ЗЕТ КАКО МЕД, МЕД КАКО ЗЛАТО Скопски пчелар со охридски пчеларник

За медот на Горан и Драгана Радически слушам веќе одамна, а најмногу од нивните верни муштерии Јуле и Јорде (производители на ракијата позната под брендот „В’к).
Во неколку пригоди Јуле толку убаво го опишуваше вкусот на нивниот мед, што почувствував како ми се разработуваат плунковните жлезди.
И секако, во првата прилика, на неодамнешниот настан во организација на Слоу фуд Водно (во Јавна соба), чии членови се и едните и другите, конечно го пробав и сфатив дека дури и описот на Јуле не може да го долови неговиот вкус.
Навистина, не сум експерт за мед, ама ова е еден од оние за кои и не треба да сте експерт за да знаете дека е мед-мед.
Нашето прво прашање за Горан, кој е и главниот пчелар во ова четиричлено младо семејство од Скопје, беше токму тоа, како може да разликуваме вистински од лажен мед.
„Во врска со чистината на медот, препорака е секој да си има пчелар од доверба и при купување да го проба тоа што го купува.
Секако, има и неколку брзи начини кои најчесто се користат за проверка, а тоа е – да се сврти теглата и да се види дали се прави меурче кое не многу брзо се движи нагоре, кон врвот, потоа, да се земе од медот и да се види дали тече во непрекината нишка, додека се става во тањирче и да се разреди во вода за да се види како додека се разредува се прави познатиот шестоаголник, односно саќето во кое е правен медот“, објасни Горан.
Сепак, за нивниот мед е доволно да знаеме и дека е оној истиот што го консумираат и тие самите и нивните две малолетни деца, деветгодишната Јана и седумгодишниот Стефан.
Иако не знаат баш точно колку мед јадат како семејство на годишно ниво, велат дека е тоа сигурно повеќе од 30 тегли.

Целиот текст прочитајте го на порталот „Арт кујна“.