Американскиот Стејт департмент отвори истрага против амбасадорката на САД во Грција, Кимберли Гилфојл, по низа наводи за нејзиното однесување за време на мандатот.

Според британскиот весник „Daily Mail“, вработените во амбасадата го опишале нејзиниот мандат како „чиста тиранија“. Весникот наведува дека 57-годишната Гилфојл, истакната фигура во движењето „MAGA“, го деградирала еден од припадниците на обезбедувањето затоа што не ѝ донел мраз за пијалак во четири часот наутро на Миконос.

Стејт департментот сега ги разгледува поплаките против неа, по минатонеделните откритија за нејзините наводно екстравагантни барања. Меѓу нив, според пишувањата на медиумот, имало барања за бесплатни оброци, врвни вина и изградба на кошаркарски терен во вредност од 58.000 долари во нејзината резиденција во Атина.

Извори на „Daily Mail“ тврдат дека Канцеларијата на генералниот инспектор води истрага против неа поради „можна злоупотреба на опојни супстанции, користење приватни авиони и хеликоптери, блиски врски со енергетска и градежна компанија, несоодветно прифаќање подароци и други прашања“.

Наводи за малтретирање и закани

Извори од Грција изјавиле дека ситуацијата во Атина станала неиздржлива, иако Гилфојл е на функцијата помалку од една година.

– Кога ќе се насоберат доволно поплаки, се отвора истрага. Така функционира системот. Да се надеваме дека ова ќе ѝ послужи како еден вид отрезнување – изјавил за британскиот таблоид извор близок до амбасадата.

Вработените во амбасадата тврдат дека живеат во страв од отказ, додека амбасадорката, поранешна водителка на телевизијата „Fox News“, наводно уживала покрај Егејското Море.

Според наводите, таа пристигнала во Атина со приватен авион на еден милијардер уште на првиот работен ден. Извори на „Daily Mail“ тврдат дека Гилфојл повеќепати им се заканувала на вработените, велејќи им: „Направете го тоа, до ѓавола, или добивате отказ!“

Се чини дека некои од заканите ги спровела во дело. „Daily Mail“ објавува дека таа деградирала двајца свои возачи, Петрос и Димитрис, бидејќи не ѝ се допаѓал начинот на кој свртувале „налево“.

Иако возачите поминале обука во САД, повеќе не им било дозволено да ја возат амбасадорката.

Според изворите, во друг инцидент таа го деградирала и шефот на обезбедувањето затоа што не ѝ одговорил на повикот во четири часот наутро. Наводно, сакала тој да ѝ донесе мраз. Како што пишува весникот, наредбата му ја издала додека пиела алкохол на Миконос.

– Гилфојл пиела во четири часот наутро и му се јавила на Василис, припадник на обезбедувањето кој веќе е дедо. Се разбира, тој спиел и не се јавил. Следниот ден го деградирала – изјавил изворот.

Однесувањето на амбасадорката наводно станало толку сериозен проблем што се вмешала и грчката полиција, откако вработените пријавиле „вербално малтретирање“, пишува британскиот таблоид.

Дополнителни обвинувања и прашања за нејзината способност да ја извршува функцијата

Проблемите за Гилфојл продолжиле во средата вечерта, кога „The Wall Street Journal“ објави текст во кој се тврди дека таа побарала од донатор на движењето „MAGA“ да ја плати нејзината сметка од 100.000 долари на кредитната картичка „American Express“.

За возврат, наводно му понудила влијание и пристап до луѓе од опкружувањето на претседателот Доналд Трамп.

Иако, според наводите, нејзиниот персонал не бил доволно ангажиран, Гилфојл во јули била забележана во ексклузивниот клуб „Nammos“ на Миконос, а истиот месец присуствувала и на Неделата на модата во Париз.

За амбасадорка на САД во Грција била именувана кратко откако во 2024 година ја раскинала свршувачката со Доналд Трамп Помладиот, најстариот син на американскиот претседател.

