Дали следниот чекор на СДСМ е напуштање на законодавниот дом, со крајна цел бојкот на следните Парламентарни избори, прашува Движењето ЗНАМ.

Во изминативе денови сведоци сме на уцени и на еден длабоко неодговорен и деструктивен однос од страна на СДСМ и Венко Филипче, особено во контекст на измените на Законот за Влада. Со овие измени јасно е предвидено дека техничката влада ќе важи за следните парламентарни избори, а потоа ќе биде укината како модел во иднина. Ваквиот модел одамна ја има исполнето својата примарна цел и не постои како стандард во ниедна современа европска демократија и држава. Сите тврдења дека техничката влада се укинува веднаш, како и дека ова решение е донесено без консултации со политичките партии, се обична лага и претставуваат обид за манипулација со јавноста – рече на денешната прес-конвефренција портпаролот на Движењето Никола Мемов.

Според него, наместо конструктивност и политичка зрелост во време кога е неопходен широк консензус се прават обиди за блокади, калкулации и партиски игри на штета на граѓаните.

-Последниот потег, заканата за повлекување од работната група за новиот Изборен законик, е само кулминација на ваквиот пристап -рече тој.

Мемов упати повеќе прашања до СДСМ.

– Дали сме сведоци на подготовка за сценарио за целосна блокада на работата на работната група за Изборниот законик? Дали следниот чекор е напуштање на законодавниот дом од страна на пратениците на СДСМ, со крајна цел бојкот на следните парламентарни избори? Дали вистинската причина е стравот од соочување со граѓаните и од извесен, катастрофален изборен пораз, по кој, како следен чекор по таков катастрофален резултат, ќе следува и потребата од оставка на Филипче од челната позиција на СДСМ?- праша тој.

Мемов праша и дали станува збор за однапред смислено сценарио за зачувување на личните позиции на актуелното раководство на СДСМ предводено од Филипче и нивните интереси.

–  Дали од лукративни причини се турка политика на конфронтација, со новинари, со видни членови на СДСМ, истакнати поединци, па дури и со градоначалници и пратеници од нивните редови? Дали намерно се изолира партијата од клучните процеси во државата?- праша тој

Според Движењето ЗНАМ, државата не смее да биде заложник на ничии политички калкулации.

-Ова е момент кога сите заедно мора да ја издигнеме демократската свест, да ја зацврстиме одговорноста и да покажеме дека знаеме да носиме одлуки во интерес на државата. Македонија заслужува стабилност, достоинство и напредок, и ние ќе продолжиме да работиме токму за таква иднина – рече Мемов.

Тој ги повик до членовите и симпатизерите на СДСМ да бидат внимателни и да не дозволуваат да бидат вовлечени во сценарија што водат кон изолација, кон уништување на партијата, слабеење на институциите и оттргнување на државата од европскиот пат.

-Политиката мора да биде во служба на граѓаните, а не на лични агенди. Ова раководство на СДСМ ја доведе партијата до историски најнизок рејтинг, на ниво од едвај нешто над 5%, а со вакви непромислени и деструктивни сценарија ризикува целосно да ја маргинализира на политичката сцена – рече Мемов.

Тој исто така апелираше пратениците и градоначалниците од редовите на СДСМ да не дозволат бидат инструмент во стратегии што водат кон слабеење, изолирање и непостоење на партијата.

-Не прифаќајте политики што не се во интерес ниту на членството, ниту на граѓаните.Целиот товар на ваквите политики ќе падне врз Вас, додека двоецот Заев-Филипче ќе останат изолирани од политичките последици и ќе продолжат да делуваат без отчет пред јавноста, уживајќи во моќта на златните визи, забави и крстарејќи на луксузни јахти – им порача Мемов.

The post ДАЛИ СДСМ ПЛАНИРА ДА ГИ БОЈКОТИРА СЛЕДНИТЕ ИЗБОРИ? Движењето ЗНАМ апелира членството на СДСМ да се спротивстави на калкулациите на раководството appeared first on plusinfo.mk.

Јавноста повторно беше сведок на уште еден обид на СДСМ преку политички конструкции, заплашувања и веќе препознатливата драматургија да ја дефокусира дебатата од суштината, од реформи во изборниот систем и надминување на модел кој одамна ја има изгубено својата првична цел, пишува Движењето ЗНАМ во соопштение.

„Тврдењето дека укинувањето на таканаречената Пржинска влада претставува „автократски манир“ е не само неточно, туку и политички лицемерно. Законот за техничка влада беше донесен во специфични околности, во време на длабока политичка криза, објавување на незаконски стекнати материјали и постоење на специјално обвинителство. Тој закон ја заврши својата улога. Денес, државата не смее да остане заложник на привремени решенија кои се претвораат во трајни алатки за политичко условување.

