УКРАИНЦИТЕ НАЈДОА НАЧИН ДА БИДАТ НЕВИДЛИВИ Нано-наметка ги крие на термалните камери

Неименуван украински научник, наводно, развил нов материјал кој може да ги маскира топлинските потписи на војниците и опремата од руските дронови, пренесува Интересно инженерство. „Фантомската кожа“ ја развил жител на Буча, како одговор на крвавите настани кои се случија во ова место во војната.

Пронаоѓачот сакал да остане анонимен, но неговата нова наметка, наводно, веќе се користи на фронтот против сензорите на квадкоптерите. Корисно е и ако војниците сакаат да се скријат од снајпер.

„Наметката“ е изработена од црн пластифициран материјал, со надворешна текстура слична на церада за кампување. Оваа фантомка може да спречи емисија на топлински сигнали од луѓе или воена опрема, што ги прави невидливи за инфрацрвените или термичките сензори.

Се смета дека освен графен наметката содржи и нанотехнолошки соединенија. Точниот состав на материјалот не е познат. Научникот имал помош од украинската воена компанија „Spets Techno Expert (STE)“.

– Имаше случаи на користење на „фантомската кожа“ не само за наменетата цел, како што е маскирање на војниците, туку и како покритие за ранетите војници за да ги заштити од „севидното“ око на камерите за ноќно гледање инсталирани на дронови пред евакуацијата од бојното поле. Благодарноста на ранетите воини спасени со помош на Phantom Skin е особено вредна – објасни за „inews“ портпарол од компанијата.

Минатиот месец „фантомската кожа“ беше прикажана на настанот во Лондон за меѓународна одбрана и безбедносна опрема. Компанијата не открила дали примила нарачки од други армии во светот за оваа наметка.