Нејзиното однесување, вклучително и дружењето со лобистот од енергетскиот сектор Христос Марафатсос, предизвикало прашања во администрацијата на Трамп за нејзината способност да ја извршува амбасадорската функција во земја која е важен сојузник на САД.

– Прашањето е уште колку долго може да трае ова. Во кој момент претседателот ќе ја разгледа целата ситуација и ќе заклучи дека вака едноставно повеќе не може? – изјавил за „Daily Mail“ извор близок до Трамп.

„МОЖЕМЕ ДА ЈА СОБОРИМЕ КОЈА БИЛО ВЛАДА НА БАЛКАНОТ И ДА СОЗДАДЕМЕ ПОЛИТИЧКА КРИЗА“ Шокантни наводи за зборовите на амбасадорката на Трамп во Грција

The post СКАНДАЛ ВО АМЕРИКАНСКАТА АМБАСАДА ВО АТИНА Амбасадорката Гилфојл под истрага за закани и малтретирање appeared first on plusinfo.mk.

Соединетите Американски Држави ја почитуваат пресудата со која поранешниот претседател на Косово Хашим Тачи и уште тројца поранешни водачи на Ослободителната војска на Косово (ОВК) се прогласени за виновни за воени злосторства. Вашингтон истовремено ги повика сите страни да ја почитуваат судската одлука и да избегнуваат запалива реторика.

– Ја почитуваме денешната пресуда на Специјализираните совети на Косово – изјави портпарол на американскиот Стејт департмент за Радио Слободна Европа.

Од Стејт департментот порачаа дека САД ја поддржуваат правдата за сите жртви и нивните семејства, како и одговорноста, правичната судска постапка и владеењето на правото.

Вашингтон испрати и порака до политичките и општествените актери по пресудата.

„Ги повикуваме сите страни да ја почитуваат одлуката на судот, да избегнуваат запалива реторика и да продолжат да работат кон мирна и демократска иднина“, соопшти Стејт департментот.

Специјализираните совети на Косово во Хаг на 16 септември ги прогласија Тачи, Кадри Весели, Реџеп Селими и Јакуп Красниќи за виновни за четири воени злосторства: незаконско или произволно лишување од слобода, сурово постапување, тортура и убиство. Судот утврди кривична одговорност за дела врз 385 незаконски притворени лица, 49 жртви на сурово постапување, 303 жртви на тортура и 96 убиени.

Четворицата, пак, беа ослободени од обвиненијата за злосторства против човештвото, бидејќи Судскиот совет оцени дека обвинителството не докажало надвор од разумно сомнение дека постоел широк или систематски напад насочен против цивилното население.

Тачи и Красниќи добија по 25 години затвор, Весели 18, а Селими 13 години. Во казните ќе им биде пресметано времето што веќе го поминале во притвор.

The post САД ПО ПРЕСУДАТА ЗА ТАЧИ И ВОДАЧИТЕ НА ОВК „Почитувајте ја одлуката на судот и избегнувајте запалива реторика“ appeared first on plusinfo.mk.

Премиерот Христијан Мицкоски утре заминува со владина делегација во САД, каде што најави средби на високо ниво во Сенатот, Конгресот и Стејт департментот, но и конкретни разговори за нови инвестиции во енергетиката, напредната технологија и воената индустрија.

Во гостувањето во Дневникот на МТВ, Мицкоски рече дека во Вашингтон ќе разговара и со високи претставници на американската финансиска институција DFC. Таа веќе е присутна во земјава преку инвестицијата во проектот „Крстодол“, познат во јавноста и како „Антимон“.

– Има од нивна страна пројавено интерес и за други проекти во делот на енергетиката и напредната технологија, така што сакам подлабоко да ги понудиме нашите капацитети – рече Мицкоски.

Дел од разговорите ќе бидат насочени и кон компании од воената индустрија што Владата сака да ги привлече да инвестираат во Македонија. Во тој контекст, Мицкоски го спомена и армискиот полигон Криволак.

– Во фаза сме на изработка на нов закон со Министерството за одбрана, да го понудиме нашиот тренинг-полигон Криволак – рече премиерот.