Новото законско решение не ја укинува контролата, туку напротив, предвидува јасен транзициски период, со можност техничка влада да постои за следните парламентарни избори. Ова е компромисно и одговорно решение, кое ги зема во предвид сите политички чинители, вклучително и СДСМ, чии предлози во најголем дел се вградени во текстот на законот.

Особено симптоматично е што лидерот на СДСМ одби да присуствува на лидерската средба каде токму овие прашања требаше отворено да се дискутираат. Наместо аргументи на маса, гледаме политички настапи пред камери и однапред подготвени изговори.

Дополнително, јавноста со право се прашува: нели СДСМ тврдеше дека е подготвен за нови избори? Ако тоа е така, зошто тогаш ваква нервоза, ваква реторика и обиди за блокада? Ако има доверба во граѓаните, тогаш нема потреба од панични реакции и инсистирање на механизми кои одамна требаше да останат во минатото.

Затоа, денешната реторика на СДСМ е контрадикторна сама по себе. Истата таа партија ги призна сите изборни резултати во изминатиот период, вклучително и локалните избори, без суштински забелешки за нивната регуларност. Како тогаш одеднаш техничката влада станува „единствен гарант“ за фер избори?

Заканата дека ќе се повлечат од работата на изборниот закон не е ништо друго освен политички притисок и обид за блокада. Демократијата не се гради со уцени, туку со учество и аргументи.

Движењето ЗНАМ смета дека на Македонија и се потребни стабилни институции, а не ад-хок политички конструкции од минатото. Наместо да бега од реформи, СДСМ треба да покаже политичка зрелост и да придонесе кон создавање современ изборен систем кој ќе гарантира доверба кај граѓаните, без разлика кој е на власт.

Државничкиот пристап подразбира одговорност, а не закани. Македонија одамна заслужува да излезе од сенката на кризното управување и да зачекори кон нормално институционално функционирање“ – се вели во соопштението на Центарот за комуникации и аналитика на ЗНАМ.

The post ТЕХНИЧКАТА ВЛАДА ЈА ЗАВРШИ СВОЈАТА УЛОГА, НЕ СМЕЕ ДА ОСТАНЕМЕ НЕЈЗИН ТРАЕН ЗАЛОЖНИК Блокадите на СДСМ се лицемерни, оценува ЗНАМ appeared first on plusinfo.mk.

На почетокот на месец јануари 2025 година, СДСМ одби да учествува на разговорите за укинување на Пржинската, односно техничката влада. Денес, со истата аргументација и речиси идентична реторика, партијата преку Филипче продолжува да се спротивставува на нејзиното укинување, повикувајќи се на потребата од консензус и наводна неподготвеност на институциите да гарантираат фер избори.

Оваа конзистентност не е доблест, туку показател за политичка стагнација. Наместо еволуција на ставовите во согласност со времето, искуството и реалните институционални капацитети, сведочиме на тврдоглаво држење до модел кој одамна требаше да биде надминат. Оттука и легитимното прашање: како е можно по повеќе од една деценија, по неколку изборни циклуси и по постојани повици за европски стандарди, сè уште да се брани кризен механизам како да е трајно решение?

Техничката, односно Пржинската влада, не е ниту нормален, ниту стандарден, ниту уставно заснован модел, туку ад хок политички механизам создаден за кризни околности. Таа произлезе од интензивните преговори под патронат на ЕУ и САД кои завршија со потпишувањето на Пржинскиот договор во 2015 година, како кризен механизам за надминување на тогашната политичка состојба по објавувањето на „бомбите“. Со овој договор 100 дена пред избори се воспостави преодна влада со ограничен мандат и строго дефинирана цел: да обезбеди фер и демократски избори во услови на длабока политичка недоверба.

Таа влада беше замислена како исклучок, не како правило. Како привремено решение, не како траен модел. Но денес, дванаесет години подоцна, техничката влада опстојува како политички рецидив, токму на што укажував во мојата колумна од јануари 2025 година. Наместо ова времено решение досега да биде укинато, ние сè уште сме сведоци на досега невиден агресивен отпор за нејзиното укинување.

Ајде да се обидеме за кратко да не ги затвораме очите пред реалноста и да се потсетиме што кажува правната регулатива за надлежностите и структурата на Пржинската влада. Постојните решенија во пракса, наместо ред и хомогеност на извршната власт, континуирано создаваа (и ќе создаваат во иднина) институционална парализа. Концептот на техничката влада содржи низа нерационални решенија што ја правеа нефункционална во праксата. Самата структура на техничката влада, со министри, заменици и дополнителни заменици од различни партии, со „врзан потпис“, покажа сериозни слабости. Во пракса, одлуките често остануваа без обострана согласност како резултат на одбивањето на дополнителните заменици министри да ги поддржат и потпишат одлуките. Принципот на „врзан потпис“, каде заменик-министер од друга партија може да блокира одлуки на министерот, во пракса не значеше контрола, туку институционална блокада. Наместо ефикасност, се создаваше парализа во носењето одлуки, дури и за тековни и административни прашања.

