Секторот за сообраќајни работи при Министерството за внатрешни работи вчера од 8 до 13 часот на целата територија на државата спроведе зајакнати акциски контроли над автобуси и други возила со кои се врши јавен превоз на патници.

„При спроведените контроли контролирани се вкупно 405 автобуси и други возила со кои се врши јавен превоз на патници, при што кај 92 возила се констатирани неправилности.

Во рамки на контролите, на технички преглед биле упатени 170 возила, додека 34 се исклучени од сообраќај поради утврдени неисправности.

За сите констатирани прекршоци преземени се соодветни мерки согласно законските прописи.

Во текот на контролите поднесени се и три кривични пријави согласно член 297-а од Кривичниот законик, а едно возило е одземено согласно член 300-б.

Констатирани се и 239 прекршоци од друг вид.

Министерството за внатрешни работи продолжува со спроведување на зајакнати сообраќајни контроли, со цел обезбедување повисоко ниво на безбедност и сигурност при јавниот превоз на патници“ – се вели во соопштението на МВР.

The post 170 ВОЗИЛА ИСПРАТЕНИ НА ТЕХНИЧКИ, 34 ИСКЛУЧЕНИ ОД СООБРАЌАЈ Акциска контрола на МВР утврди многу неправилности кај возилата appeared first on plusinfo.mk.

Јавен обвинител од Основното јавно обвинителство за гонење организиран криминал и корупција до Основниот кривичен суд Скопје денеска поднесе Обвинителен акт против едно лице за кривично дело – Загрозување лица под меѓународна заштита.

„На обвинетиот му се става на товар дека на 15 јуни годинава, околу 12:05 часот, пред Амбасадата на Република Бугарија во Скопје, со предизвикување пожар создал значителна опасност за животот и телото на лица под меѓународноправна заштита“ – соопшти Обвинителството.

Според дејствијата опишани во обвинението, обвинетиот претходно на бензинска пумпа во непосредна близина на Амбасадата наполнил пластично шише со бензин и се упатил кон објектот. Откако се доближил до паркираните возила што ги користеле военото аташе на Република Бугарија и други вработени во Амбасадата, ги полеал со бензинот и ги запалил, по што веднаш го напуштил местото на настанот.

Заедно со Обвинителниот акт, јавниот обвинител до судот достави и предлог за продолжување на претходно определената мерка притвор, оценувајќи дека и натаму постојат причините поради кои мерката била определена и продолжувана.

Според обвинителството, околностите укажуваат на опасност обвинетиот да стане недостапен за органите на прогонот и со тоа да го попречи водењето на кривичната постапка. При предлагањето на мерката предвид се земени и висината на казната пропишана за кривичното дело, како и природата на дејствијата што му се ставаат на товар, насочени кон сигурноста и правата на лица под меѓународноправна заштита, вклучително и дипломатски претставници.

Согласно одредбите од Кривичниот законик, за кривичното дело што му се става на товар на обвинетиот е пропишана казна затвор од најмалку една година.

ПОТПАЛИЛ ДВЕ ВОЗИЛА НА БУГАРСКАТА АМБАСАДА И ПОБЕГНАЛ Полицијата трага по млад скопјанец

The post ПОДНЕСЕНО ОБВИНЕНИЕ ЗА ПАЛЕЊЕТО ВОЗИЛА ПРЕД БУГАРСКАТА АМБАСАДА На обвинетиот му се заканува една година затвор appeared first on plusinfo.mk.

Националниот парк Шар Планина апелира до сите кои со возила поминуваат низ планината да внимаваат при возењето да не креваат прашина.

„Во овие летни денови земјаните патишта се исклучително суви, а движењето со поголема брзина создава големи облаци прашина. Прашината не е само непријатност – ситните честички што се креваат од сувите патишта се вдишуваат и можат да предизвикаат иритација на дишните патишта, кашлица и отежнато дишење. При пешачење и друга физичка активност дишеме подлабоко и почесто, поради што изложеноста на прашина е уште поголема“, објаснуваат од НП Шар Планина.

Затоа апелираат до сите возачи: Намалете ја брзината кога поминувате покрај пешаци и велосипедисти, не турирајте и не забрзувајте непотребно – со тоа дополнително се крева прашина, се создава бучава и се вознемирува дивиот свет, движете се исклучиво по дозволените патишта и не излегувајте со возила надвор од нив.