Според него, привлекувањето компании од оваа индустрија и користењето на капацитетите на Криволак би можеле да придонесат за побрз и подинамичен економски раст.

Во Вашингтон се предвидени и средби со влијателни тинк-тенк организации, по што владината делегација ќе замине за Њујорк.

Таму Мицкоски ќе учествува на годинашното Генерално собрание на Обединетите нации и најави повеќе веќе потврдени средби со државници. Фокусот ќе биде и на соседството, но премиерот најави обид за билатерални разговори со земјите од Заливот.

– Ќе се обидеме да имаме билатерални средби и со земји од Заливот, каде што цениме дека треба да градиме добри и солидни партнерски врски – рече Мицкоски.

Предвиден е и прием организиран од претседателот на САД. До овој момент, пак, не е планирана посебна средба со бугарската делегација.

Мицкоски потврди дека ќе има и состанок на лидерите од Западен Балкан што во Њујорк го организира делегацијата на Европската Унија. Дали лично ќе учествува ќе зависи од нивото на состанокот – ако е на ниво на шефови на држави и влади ќе присуствува тој, а ако е на министерско ниво, Македонија ќе ја претставува министерот за надворешни работи.

Прашан каков ќе биде македонскиот став на тие разговори во однос на бугарските услови за уставните измени и барањето гаранции, Мицкоски рече дека Владата нема да ја менува досегашната позиција.

– Ние ставовите не ги менуваме инстант или преку ноќ. Не правиме такви естрадни потези, водиме јасна политика која нуди гаранции на подолг рок – рече Мицкоски.

The post МИЦКОСКИ НАЈАВИ СРЕДБИ НА ВИСОКО НИВО ВО ВАШИНГТОН Ќе бара инвестиции во енергетиката и воената индустрија, ќе го понуди и Криволак appeared first on plusinfo.mk.

Иднината на српската економија зависи од политичките одлуки денес, предупреди Стејт департментот на САД, по повод зближувањето меѓу Белград и Пекинг во областа на вештачката интелигенција, а ЕУ соопшти дека поблиската поврзаност на Србија со кинеските технологии го комплицира усогласувањето со барањата на Брисел на европскиот пат, објави Радио Слободна Европа.

Според медиумот, Стејт департментот не сака директно да коментира за зближувањето меѓу официјален Белград и Пекинг во областа на вештачката интелигенција, но истакнува дека е очигледно која страна треба да се поддржи.

„САД ја охрабруваат Србија да го развие својот целосен потенцијал и да ја обезбеди својата национална безбедност со избирање сигурни извори и добавувачи на опрема и технологија за вештачка интелигенција, како и со избирање сигурни партнери како САД“, се вели во одговорот до РСЕ.

Од Стејт департментот потсетуваат дека САД се предводници во технологијата за вештачка интелигенција и дека тоа е златен стандард за технологија која е „одговорно развиена, заснована на транспарентност и ослободена од идеолошки предрасуди и манипулации наметнати од властите“.

„Кога земјите ги усвојуваат американските системи за вештачка интелигенција, тие не купуваат само инфраструктура како потрошувачи, тие отклучуваат иновативни можности за своите економии и граѓани“, се вели во одговорот од Стејт департментот.

Во исто време, Европската комисија потсетува дека усогласувањето со правилата на Европската Унија во областа на вештачката интелигенција е дел од поширокиот процес на европска интеграција.

– Како дел од процесот на пристапување, Србија се обврза да го усогласи своето законодавство со овие регулативи – изјави портпаролот на ЕК.

Од Институтот на ЕУ за безбедносни студии велат дека подлабоката интеграција со кинеските технолошки екосистеми може да го комплицира последователното усогласување со барањата на Брисел на европскиот пат.

Во мај, во присуство на претседателите на државите Александар Вучиќ и Си Џинпинг, во Пекинг беше потпишан меморандум за соработка меѓу двете земји во областа на вештачката интелигенција.