Наместо институционална координација, се создаваше атмосфера на недоверба и паралелно делување, при што медиумите стануваа главен посредник во комуникацијата меѓу институциите, наместо тие да функционираат како единствен систем.

Понатаму, двојната и тројната партиска поставеност во клучни ресори не водеше (а не води и денес) кон баланс, туку кон судир на интереси и дневнополитичко калкулирање. Наместо координација, имаме натпревар во блокирање. Наместо одговорност, имаме префрлање вина.

Дополнителен апсурд е што техничката влада формално е одговорна за спроведување на изборите, а истовремено е составена од политички актери кои директно учествуваат во тие избори. Така, наместо неутралност, се создава систем во кој секој контролира секого, но никој не сноси вистинска одговорност.

Техничката влада не е гаранција за демократија – таа е доказ дека институциите не функционираат

Како резултат на овие недоречености и импровизации, наместо стабилност, се доби дополнителен хаос и блокада на тековните активности. Присуството или бојкотот на седници на Владата станува политичка алатка, а не инструмент за управување.

Исто така мора да се има во предвид дека оваа времена влада нема право да предлага и да носи стратешки одлуки, да предлага амбасадори, директори на јавни претпријатија и членови на управни одбори. Дури и во чувствителни области како безбедноста, техничкиот премиер формално присуствува на координации, но без можност да предлага или одлучува. Апсурдна ситуација за држава што треба нормално да функционира.

Наместо да спречи злоупотреби, техничката влада често создаваше нови ризици. Наместо деполитизација, добивме дополнителна политизација. Наместо доверба – продлабочена конфронтација. Наместо одговорност – паралелни центри на моќ. Партиските функционери не функционираат како дел од извршната власт, туку како контролори на институциите во кои се поставени.

И токму тука се враќаме на денешната позиција на Филипче. Ако овој модел очигледно не ги даде очекуваните резултати, ако создава нефункционалност и институционална блокада, тогаш што точно се брани? Принцип или навика? Демократија или недоверба?

Оттука се наметнува и клучното прашање: чија и кон кого е таа недоверба што се брани со техничката влада? Се работи за недоверба во институциите или можеби страв од изборен пораз?

Кога нема резултати, се брани механизмот. Кога нема систем, се брани изговорот.

Ако по повеќе од 12 години сè уште тврдиме дека без техничка влада нема фер избори, тогаш проблемот не е во моделот, туку во оние што не успеале да изградат систем што функционира без него. А кога тие исти актери, од Заев до Ковачевски,  со години беа на власт и не го направија тоа, тогаш не станува збор за околности, туку за нивен политички неуспех.  Со кое право и со каков образ денес Филипче го брани тој очигледен неуспех? Зошто тврдоглавост наместо одговорност? Зошто одбрана на кризен модел наместо градење нормален систем? Зошто бегање од укинување на рецидивот што ја продолжува агонијата и хаосот, наместо соочување и исправување на сопствените пропусти?.

И затоа, ова веќе не е дебата за техничката влада. Ова е тест за политичка зрелост. А на тој тест некои очигледно паѓаат на прва.

Укинувањето на техничката влада не смее да значи укинување на контролата. Напротив, контролата мора да се засили преку независна ДИК, јасни санкции за изборни злоупотреби, транспарентно финансирање и функционално јавно обвинителство. Тоа се системски решенија, а не ад хок политички договори од кризно време.

Техничката влада одамна не е решение. Таа е симптом. И додека Филипче ја брани како нужност, всушност го потврдува нејзиниот неуспех, односно нефункционалност.

Денес, техничката влада е политички рецидив, остаток од една кризна епоха што одамна требаше да биде затворена. Медицински кажано, станува збор за канцер кој нè потсетува на лошите времиња. Нејзиното понатамошно опстојување не е знак на демократија и прогрес, туку на неспособност да се излезе од минатото. Неаргументираното спротивставување на нејзиното укинување не е само непромисленост на раководството на опозицијата, туку голем чекор назад за Република Македонија.

The post Техничката влада како политички рецидив, неразумниот отпор на Филипче кон реалноста appeared first on plusinfo.mk.

Пржинската влада мора да остане во спротивно пратеничката група на СДСМ ќе се повлече од Работната група за Изборниот законик, изјави денеска лидерот на СДСМ Венко Филипче.

Филипче, на прес-конференција во Собранието, нагласи дека со целосно автократскиот манир на владеење на актуелната власт, Пржинската влада е единствен контролен механизам што гарантира фер и слободни избори.