„Кога ќе сретнете планинари, велосипедисти или други посетители, забавете и поминете внимателно и со почит. Едно мало намалување на брзината значи многу за човекот кој пешачи зад вас. Да покажеме почит едни кон други и кон природата. Планината е за сите – да ја чуваме и да уживаме во неа одговорно“, порачуваат од НП Шар Планина.

The post 🎥 НЕ КРЕВАЈТЕ ПРАШИНА АКО СЕ ДВИЖИТЕ СО ВОЗИЛА НИЗ ШАР ПЛАНИНА! Прашината им штети на планинарите, а брзината ги вознемирува животните appeared first on plusinfo.mk.

Шест паркирани возила беа оштетени во пожар што денеска попладне избувна кај паркингот во близина на Автобуската станица во Велес, а поголема материјална штета е избегната благодарение на брзата интервенција на Територијалната противпожарна единица (ТППЕ) Велес.

Дојавата во ТППЕ Велес била примена во 13:45 часот за запалено патничко моторно возило. По пристигнувањето на терен, пожарникарите утврдиле дека горела сува трева меѓу патот и паркингот, при што огнот зафатил и оштетил минимално шест возила.

На интервенцијата излегле едно противпожарно возило и тројца пожарникари. Со брзото дејствување тие успеале да го локализираат пожарот и да спречат негово проширување кон останатите возила.

Од ТППЕ Велес повторно упатија апел до граѓаните да не палат оган на отворен простор, особено во услови на високи температури и сув вегетациски материјал.

Велешките пожарникари на својата фејсбук страна дополнително ги предупредија земјоделците од општините Велес, Чашка и Градско да не палат стрништа, а граѓаните да не палат сува трева, посочувајќи дека ваквите постапки во изминатиот период предизвикале повеќе пожари со последици по животната средина и објекти.

The post ШЕСТ ВОЗИЛА ЗАФАТЕНИ ОД ПОЖАР ВО БЛИЗИНА НА ВЕЛЕШКАТА АВТОБУСКА СТАНИЦА Се запалила сува трева покрај паркингот appeared first on plusinfo.mk.

Владата најостро го осудува вандалскиот и недозволив чин на опожарување на возила со дипломатски статус во непосредна близина на Амбасадата на Република Бугарија во Скопје.

„Ваквите постапки претставуваат напад врз принципите на безбедноста, дипломатските односи и меѓународното право и не смеат да имаат место во демократска држава.

Надлежните институции веќе преземаат интензивни мерки за целосно расчистување на случајот и откривање на сторителите. Како Влада сакаме да испратиме јасна порака дека секој обид за предизвикување тензии, ширење омраза или нарушување на безбедноста ќе биде максимално санкциониран.

Државата има капацитет и ќе одговори со целосна сила на институциите и нема да дозволиме поединци да ја нарушуваат репутацијата на Македонија. Очекуваме брза и ефикасна истрага, целосно расветлување на настанот и соодветна кривична одговорност за сторителите.

Владата останува цврсто посветена на заштитата на сите граѓани и дипломатски мисии во земјата и на зачувувањето на стабилноста, безбедноста и добрососедските односи“ – се вели во соопштението на Владата.

The post ВЛАДАТА ГО ОСУДИ ОПОЖАРУВАЊЕТО ВОЗИЛА НА БУГАРСКАТА АМБАСАДА За вакви постапки нема место во демократска држава appeared first on plusinfo.mk.

Припадници на МВР се во активна потрага по непознатиот напаѓач, кој денеска среде бел ден подметнал пожар на возила на бугарската Амбасада во центарот на Скопје, објави Вечер.мк.

Имено, младиот човек, според информации на порталот, полил и запалил едно возило „сузуки витара“, а пожарот го зафатил и соседното возило, сопственост на Амбасадата на Република Бугарија во Македонија, по што се дал во бегство.

Однот бил за кратко врееме угаснат од вработените во обезбаедувањето на Амбасадата и обезбедувањето.

Силни полициски екипи го обезбедуваат просторот околу Бугарската амбасада во центарот на Скопје, додека други полициски единици и безбедносни органи се во потера по подметнувачот на пожарот.

The post ПОТПАЛИЛ ДВЕ ВОЗИЛА НА БУГАРСКАТА АМБАСАДА И ПОБЕГНАЛ Полицијата трага по млад скопјанец appeared first on plusinfo.mk.

Македонските возила за урбана хигиена „Грин машинс“, кои се произведуваат во БРАКО во Велес, деновиве привлекоа големо внимание во Германија на светскиот саем ИФАТ — водечки меѓународен саем за технологии за животна средина, комунална опрема и одржлива урбана инфраструктура.