Два месеци подоцна, во јули, во Шангај, претставници на 29 земји, вклучувајќи ја и Србија, потпишаа договор за основање на Светската организација за соработка во областа на вештачката интелигенција. Од европските земји, само Русија и Белорусија се потписнички.

На почетокот на 2025 година, Владата на Србија усвои нова Стратегија за развој на вештачката интелигенција до 2030 година, која предвидува дополнителни инвестиции во истражување, компјутерска инфраструктура и примена на системи за вештачка интелигенција во јавниот сектор.

The post САД САКААТ СРБИЈА ДА СОРАБОТУВА СО НИВ ЗА ВЕШТАЧКАТА ИНТЕЛИГЕНЦИЈА Реакција на Стејт департментот за зближувањето на Белград и Пекинг appeared first on plusinfo.mk.

Американскиот државен секретар Марко Рубио упати честитка по повод Денот на независноста на Македонија.

„Во име на американскиот народ, упатувам најтопли честитки до народот на Северна Македонија, додека славите 35 години независност. Соединетите Американски Држави се горди што стојат покрај Северна Македонија како доверлив сојузник и партнер. Северна Македонија игра важна улога во зајакнувањето на безбедноста и стабилноста низ целиот регион преку нејзината посветеност на нашата заедничка одбрана и соработка во борбата против тероризмот и напорите за сајбер безбедност“, се наведува во честитката од Рубио објавена на веб страницата на Стејт департментот.

Американскиот државен секретар го поздравува континуираниот раст на економското партнерство, вклучително и преку овогодишниот Стратешки дијалог во Вашингтон.

„Заедно, ги унапредуваме можностите во енергетиката, инфраструктурата, технологијата и другите сектори за зајакнување на просперитетот во двете наши земји. Ви посакуваме радосен Ден на независноста и континуиран мир, безбедност и просперитет во годините што доаѓаат“, порача Рубио.

Честитка по повод 8 Септември, Денот на независноста, упати и Амбасадата на САД во Скопје.

The post САД СЕ ГОРДИ ШТО СТОЈАТ ДО СЕВЕРНА МАКЕДОНИЈА КАКО ДОВЕРЛИВ СОЈУЗНИК И ПАРТНЕР Честика од Рубио за Денот на независноста appeared first on plusinfo.mk.

Администрацијата на претседателот на САД, Доналд Трамп, привремено ги суспендира термините за поднесување барања за визи ширум светот, во рамки на заострувањето на имиграциската политика.

Портпаролот на Стејт департментот изјави дека е покрената глобална програма за обука во сите американски амбасади и конзулати и дека термините за визни услуги ќе бидат приспособени за да се овозможи нејзино спроведување.

Трамп спроведува опсежна кампања за депортација и заострување на имиграциската политика, која вклучува укинување на визи и зелени карти, како и одбивање на барањата поради низа причини, меѓу кои се политички ставови и учество во пропалестински протести.

Трамп тврди дека целта на тие мерки е подобрување на внатрешната безбедност, но неговата политика претрпе неколку правни порази. Американски сојузен судија во петокот ја поништи политиката на администрацијата на Трамп со која беше прекинато издавањето имигрантски визи за баратели од 75 земји, заклучувајќи дека со неа е пречекорена законската овластеност на државниот секретар Марко Рубио.

Стејт департментот не изнесе детали за содржината ниту за времетраењето на обуката. Соопшти само дека нејзината цел е да им помогне на конзуларните службеници да ги препознаат и одбијат барателите за кои се смета дека би можеле да станат зависни од американските социјални надоместоци, како и да се осигура дека сите барања за визи се проценуваат „сеопфатно и доследно“.

„Фајненшал тајмс“ прв извести за суспендирањето на термините. Според весникот, барателите на имигрантски визи кои веќе имале закажано интервјуа во американските амбасади и конзулати добиле електронски пораки во кои се известуваат дека нивните термини се одложуваат и дека дополнително ќе добијат нов датум.