– Овој целосно автократски манир на владеење на оваа власт што го гледаме е еднаков на владеењето на Никола Груевски. Ако денеска помине на Комисија овој Закон за Влада како што е, нашата пратеничка група се повлекува од Работната група за Изборниот законик – изјави Филипче.

Тој посочи дека како партија мора да укажат и граѓаните да знаат со каква власт имаат работа и зошто, како што нагласи, се бега од контрола и механизам што гарантира фер и слободни избори.

– Ова е автократска власт. Апсолутно корумпирана. Зошто не сакаат да остане Пржинската влада. Од што се плашат и бегаат – нагласи Филипче.

Филипче, исто така, изрази уверување дека ќе има предвремени избори, посочувајќи дека, затоа им се брза со овие законски измени.

– Им се брза зошто снемува пари во буџетот за нивните бизнис интереси. Се брза да се донесе законот за да се распишат предвремени избори. Законот за избори не може да се донесе без нашата пратеничка група – нагласи Филипче.

The post СДСМ СЕ ЗАКАНИ ДЕКА ЌЕ ГИ БЛОКИРА ИЗМЕНИТЕ ВО ИЗБОРНИОТ ЗАКОНИК Ако се укине Пржинската влада, ќе излезе од Работната група appeared first on plusinfo.mk.

Измените на Законот за Влада, со кои се предвидува укинување на техничката, односно т.н. пржинска влада, се наоѓаат во завршна фаза, рече министерот за јавна администрација, Горан Минчев, во гостување на Сител телевизија.

Министерот истакна дека процесот се водел транспарентно и инклузивно, со активно вклучување и на опозициските политички партии.

– На лидерската средба ова прашање беше отворено како една од главните теми. Иако постоеја различни ставови, ние постапката ја водевме максимално транспарентно, со можност и опозицијата да учествува во креирањето на законското решение – рече Минчев.

Тој појасни дека нацрт-верзијата на законот била доставена до сите координатори на пратеничките групи во Собранието, со рок за доставување забелешки и сугестии, од кои дел биле прифатени.

– Прифатени се забелешките на опозицијата, односно барањата на СДСМ, дополнителните министри да бидат распределени во ресорите кои тие ги предлагаа – нагласи министерот.

Како компромисно решение, прифатено е техничката влада да важи уште за следните парламентарни избори, без разлика дали тие ќе бидат редовни или вонредни, а потоа целосно да се укине.

Министерот потенцираше дека предлог-законот ќе биде доставен од Министерството за јавна администрација до Владата, по што ќе следи собраниска расправа.

– Овој закон се носи со 61 пратеник и без Бадентерово мнозинство. Сметаме дека 100-те дена техничка влада сериозно го кочат интензитетот на реформите. Пржинската влада беше воведена во 2016 година за обезбедување фер и демократски избори, а по повеќе изборни циклуси со позитивни оценки, сметаме дека го исполни својот мандат и треба да остане во минатото – заклучи Минчев.

The post Ѝ СЕ ГЛЕДА КРАЈОТ НА ПРЖИНСКАТА ВЛАДА Ќе важи уште за следните парламентарни избори appeared first on plusinfo.mk.

Техничката Влада, односно Пржинската Влада беше формирана заради тогаш специфичните околности во тие моменти и беше плод на компромисни решенија се со цел враќање на довербата кон правно политичкиот поредок на државата и надминување на политичката криза, вели за македонски Курир безбедносниот аналитичар Милан Стефановски.

– И, како таква само тогаш имаше смисла и логика да функционира. Денес, после повеќе од една декада, Пржинската влада е Генетски модифициран организам во политичкиот и правен систем на државата. Без никаква смисла да опстои. Ако таа продолжи да опстојува, тоа значи дека ние не сме зрели да чекориме кон ЕУ. Тоа значи дека немаме ефикасен правен систем кој преку Изборниот законик механизмите за легитимни избори се неадекватни – дециден е Стефановски.

The post ПРЖИНСКАТА ВЛАДА Е КАКО ГМО, ВЕЛИ СТЕФАНОВСКИ „Ако опстои, не сме зрели за ЕУ“ appeared first on plusinfo.mk.

Трајко Вељаноски, поранешниот собраниски спикер се противи на Пржинската влада, бидејќи, според него, ваквата влада била резултат на други околности.

– Пржинската влада е хибридно решение кое е направено во други околности и за други цели. Тоа беше за влада која некои ја викаат техничка, а таа е чисто Пржинска влада. Тогаш, се формираа три Пржински влади пред да бидат изборите во 2016 година. Едната беше во ноември и таа ја предводеше Никола Груевски. Во неа беа вклучени двајца министри од СДСМ – Оливер Спасовски и Фросина Ременски. Втората Пржинска влада беше во јануари каде што согласно Пржинскиот договор премиерот требаше да си поднесе оставка, па затоа тогаш дојде Емил Димитриев. Тогаш СДСМ не ни учествуваше во гласањето за своите министри. Во септември 2016 година беше формирана и третата Пржинска влада во којашто учествуваше СДСМ и таа влада ги спроведе изборите во декември 2016 година. И тогаш беше така регулирано, таква влада се формира само за изборите во 2016 година. Оваа Пржинска влада е спротивна на Уставот и законот на организација на органите на државната управа – вели Вељаноски.