Рамо до рамо со конкуренцијата од Швајцарија, Франција, Италија, Германија, Соединетите Американски Држави и други земји производители во оваа индустрија, македонската компанија ги презентираше своите најсовремени решенија за одржување на урбаната хигиена.

Од „Грин машинс“ велат дека клиентите денес бараат возила со различни типови на погон — електрични, дизел и водородни, а македонскиот производител нуди комплетна палета на решенија.

Дури 98 проценти од производството на БРАКО и „Грин машинс“ се пласира надвор од државата, во повеќе од 60 земји низ светот. Последната голема испорака беше реализирана во Саудиска Арабија, поточно во главниот град Ријад, каде беа испорачани 52 возила за одржување на урбаната хигиена.

„Грин машинс Македонија“ има свои компании-ќерки во Обединетото Кралство, Холандија и во Соединетите Американски Држави.

Изминатата недела „Грин машинс“ истовремено ги изложи своите машини на три светски настани, во Минхен, во Лас Вегас и во Ливерпул.

The post БРАКО И „ГРИН МАШИНС“ НА СВЕТСКИОТ САЕМ ИФАТ ВО МИНХЕН Македонската компанија нуди електрични, дизел и водородни возила appeared first on plusinfo.mk.

Службата за општи и заеднички работи (СОЗР) веќе легализирала и добила имотни листови за државните вили на Водно (две претседателски и една премиерска), како и за 4 вели во Охрид (претседателска и премиерска, и двете сместени во Свети Стефан), соопшти денеска директорот на Службата за општи и заеднички работи Ивица Томовски коментртирајќи го ревизорскиот извештај за ланската година кој го оцени како делумно точен.

Тој додаде дека е почната легализација и на останатиот имот со кој располага Службата.

– Ќе се формира и работна група која ќе работи на оваа проблематика и се надевам дека за брзо време ќе го решиме и тој проблем. Она што го имаме ќе знаеме дека го имаме, а она што го нема, ќе го нема – вели Томовски.

Тој не коментираше за големите залихи на стоки бидејќи Бирото за јавна безбедност во МВР води постапка за тоа по што заедно ќе излезат со соопштение.

Томовски тврди дека сите бифиња со кои управува Службата поседуваат фискални каси и дневно го регистрираат прометот.

– Затекнавме бифиња без фискални каси и прво што направивме беше да набавиме вакви каси. Сега регистрацијата на прометот е 300% повисока од порано – рече Томовски.

Во однос на забелешката на ревизорите за стариот возен парк и лизингот на возила во Службата, Томоски рече дека Службата располага со 45 нови возила на лизинг и 220 стари возила од кои над 104 веќе се расходувани, но поголем број и од другите се за расходување. Дел од нив се користат за организирање настани.

Томовски смета дека треба да се размисли за набавка на нов блиндиран „мерцедес“ кој ќе ги задоволува критериумите за превоз на високи функционери, бидејќи, како што рече, оној што го поседува Службата е стар иако го користела претходната влада, а дел од функционерите од претходната влада на ВМРО-ДПМНЕ за тоа судски одговарале.

Томовски рече дека овој „мерцедес“ не ги исполнува современите критериуми за безбедност и можеби треба да се набави ново блиндирано возило.

– На пример, при посетата на унгарскиот премиер Виктор Орбан на Охрид тој донесе сопствено блиндирано возило бидејќи ние немаме такво кое ги задоволува безбедносните протоколи – рече Томовски.

Томовски смета дека државата треба да набави и нов авион.

– Имаме премал авион кој често е на поправки. Размислуваме за набавка на поголем авион кој ќе може да се користи и за медицински превоз односно ќе биде со вградена медицинска опрема – рече Томовски.

Томовски тврди и дека сега во Службата има само двајца или тројца вработени преку агенција за привремени вработувања и најави нивно вработување на определно време.

Ревизорите во последниот извештај регистрираа повеќе пропусти во финансиското работење на Службата за општи и заеднички работи за 2024 година.

БИФЕТО ВО ВЛАДАТА НЕРЕДОВНО ИЗДАВАЛО ФИСКАЛНИ СМЕТКИ ВО 2024 ГОДИНА Ревизорите утврдиле дека владината служба била неажурна околу државниот имот

The post ДРЖАВАТА ДОБИ ИМОТНИ ЛИСТОВИ ЗА 7 ВИЛИ ВО СКОПЈЕ И ВО ОХРИД Томовски смета дека е време Владата да купи нов блиндиран „мерцедес“ и нов авион appeared first on plusinfo.mk.