Бројни организации за заштита на човековите права ја осудија имиграциската политика на Трамп, нарекувајќи ја дискриминаторска и тврдејќи дека го крши правото на слобода на говор и правична постапка. Тие исто така предупредуваат дека таа создала несигурна средина во САД, посебно за припадниците на етничките малцинства кои изразуваат загриженост поради расно профилирање.

The post ТРАМП ГИ СТАВИ ВИЗИТЕ НА ПАУЗА Амбасадите низ светот презакажуваат термини appeared first on plusinfo.mk.

САД го одобрија планот да му продадат на Катар авиони за полнење гориво во воздух во вредност од над 4,5 милијарди долари, соопшти Стејт департментот.

Катар побара до четири авиони КЦ-46А опремени со сензори за противракетна одбрана.

Американскиот Конгрес, кој мора да даде конечно одобрение, е известен за договорот.

Според Вашингтон, целта на продажбата е „да се зајакне безбедноста на стратешкиот регионален партнер“ и да се подобри способноста на Катар да се справи со сегашните и идните закани, како и неговата оперативна компатибилност со силите на САД и нивните сојузници.

Катар е меѓу посредниците во преговорите меѓу Техеран и Вашингтон, кои се во мирување, како и во конфликтот меѓу Израел и Хамас во Појасот Газа.

Во Катар е воздухопловната база „Ал Удеид“, најголемата американска база во регионот. Оваа база беше нападната од Иран како одговор на израелско-американското бомбардирање.

Неодамна Катар му подари на американскиот претседател Доналд Трамп нов авион.

The post САД ЌЕ МУ ПРОДАДАТ НА КАТАР 4 АВИОНИ-ТАНКЕРИ Доха ќе плати 4,5 милијарди долари appeared first on plusinfo.mk.

Американскиот Стејт департмент го задржа предупредувањето од второ ниво за патување во Германија, со што на патниците им се советува „зголемено внимание“. Одлуката ја става Германија во понеповолна положба во однос на соседните земји, што би можело да влијае врз плановите на американските туристи кои годинава патуваат во Европа, пишува Еуроњуз.

За разлика од Германија, земји како Швајцарија, Австрија, Португалија и Полска се класифицирани на најниското, прво ниво на безбедност, за кое нема посебни предупредувања. Иста позитивна оценка има и Норвешка, чиј статус беше ажуриран на почетокот на јули.

Иако и цела Шпанија е на второ ниво, Вашингтон на 1 август издаде построго предупредување од трето ниво за енклавата Сеута, каде што на патниците им се советува да го преиспитаат патувањето.

„Масовниот и неконтролиран прилив на мигранти од Мароко во Сеута би можел да создаде непредвидливи и опасни безбедносни околности. Поради сериозноста на ситуацијата, Шпанија ангажираше војска, национална полиција и Цивилната гарда (Guardia Civil). Американските граѓани, поради ризикот за нивната лична безбедност, треба повторно да го разгледаат патувањето во тоа подрачје“, се наведува во препораката.

На истото, второ ниво на безбедност како Германија се наоѓаат и Шведска, Франција и Италија. Главната причина за зголемена претпазливост во овие земји е зголемената закана од тероризам, особено на места каде што има голем број луѓе.

„Терористичките групи и поединци и понатаму претставуваат постојана закана во Германија и Европа. Луѓето на јавни места се напаѓаат со ножеви, огнено оружје, импровизирани експлозивни направи и возила. Таквите напади можат да се случат без најава или со многу кратко предупредување, а цел може да бидат туристички места, транспортни центри како аеродроми, железнички станици или автобуски терминали, пазари и трговски центри, јавни објекти, хотели, клубови и ресторани, верски објекти, образовни институции, паркови, како и големи спортски и културни настани“, стои во предупредувањето на Стејт департментот.

Во случајот со Франција, Стејт департментот, покрај опасноста од тероризам, посебно ги истакнува џебните кражби и кражбите на мобилни телефони, кои се чести, особено на места со големи гужви.

„Терористичките групи и понатаму планираат можни напади во Франција и можат да нападнат без најава или со многу кратко предупредување. Покрај тоа, во Париз и во други градови редовно се одржуваат мирни протести и штрајкови“, велат од Стејт департментот.