Тој го образложи своето мислење како треба да изгледа политичката сцена во Македонија.

– Јас сметам дека треба да се има политичка влада и да си ги спроведе изборите. Треба да имаме демократска култура на признавање на резултатите – потенцира Вељтрајаноски.

The post 🎥 ОВАА ПРЖИНСКА ВЛАДА Е СПРОТИВНА НА УСТАВОТ Трајко Вељаноски потсетува дека таа била измислена во други околности и за други цели appeared first on plusinfo.mk.

Целта на техничката влада е на 100 дена пред изборниот ден да се воведат контролни механизми во клучните ресори каде што се трошат државните ресурси, но ако таа контрола не постои, односно ако на опозицијата не ѝ биде овозможено да предложи свои технички министри и заменици, тогаш таа влада не е техничка, туку повторно е политичка, без оглед на тоа дали техничкиот премиер е Македонец или Албанец.

Вака политичките аналитичари ја коментираат можноста предлогот за состав на техничката влада што ќе биде доставен до Собранието да има празни места во делот каде што треба да фигурираат имињата на министрите од ВМРО-ДПМНЕ.

Па така, доколку ВМРО-ДПМНЕ остане на ставот да не гласа за техничката влада и доколку не ги поддржи нивните предлози, тогаш за нив нема да гласаат ниту пратениците од владината коалиција.

Предлогот за креирање половична влада е еден обичен политички аматеризам од страна на власта. Ние практично нема да имаме министри во неколку сектори. Кој ќе ги потпишува платите, на пример?

Никола Мицевски Пратеник, ВМРО-ДПМНЕ

Во таков случај, местата на опозициската партија во техничката влада би останале неисполнети, па оттаму е и загриженоста на координаторот на пратеничката група на ВМРО-ДПМНЕ, Никола Мицевски, кој предупредува на опасноста да нема кој да потпишува плати и други решенија во секторите каде што нема да бидат назначени министри.

– Оставката на претседателот на Владата повлекува и оставка на целата Влада, а тоа значи дека датумите коишто ги соопштуваат како можни датуми за оставки на премиерот и на претседателот на Собранието, практично е оставка на целата Влада. Така што, предлогот за креирање половична влада е еден обичен политички аматеризам од страна на власта. Ние практично нема да имаме министри во неколку сектори. Кој ќе ги потпишува платите, на пример? Ние не можеме да имаме дополнителни министри или заменици-министри кога законот е сосема јасен: орган на управа е Владата, а со Владата управуваат министри – објаснува Мицевски.

Интересно е тоа што ваквиот развој на настаните, во поглед на проблемите со формирањето техничка влада, не е единствен пример на којшто се сеќаваат граѓаните.

Во 2016 година, за време на гласањето за техничка влада на ВМРО-ДПМНЕ на чело со тогашниот технички премиер Емил Димитриев, пратениците на СДСМ ја напуштија седницата за избор на техничка влада. На таа седница СДСМ не ги гласаше своите кандидати за министри.

Тогашните технички министри за внатрешни работи Оливер Спасовски и за труд и социјала Фросина Ременски дадоа заклетва дури 3 дена подоцна, а ВМРО-ДПМНЕ воопшто не се закани со санкции за таквото кршење на законот од страна на СДСМ.

Политичкиот аналитичар Владимир Божиновски вели дека ниту некогаш се видело, ниту некогаш се чуло да се формира техничка влада без опозиција.

– Никако не е изводливо, затоа што не постои полупразна или полуполна влада. Мандатарот предлага состав на новата влада којашто треба да добие поддршка од мнозинството пратеници, а во тој состав на влада има повеќе ресори. Доколку вие не предложите министри за тие ресори, тоа значи дека ресорите треба да се укинат. Така што, не постојат празни места или влада во којашто ќе имаме министри на чекање. Мнозинството е 61 пратеник, па кој ќе гласа за таа влада и дали воопшто ќе се собере 61 пратеник, правото воопшто не навлегува во тоа дали ќе гласаат пратеници од ДУИ, СДСМ, ВМРО-ДПМНЕ или на било која друга парламентарна партија – објасни Божиновски.

Ако во техничката влада не учествуваат министрите од опозицијата и не се воспостави заштитниот механизам, додаваат експертите, тогаш може да си остане политичката влада, бидејќи нема да има потреба од формирање техничка влада.