Само во текот на вчерашниот ден полициски службеници при контроли во сообраќајот во повеќе македонски градови и села откриле 11 возачи, кои управувале возила без возачка дозвола или со активна забрана за управување моторно возило. Од нив двајца се малолетници, а по насока на јавен обвинител, на сите им се одземени возилата, и против нив ќе бидат поднесени соодветни кривични пријави, информира МВР на својата страница на Фејсбук.

На 05.02.2026 во 16:00 часот на ул.„Таше Милошевски” во Ресен, полициски службеници од ОВР Ресен го лишиле од слобода Д.К.(27) од с.Јанковец, ресенско. При контрола во сообраќајот, полициските службеници сопреле патничко возило „рено” со ресенски регистарски ознаки, управувано од Д.К., при што констатирале дека го управувал возилото без да се стекне со право за управување, односно без важечка возачка дозвола. Возилото било одземено.

На 05.02.2026 во 12:00 часот на регионалниот пат Прилеп-Македонски Брод, кај с.Ропотово, прилепско, полициски службеници од Полициското одделение Ропотово го лишиле од слобода И.Н.(28) од с.Гостиражни, општина Долнени. При контрола во сообраќајот, полициските службеници сопреле патничко возило „фолксваген голф” со прилепски регистарски ознаки, управувано од И.Н., при што констатираче дека го управувал возилото пред да се стекне со право за управување, односно без возачка дозвола. Возилото било одземено.

На 05.02.2026 во 19:30 часот на патот Ресен-с.Евла, ресенско, полициски службеници од ОВР Ресен лишиле од слобода 15- годишник од Штип. При контрола во сообраќајот, полициските службеници сопреле патничко возило „мазда” со ресенски регистарски ознаки, управувано од малолетникот, при што констатирале дека го управувал возилото без да се стекне со право за управување, односно без возачка дозвола. Возилото било одземено.

На 05.02.2026 во 16:45 часот на магистѕралниот пат Гостивар-Стража, полициски службеници од ОВР Гостивар го лишиле од слобода Ф.А.(24) од с.Чегране, гостиварско. При контрола во сообраќајот, полициски службеници запреле патничко возило „ауди“ со гостиварски регистарски ознаки, управувано од Ф.А и по извршени проверки е констатирано дека го управувал возилото без положен возачки испит. Возилото било одземено.

На 05.02.2026 во 14:30 часот на кеј „Димитар Влахов“ во Скопје, полициски службеници од СВР Скопје го лишиле од слобода Б.С.(23). При контрола во сообраќајот, полициски службеници запреле патничко возило „фолксваген поло“ со скопски регистарски ознаки, управувано од Б.С. и по извршени проверки било констатирано дека го управувал возилото без да поседува важечка возачка дозвола, односно без положен возачки испит.

На 05.02.2026 во 16:25 часот на регионален пат кај крстосница за село Ѓавато, гевгелиско, полициски службеници од СВР Струмица сопреле патничко возило „форд фокус“ со гевгелиски регистарски ознаки, управувано од А.З.(19) од Богданци. Притоа, било констатирано дека го управувал возилото без да поседува важечка возачка дозвола. По добиени насоки на јавен обвинител, возилото и возачките документи биле одземени.

На 05.02.2026 во 14:50 часот на локалниот пат с.Пиперево – с.Василево, полициски службеници од СВР Струмица сопреле патничко возило „фолксваген голф“ со струмички регистарски ознаки, управувано од 17-годишник од с.Пиперово, општина Василево. Притоа, било констатирано дека го управувал возилото без да поседува важечка возачка дозвола. По добиени насоки на јавен обвинител, возилото и возачките документи се одземени.

На 05.02.2026 во 19:00 часот на ул.„Цветан Димов“ во Струмица, полициски службеници од СВР Струмица сопреле товарно возило „мерцедес“ со струмички регистарски ознаки, управувано од К.П.(33) од с.Баница, струмичко. Притоа, било констатирано дека го управувал возилото без да поседува важечка возачка дозвола. По добиени насоки на јавен обвинител, возилото и возачките документи се одземени.

