ЗБОГУМ НА НАЈТОПЛАТА ГОДИНА ВО ИСТОРИЈАТА Светот се подготвува да ја дочека „жешката“ изборна 2024
По традиција најголемата метропола која прва ќе навлезе во Новата година е Синдеј. Австралиската метропола се подготвува да прослави со осум тони огномет и милион луѓе во областа кај Операта и пристаништето.
Полека се троши последниот ден од годината и светот се подготвува да и каже збогум на 2023, годината која беше по многу нешта единствена. Тоа беше најтоплата година досега, откако се водат статистики, во која вештачката интелигенција бележи подем, во која војната во Украина, приближуваjќи се до својата втора година, беше надополнета со онаа меѓу Израел и Хамас во Појасот Газа, забележуваат западните агенции.
Светот ја пречекува Новата година со население од повеќе од 8 милијарди луѓе и со надеж дека ќе стави крај на конфликтите ширум светот и ќе ги намали високите трошоци за живот.
Новата 2024 година ќе биде „жешка“ година на многу избори, а за половина од светското население ќе биде година на клучни гласови. Избори ќе има во ЕУ, САД, Русија, Индија, Јужна Африка, но и во Македонија.
Ова ќе биде и година на Летните олимписки игри во Париз.
Светот се подготвува да се збогува со 2023 година, во која се врати розовиот бран на „Барби-манијата“ благодарение на хит филм. Година во која беше извршена првата трансплантација на цело око во светот.
Минатата година Индија стана најнаселената земја во светот и прва што постави вселенско летало на неистражениот јужен пол на Месечината.
По традиција најголемата метропола која прва ќе навлезе во Новата година е Синдеј. Австралиската метропола се подготвува да прослави со осум тони огномет и милион луѓе во областа кај Операта и пристаништето.
Но, всушност, најголемиот остров на архипелагот Кирибати – Киритимати, каде живеат околу 5.000 луѓе, е првиот населен остров, кој секоја година прв влегува во Новата година, додава ДПА.
Пацифичките острови Самоа ќе бидат последни што ќе се разделат од 2023 година.
Популарни места каде новогодишните забави отсекогаш предизвикувале интерес за посетителите се Триумфалната капија, Ајфеловата кула и Шанзелизе во Париз, Бранденбуршката порта во Берлин, панорамското тркало познато како „Лондонско око“ во британскиот главен град, плажата Копакабана во Рио де Жанеиро и плоштадот „Тајмс сквер“ во Њујорк, каде се спушта Кристалната топка.