– Тогаш веќе немаме техничка влада, туку имаме политичка влада, односно тоа што го тврдеше ВМРО-ДПМНЕ дека целата игра всушност со техничката влада е да се исполни ветувањето кон ДУИ во последните 100 дена од мандатот на оваа влада да добие свој премиер – посочи Божиновски.

Поранешниот претседател на Државната изборна комисија (ДИК) и поранешен генерален секретар на Собранието, Александар Новаковски, во интервју за Канал 5 изјави дека техничката влада теоретски би можела да функционира и без учество на најголемата опозициска партија во неа, но како што вели, со тоа ќе се отворат низа правни прашања кои ќе доведат до сериозни последици меѓу кои и оспорување на нејзиниот легитимитет.

– Главната цел на формирањето на техничката влада беше учеството на најголемата опозициска партија во неа, која, преку клучните министерски позиции – Министерство за внатрешни работи и Министерство за труд и социјала – ќе ја контролира власта при спроведувањето на изборите за да се спречат евентуални злоупотреби. Ако опозицијата не се согласи да номинира свои технички министри и заменици, може да се доведе во прашање и да се оспори законски таа техничката влада иако не носи суштински одлуки и нема мандат за тоа – вели Новаковски и додава дека се надева дека ВМРО-ДПМНЕ сепак ќе биде дел од техничката влада.

Оставките на премиерот Димитар Ковачевски и на претседателот на Собранието Талат Џафери се најавени за в четврток, пред новата седница на Собранието закажана за в петок, 26 јануари, кога би биле констатирани оставките и би бил избран новиот претседател на Собранието, Јован Митрески, актуелен координатор на пратеничката група на СДСМ.

Изборот на техничката Влада треба да биде в недела на 28 јануари. Владата треба да биде избрана најдоцна до полноќ, а ќе ја предводи новиот технички премиер Талат Џафери.

The post ТЕХНИЧКА ВЛАДА БЕЗ ОПОЗИЦИЈА – И ИЗГЛЕДА ШАШАВО И НЕ ФУНКЦИОНИРА! Ќе настане хаос, многу луѓе ќе останат без плати appeared first on plusinfo.mk.

Трајко Вељаноски е искусен правник, политичар и седми по ред претседател на Собранието на Република Македонија. Должноста ја вршел од 2008 до 2016 година. Член е на ВМРО-ДПМНЕ. Во Собранието ги вршел и должностите на претседател на Комисијата за уставни прашања и шеф на делегацијата на Собранието на Македонија во Интерпарламентарната унија. Повеќе години ја водел Комисијата за правни работи на ВМРО-ДПМНЕ, бил член на Комисијата за политички систем, а исто така го водел и Форумот за правни и политички прашања и судски систем на ВМРО-ДПМНЕ.

Вељаноски беше претседател на Собранието во турболентните момнети на 2017 година, кога дојде до смена на власта. На 26 јули 2021 година Основниот кривичен суд го осуди Вељаноски на 6 години и 6 месеци затвор, заедно со ексминистрите Миле Јанакиески и Спире Ристовски, како и поранешниот директор на УБК Владимир Атанасовски. Вељаноски и другите беа осудени за делото „терористичко загрозување на уставниот поредок и безбедноста“, за учество во организацијата на нападот на Собранието на 27 април 2017 година со цел да се спречи смена на власта.

Апелацискиот суд Скопје на 3 април 2023 година ги уважи жалбите на Вељаноски и на другите обвинети и ја укина првостепената пресуда, а предметот „Организатори на 27 април“ го врати на повторно одлучување пред Основниот кривичен суд Скопје. Апелацискиот суд оцени дека Основниот кривичен суд требало во поголема мера да го разгледа прашањето за одредбите кои се однесуваат за амнестија на кривичното дело и дека судот сторил суштествени повреди на одредбите на кривичната постапка.

Вељаноски континуирано се јавува во јавноста со коментири и сугестии за одредени политички прашања, ја критикува работата на Собранието во отворени писма, а го коментираше јавно и последниот извештај на Европската комисија за напредокот на Македонија, оценувајќи го како воопшто најлош откако Македонија добива вакви извештаи.

Со Вељановски разговараме за актуелните политички состојби и проблемите кои ѝ претстојат на земјава во блиска иднина.

Плусинфо: Г-дине Вељаноски, прво накратко може ли да информираме за тоа во која фаза е предметот во кој сте обвинет за настаните од април 2017 година? Апелација ја уважи вашата жалба на пресудата, што е следно? На што се заснова вашата одбрана и што очекувате како конечен исход од овој судски процес?