Второто ниво на безбедност, на кое се наоѓа Германија, се однесува и на земји како Египет, Мароко и Индија.

Од друга страна, Ел Салвадор, Замбија и Сенегал се сметаат за побезбедни и за американските патници се на прво ниво.

Највисокото, четврто ниво на предупредување, кое подразбира препорака за целосно избегнување на патувањето, е издадено, меѓу другото, за Русија, Украина, Иран, Ирак и Сирија.

Иако Германија е ставена во категоријата со зголемено внимание, таа е далеку од најризичните земји. Поради тоа, не се очекува значителен пад на бројот на посетители од САД, кои и понатаму ги посетуваат популарните дестинации како Берлин, Хајделберг и Минхен за време на Октоберфест.

The post САД ПРЕДУПРЕДУВААТ ДА НЕ СЕ ПАТУВА ВО ГЕРМАНИЈА Американскиот Стејт департмент ги предупредува туристите appeared first on plusinfo.mk.

На 30 јули, кога светот го одбележува Светскиот ден против трговија со луѓе, вниманието повторно е насочено кон еден од најтешките облици на организиран криминал. Годинашната порака на Обединетите нации „Заробени зад измамата“ предупредува дека криминалните мрежи сè почесто ги намамуваат луѓето со лажни ветувања за добро платена работа во странство, по што тие завршуваат во современо ропство, принудени да работат, да учествуваат во интернет-измами или да бидат сексуално експлоатирани.

Иако проблемот најчесто се поврзува со сиромашни земји, официјалните податоци покажуваат дека не ја одминува ниту Македонија. Според Советот на Европа, во периодот од 2019 до 2024 година во земјава биле идентификувани 46 жртви на трговија со луѓе.

Во најновиот извештај на американскиот Стејт департмент за 2025 година се наведува дека Македонија бележи одреден напредок во борбата против трговијата со луѓе, преку зголемени истраги, подобра идентификација на жртвите и нови оперативни процедури. Сепак, земјата сè уште не ги исполнува целосно минималните стандарди за елиминирање на овој криминал.

Во извештајот се посочува дека биле осудени помалку трговци со луѓе отколку претходно, а Основното јавно обвинителство за гонење организиран криминал и корупција немало доволно ресурси за да ги процесуира сите предмети. Дополнително, дел од локалните полициски служби и обвинителства не ги упатувале навремено сомнителните случаи до надлежните институции, а во одредени случаи користеле поблаги прекршочни наместо кривични постапки.

Стејт департментот забележува и дека Владата не обезбедила средства за мобилните тимови кои секоја година идентификуваат најголем број потенцијални жртви, иако претходно презела таква обврска. Исто така, не постои специјализирана поддршка за машките жртви, ниту долгорочни програми за рехабилитација и ресоцијализација за сите лица погодени од трговијата со луѓе.

Годинава Обединетите нации предупредуваат на нов тренд – жртвите најчесто се регрутираат преку интернет и лажни огласи за работа. Луѓето добиваат ветувања за високи примања во странство, а по пристигнувањето им се одземаат документите и се принудуваат да учествуваат во интернет-измами, финансиски измами или други облици на сајбер-криминал.

Генералниот секретар на Обединетите нации, Антонио Гутереш, оцени дека ова е една од најбрзо растечките форми на трговија со луѓе, која дополнително се поттикнува со развојот на современите технологии и вештачката интелигенција.

Глобалните размери на проблемот се загрижувачки. Според Меѓународната организација на трудот, во 2021 година околу 27,6 милиони луѓе живееле во услови на современо ропство. Освен присилен труд и сексуална експлоатација, трговијата со луѓе опфаќа и присилни бракови, домашно ропство, регрутирање деца во вооружени конфликти и нелегална трговија со органи.

Советот на Европа предупредува дека жртвите во Македонија често поминуваат низ долги судски и административни постапки, што дополнително ја отежнува нивната ресоцијализација. Особено загрижувачки се случаите на присилен брак на малолетни девојчиња, кои во одредени случаи претставуваат форма на трговија со луѓе.

