучувања на струја токму во период на ниски температури. Украинските власти соопштија дека Русија лансирала повеќе од 470 дронови и 48 ракети, еден од најмасовните ноќни напади во последните месеци.
Полска, како мерка на претпазливост, привремено ги затвори аеродромите во Жешов и Лублин и подигна полски и сојузнички авиони за заштита на својот воздушен простор, бидејќи нападите се случуваа во близина на границата.
Министерот за внатрешни работи Игор Клименко потврди дека сите десет жртви се од Тернопол, а меѓу повредените има дванаесет деца.
– Неколку лица се’ уште може да бидат под урнатините – предупреди тој.
Across many of our regions, work is underway to address the aftermath of Russia’s attack. It is confirmed that Russia launched more than 470 attack drones and 48 missiles of various types against Ukraine overnight – one ballistic and the rest cruise missiles.
In Ternopil,… pic.twitter.com/EwQmc6Nv1S
— Volodymyr Zelenskyy / Володимир Зеленський (@ZelenskyyUa) November 19, 2025
Претседателот Володимир Зеленски порача дека ваквите напади докажуваат колку е неопходна посилна меѓународна реакција.
– Секој напад врз обичниот живот покажува дека притисокот врз Русија е недоволен. Ефективните санкции и дополнителната помош за Украина можат да го променат тоа – порача тој, барајќи повеќе противвоздушни системи.
Енергетските претставници велат дека инфраструктурата е погодена во седум региони, а во Лвов биле слушнати силни експлозии. Точниот степен на штетата допрва ќе се проценува, но ограничувањата за користење на електрична енергија веќе се воведени низ земјата.