Вељаноски: Како прво сакам да кажам дека тоа е класичен политички прогон за остварување не деструктивни антимакедонски интереси, а сето тоа спроведено од сега веќе разрешената обвинителка и фрлeна во историското буниште,  како личност која ќе биде запаметена како негативна. Инаку, би сакал да напоменам дека јас се товарам според обвинение дека не сум ставил на гласање нешто за што и самите кажуваат дека, според Деловникот, не можело да се стави на гласање, но сум требало да водам сметка за некои повисоки цели!? Што значи дека бараат да сум постапел спротивно на Деловникот? Бог да чува! Јас сум легалист и така сум постапувал во текот на 9 години раководење со Собранието. Процесот е во почетна фаза пред Основниот суд и освен прекин на политичкиот прогон, ништо друго не може да опстане. Најголемата казна од овој процес е реваншизмот на власта. Тоа беше нивната основна намера – една плејада истакнати членови на ВМРО-ДПМНЕ да ги подложат на тортура и на нечовечки третман, без било каква вина. Но, ете полека заоѓа и овој мрачен период, а сонцето на слободата за кратко ќе огрее. Сепак, уште долго ќе продолжи да тлее во нашите животи споменот за овие злодела под кои бевме ставени без било каква причина од страна на СДСМ.

 Плусинфо: Изминатата година помина во знакот на напорите на собраниското мнозинство да ги донесе измените во Уставот во Собранието пред министерскиот совет на ЕУ и официјален почеток на преговорите со Унијата, односно отворање на преговарачките поглавја. Дали тоа може да се случи до крајот на мандатот на овој собраниски состав, со оглед на тоа што се распишани избори за 8. мај?

Вељаноски: Ако стриктно го почитуваме деловникот на Собранието, заврши времето и рокот кога можеше да бидат ставени на гласање уставните измени, но доколку и спротивно на деловникот биде продолжена седницата со точката уставни измени, прво нема 2/3 мнозинство, и второ, нема потребен временски период да се поминат сите три фази за измена на Уставот, за кои се потребни најмалку три месеци. Тоа значи дека овој парламентарен состав нема ниту теоретски шанси да направи уставни измени.

Плусинфо: Според тнр. Пржински договор треба да биде формирана техничка влада, која треба да раководи со земјата околу три месеци пред изборите. Дали сметате дека ВМРО-ДПМНЕ треба да учествува во таа влада со свои министри и кои се агруметните за или против? Дали сметате дека техничката влада треба да опстои и во идинина како инструмент што овоможува порамноправен изборен натпревар, или сте на став дека треба да се укине?

Вељаноски: Во јавноста се оперира со термин „техничка влада“ што не е точно, тоа е „Пржинска влада“ кој е направена во други околности и за други цели. Јас пред некое време јасно се произнесов дека ваква влада е голема глупост и треба што побргу да се укине и се согласувам со идејата, ако не за овие избори барем главните политички партии се согласат – да се измени Законот за влада во делот на таканаречана техничка влада, а измените да важат од следните изборни процеси по завршување на овој изборен процес. Досега сме имале искуство во ваков тип на влада во 2016 и 2020 година. Точно е дека опозицијата ќе има двајца министри и тројца заменици-министри, но тоа не значи дека владата како колективно тело не ќе може да прави потези и да носи одлуки со кои ќе може да го наруши изборниот процес. Сакам и вас и јавноста да ја потсетам што сè направи техничката влада во текот на парламентарните избори во 2020 година, на еден месец пред изборите – таа влада донесе повеќе од 100 уредби со законска сила, и тоа некои уредби кои директно влијаеја на изборниот процес, на пример делеа субвенции, се задолжуваа, го изменија и дополнија буџетот, делеа финансиска подршка на разни категории, го сменија Изборниот Законик во делот на финансирање и рекламирање, и многу други процеси, спротивни на фер демократски процес. Иако, според Уставот, Собранието е должно да ги потврди 5-те одлуки за воведување на вонредна состојба, донесени од Претседателот на РМ, и преку стотина уредби со законска сила, донесени од Владата во текот на 2020 година, до ден денес нема одлука за нивно потврдување! Толку од владеењето на правото! Сакам да кажам дека за сите е битно да се воведе демократска култура на владење во текот на изборниот процес. Тоа е многу поважно отколку некакви хибридни решенија за влада во текот на изборите, но како што кажав на почетокот, веќе е доцна за било што, освен за почитување на ова законско решение и ВМРО-ДПМНЕ да земе учество во владата.

Плусинфо: Предизборните вработувања се исто така една „традиција“ во македонската политика, која никако да се искорени. Сведоци сме на масовни огласи за вработување од јавни претпријатија, а дополнителна нервоза создаваат зачестените услови во тие огласи да се бараат кандидати од одредена националност – Албанци, Турци, Роми.. Такви услови има дури и на чувствителни места, како специјалисти по медицина, каде стручноста треба да е далеку поважна отколку етничката припадност на кандидатите. Како ги коментирате овие појави?

