ЗАЕДНИЦА НА СРПСКИ ОПШТИНИ НЕ СЕ ПРАВИ СО БРИСЕЛСКИ ЗАКЛУЧОЦИ Ќе вади ли Курти народ на улици во Косово?

Европскиот совет денеска ги усвои заклучоците за преговорите меѓу Србија и Косово, во кои ги повикува двете страни „целосно и безусловно да ги спроведат обврските што ги презедоа во дијалогот, вклучително и договорите склучени во 2013 и 2015 година за создавање на Заедница на српски општини“.

Сепак, се чини дека заклучокот на Европскиот совет засега не е никаква гаранција дека ќе дојде до формирање на Заедница на српски општини на Косово (ЗСО). Косовскиот премиер остро се спротивставува на таа идеја, а клучен проблем е дали ЗСО ќе има извршни овластувања. Српскиот претседател Александар Вучиќ порача да не го викаат во Брисел додека не се формира ЗСО, бидејќи тој не сака да оди таму како турист, бидејќи, како што рече, веќе бил двесте пати.

Во заклучоците на Европскиот совет се нагласува дека „итно е неопходно да се постигне напредок во нормализацијата на односите меѓу Косово и Србија преку дијалог со посредство на ЕУ, предводен од високиот претставник“.

Советот го поздрави неодамнешниот европски предлог, познат и како француско-германски предлог, наведувајќи дека односите меѓу двете страни ќе бидат поставени на „нова и одржлива основа“.

„Европскиот совет го поздравува европскиот предлог за поставување на односите меѓу двете страни на нова и одржлива основа како историска шанса што треба да ја искористат двете страни за да ја остварат својата европска перспектива“, се наведува во заклучоците.

Дијалогот меѓу Србија и Косово во последен момент беше вклучен на агендата на самитот на шефови на држави и влади на Европската унија (ЕУ), кој се одржува вчера и денеска.

Но, од Приштина пристигнуваат остри реакции од најблиското опкружување на Курти. За да го спречи формирањето на Заедницата на српските општини и да го обезбеди својот опстанок на премиерската позиција во Приштина, која е сериозно разнишана откако ја загуби безрезервната поддршка од САД, Аљбин Курти е подготвен да предизвика немири, пишуваат српските медиуми.

Тие наведуваат дека овој опасен план го претставил вториот човек на „Самоопределување“ на Курти, Глаук Коњуфца. Коментирајќи ја изјавата на специјалниот американски пратеник за Западен Балкан, Габриел Ескобар, кој рече дека „со Курти или без него ќе се создаде ЗСО“, Коњуфца возврати дека тоа е невозможно и се закани дека во тој случај ќе оди на улици заедно со граѓаните.

И Коњуфца изразил подготвеност да ја напушти функцијата, за, како што рече, да се запре формирањето на ЗСО. Тој изјави и дека „Србија на Косово и Метохија бара територијална автономија преку Заедницата на општини со српско мнозинство“.

Запрашан да ја коментира изјавата на Албин Курти, кој рече дека во Србија има 11 градоначалници на општини кои не се од српска националност и немаат посебни заедници, српскиот претседател Вучиќ нагласи дека тоа е глупост и дрскост.

– Тој би сакал да го изедначи правно-политичкиот и државно-правен статус на Србија и она што тој го нарекува Република Косово. Во моментов водиме разговори, затоа што не е исто. Нема што да разговарате за централна Србија. Имаме една тема и таа е на маса. Србија и Косово не се исти. Кога некој мисли дека има право да биде арогантен, затоа што мисли дека има големи покровители, што да правиме. Тоа се бесмислени трикови кои не функционираат ниту кај мене, ниту кај некој кој сериозно се занимава со својата работа – нагласи Вучиќ.