Колку е сериозен проблемот покажува и меѓународната операција „Global Chain“, спроведена во јуни годинава во рамките на Европската мултидисциплинарна платформа против криминални закани (EMPACT), во која учествуваа 59 држави.

Во Македонија, за време на акцијата биле откриени три кривични дела за фалсификување исправи и 49 прекршоци, најголем дел сторени од странски државјани. Истражните органи отвориле и случај за нелегално посвојување поради сомневање за трговија со луѓе со цел присилно питачење.

На меѓународно ниво резултатите биле уште поалармантни – уапсени биле 1.024 лица, а идентификувани 2.070 жртви и потенцијални жртви, меѓу кои 162 малолетници.

Во Македонија, борбата против трговијата со луѓе ја спроведуваат Министерството за внатрешни работи, Националниот механизам за упатување, центрите за социјална работа, трудовите инспектори и невладините организации. Сепак, експертите предупредуваат дека се неопходни дополнителни мерки, меѓу кои создавање фонд за обесштетување на жртвите, поголема психосоцијална поддршка и поефикасно гонење на сторителите.

Современата трговија со луѓе одамна не се сведува само на присилен труд или сексуална експлоатација. Социјалните мрежи, интернетот и лажните понуди за работа стануваат главна алатка на криминалните мрежи за регрутирање нови жртви. Затоа институциите предупредуваат дека информираноста и навременото препознавање на ризиците остануваат една од најсилните алатки за спречување на овој тежок криминал.

The post ЛАЖНИ ВЕТУВАЊА, ВИСТИНСКО РОПСТВО Во Македонија откриени 46 жртви на трговија со луѓе, опасноста демне и на интернет appeared first on plusinfo.mk.

Во Јужното Кинеско Море избувна необичен судир меѓу припадници на кинеската крајбрежна стража и филипинската морнарица, кои наместо со огнено оружје се пресметаа со весла и долги стапови додека се наоѓаа во гумени чамци во близина на спорниот гребен Ајунгин.

Според филипинските власти, инцидентот се случил на 20 јули, кога нивни војници се обидувале да ги оттурнат кинеските пловила од подрачјето околу насуканиот филипински воен брод, кој служи како постојана воена испостава на гребенот.

Филипините ја обвинија Кина дека нејзини припадници ги нападнале нивните војници со весла и стапови. Во судирот еден филипински војник бил повреден, откако бил удрен во главата со стап и добил посериозна рана.

Филипинската армија објави видеоснимка од инцидентот, на која се гледа физичка пресметка меѓу припадниците на двете страни со весла и долги стапови.

Од друга страна, кинеската крајбрежна стража тврди дека филипинскиот екипаж ги игнорирал предупредувањата, прв ги нападнал кинеските службеници и ги удирал со весла, мотки и други предмети.

Инцидентот предизвика реакција и од САД. Американскиот Стејт департмент ги осуди, како што наведе, „опасните и агресивни постапки на Кина против припадниците на филипинската морнарица“, оценувајќи дека ваквите провокации го загрозуваат мирот и стабилноста во регионот и се спротивни на обврските споровите да се решаваат по мирен пат.

Гребенот Ајунгин е едно од најспорните места во Јужното Кинеско Море. Иако Пекинг речиси целосно го присвојува тоа морско подрачје, Меѓународниот арбитражен суд во 2016 година пресуди дека гребенот се наоѓа во исклучивата економска зона на Филипините. Кина не ја призна таа пресуда и не учествуваше во арбитражната постапка.

Поради спротивставените територијални претензии, ваквите инциденти меѓу кинеските и филипинските поморски сили стануваат сè почести, што дополнително ги зголемува тензиите во еден од најчувствителните поморски региони во светот.

The post 🎥 КИНЕСКИ И ФИЛИПИНСКИ МОРНАРИ СЕ ИСТЕПАА СО ВЕСЛА И СТАПОВИ Пограничен инцидент во Јужното Кинеско Море  appeared first on plusinfo.mk.