ДА СЕ СООЧИМЕ СО МРАЧНАТА СТРАНА НА ВЕШТАЧКАТА ИНТЕЛИГЕНЦИЈА Јапонскиот премиер ја претстави меѓународната рамка за регулација на ВИ

Јапонскиот премиер Фумио Кишида денеска ја претстави меѓународната рамка за регулација и употреба на генеративна вештачка интелигенција (ВИ), објави Еј-пи њус.

Кишида го објави ова во говорот пред Организацијата за економска соработка и развој (ОЕЦД) со седиште во Париз.

– Генеративната вештачка интелигенција има потенцијал да биде витална алатка за понатамошно збогатување на светот, но мораме да се соочиме и со темната страна на вештачката интелигенција, како што е ризикот од дезинформации – рече Кишида.

Кога Јапонија лани претседаваше со Групата седум (Г7) водечки индустријализирани земји, таа го започна процесот на вештачка интелигенција во Хирошима за да создаде меѓународни принципи и кодекс на однесување за развивачите на вештачка интелигенција.

– Околу 49 земји и региони ја потпишаа доброволната рамка, наречена Група на пријатели на процесот на вештачка интелигенција во Хирошима – рече јапонскиот премиер.

Земјите ќе работат на имплементација на принципи и кодекси на однесување за справување со ризиците од генеративната вештачка интелигенција и „ќе промовираат соработка за да се осигураат дека луѓето ширум светот можат да имаат корист од употребата на безбедна и сигурна вештачка интелигенција“, нагласи тој.

Европската унија, САД, Кина и многу други нации се тркаат да развијат регулативи и форми на надзор за вештачката интелигенција, додека глобалните тела, како што се Обединетите нации, се борат да ги надгледуваат.