На 05.02.2026 во 10:15 часот на улица „Западен булевар“ во Кавадарци, полициски службеници од ОВР Кавадарци го лишиле од слобода Ш.Ј.(42) од Кавадарци. При контрола во сообраќајот било сопрено патничко возило „опел“ со кавадаречки регистарски ознаки, кое го управувал Ш.Ј., при што било констатирано дека возилото го управувал без положен возачки испит за управување на возило од Б категорија. Тој бил приведен во полициска станица, а возилото било привремено одземено.

На 05.02.2026 во 13:45 часот на улица „Народен Фронт“ во Кавадарци, полициски службеници од ОВР Кавадарци го лишиле од слобода Ј.В.(32) од Кавадарци. При контрола во сообраќајот било сопрено патничко возило „опел“ со охридски регистарски ознаки, кое го управувал Ј.В., при што било констатирано дека возилото го управувал без положен возачки испит за управување на возило од Б категорија. Тој бил приведен во полициска станица, а возилото било привремено одземено.

На 05.02.2026 околу 09:25 часот на регионален пат во с.Драслајца, струшко, полициски службеници од ОВР Струга сопреле патничко возило „фолксваген голф“ со струшки регистарски ознаки, управувано од Д.С.(32) од с.Корошишта, струшко. Притоа, било констатирано дека го управувал возилото со активна забрана за управување со моторно возило од Б категорија. По добиени насоки на јавен обвинител, возилото и возачките документи се одземени.

По целосно документирање на настаните, против лицата ќе бидат поднесени соодветни пријави.

The post ВО ЕДЕН ДЕН ФАТЕНИ УШТЕ 11 ШТО ВОЗЕЛЕ БЕЗ ВОЗАЧКА ДОЗВОЛА Возилата им се одземени appeared first on plusinfo.mk.

Kамерите на „Сејф сити“ поставени на скопските раскрсници, од утре, 1 декември, автоматски ќе регистрираат сообраќајни прекршоци. Министерството за внатрешни работи стартува со системот „Безбеден град, безбедна држава“. До Нова Година е пробниот период, додека од 1 јануари системот треба да стигнуваат и првите казни.

– Сторителите на прекршоци кои ќе бидат документирани преку системот Безбеден град ќе бидат санкционирани согласно одредба која ја регулира најголемата дозволена брзина на движење на возилата, односно нема да има толеранција без разлика дали ќе се документира прекршок во населено место или надвор од населено место – вели Гоце Андреевски, портпарол на МВР.

Секој сопственик на возило чие прекршување ќе биде документирано, ќе добие СМС и мејл известување со линк, на кој ќе може да преземе записник и платен налог. Од моментот на приемот, тече рок од осум дена за плаќање половина казна. По истекот, износот мора да се плати целосно во следните осум дена, пред да започне постапката за присилна наплата.

Казните ќе може да се плаќаат и електронски, а системот веднаш ќе го известува МВР дека глобата е платена. Од МВР појаснуваат дека санкционирањето ќе биде согласно Законот за безбедност на сообраќајот на патиштата кој, со последните измени, дозволува документирање на прекршоците со камери, без толеранција и секаде каде што ќе се снима – во град или на автопат.

– Во почетниот период ќе се евидентираат сообраќајните прекршоци како: управување на возило со брзина поголема дозволената, минување на црвено светло, изминат рок на важност на сообраќајна дозвола и непрописно паркирани возила, а во следната фаза од проектот планирано е проширување на видот на сообраќајните прекршоци што ќе ги регистрира електронскиот систем – вели Андреевски.

Последните неколку години граѓаните беа сведоци на серија фатални прегазувања на пешаци и тоа најачесто на пешачки премин, од возачи кои возат неколкупати побрзо од дозволеното. Дополнителен проблем е паркирањето на непрописни места и блокирање на тротоарите и велосипедските патеки.

Пред 3 месеци министерот за внатрешни работи Панче Тошковски најави дека на почетокот, со камери ќе бидат покриени Скопје, Тетово и Куманово, но и автопатите и експресните патишта долж коридорите „8“ и „10“.

Се очекува до средината на наредната година да биде покриена целата територија на државава.

Технологијата ќе нема милост кон прекршителите, а целта е поуреден и побезбеден сообраќај.

Дали камерите ќе ги вразумат возачите, ќе се види веќе во првите недели од системот, кој од утре почнува да снима и да предупредува, а од нова година и да казнува.

The post ВНИМАВАЈТЕ, КАМЕРИТЕ НА „СЕЈФ СИТИ“ ЌЕ БИДАТ ВКЛУЧЕНИ До Нова Година пробно, вгодина следуваат и казни appeared first on plusinfo.mk.