Вељаноски: Во последно време гледаме масовни предизборни вработувања, што не е добар показател за фер избори, но уште повеќе иритира злоупотребата на балансерот односно вработувања по етничка основа. Какви пораки се праќаат со вработувања на Албанци, Турци, Роми….. во делови односно градови во Македонија каде што не живеат припадници од таа етничка заедница? Освен тоа дека преку злоупотребата на балансерот еден политички субјект од власта, преку изигрување на законот, ќе си ги вработи своите партиски војници. Но, ме чуди молкот на ДУИ за оваа злоупотреба на балансерот. Само да ги потсетам како жесто реагираа во парламентарниот состав во 2006 година, кога го оспоруваа правото на пратеник да се произнесе дека е од друга етничка заедница, затоа што имал македонско презиме, па дури инсистираа во Мајскиот договор да се измени Изборниот законик и пратениците онапред да се изјаснеле на која етничка група припаѓаат, ,уште со поднесувањето на листата за пратеници. Затоа би им порачал дека ова премолчување може како бумеранг да им се врати на тој начин што на некои избори поголем број пратеници може да се изјаснат дека се од друга етничка заедница, а не македонската, па тогаш нема да имаат право да се бунат, како што сега не се побунуваат за атер на својот коалиционен партнер во власта.

Плусинфо: Парламентарните избори се закажани за 8. мај, заедно со вториот круг од претседателските избори. Официјалниот аргумент на опозцијата, која се залагаше за тој термин, беше дека така ќе се заштедат пари на даночните обврзници. Дали можеби мотивот не е во тоа да има поголем одѕив на вториот круг на изборите, со што би се избегнало сценарио претседателските избори да не успеат? Кој добива, а кој губи со вакви изборни термини?

Вељаноски: Прво, непотребно со месеци се малтретираше јавноста кога ќе бидат изборите. Сосема беше јасно дека единствен термин за одржување на заеднички претседателски и парламентари избори беше датумот 8 мај. Со овој термин се постигнуваат две цел. и: прво, економски се заштедуваат пари на даночните обврзници и плус, се скратува временски изборниот процес, кога целата економија е во грч. И второ, се обезбедува во вториот круг на претседателски избори да се оствари цензусот од 40% за успешни претседателски избори. Ја користам можноста да упатам апел – ако сакаме 100% да имаме успешни претседателски избори, ДИК да донесе акт со тоа што на 8 мај, кога ќе има заедно претседателски и парламентарни избори, на гласачкото место да има само еден избирачки список, а не два посебни. Гласачот треба да се потпише само на еден единствен избирачки список, а да добие две гласачки ливчиња, едно за парламентарни избори, а другото за претседателски избори. На тој начин ќе се спречат оние политички субјекти на кои нема да им одговараат резултатите од првиот круг на претседателските избори, да ги тераат гласачите да го бојкотираат вториот круг за избор на претседател. Според мене, оваа е многу битно и важно за успешен изборен процес, а битно е и за самата држава.

Плусинфо:  Дали идното собраниско мнозинство, под претпоставка да биде предводено од ВМРО-ДПМНЕ, како што се очекува, би можело да ги донесе уставните измени? Дали се согласувате дека ВМРО-ДПМНЕ не треба да се откаже од евроатланските стратешки цели. Ако е така, каде го гледате маневарскиот простор на идното собранискко мнозинство да ги одблокира евроинтеграциски процеси, кои со тнр. Француски предлог се тесно поврзани и со односите со Бугарија. Дали е решението во отфрлање на Францускиот предлог, отстапување од Договорот за добрососедство со Бугарија, или нешто трето?

Вељаноски: ВМРО-ДПМНЕ уште од основањето има стратешка цел за евроинтеграција. Сакам да ве потсетам дека во 2009 година за првпат Македонија доби препорака за отпочнување преговори со ЕУ и во следните 6 години се повторуваше таа препорака, но од познатата причина за спорот со Грција, бевме блокирани. Сакам да кажам дека основна цел на ВМРО-ДПМНЕ ќе биде побрза евроинтеграција, но секако водејќи сметка и за државните и македонски интереси. Убеден сум дека по изборите може да се најде излезно решение, но не по секоја цел. Расположението на народот на изборите ќе ги диктира сите идни чекори.

Плусинфо: ВМРО-ДПМНЕ води на анкетите и се очекува по изборите да го добие мандатот за формирање влада. Каде ги гледате идните партнери на вашата партија за коалицирање? Може ли да се случи, поради досегашната политика на спротиставување на уставните измени, ВМРО-ДПМНЕ да не може да најде партнер меѓу партиите на Албанците во Македонија, со оглед на тоа што и опозициските партии на Албанците нагласуваат дека преговорите со ЕУ, а со тоа и уставните промени, за нив се приоритетни? Може ли да се случи поради тоа ВМРО-ДПМНЕ да не може да состави влада?

Вељаноски:  Согласно расположението на народот, а и револтот што го имаат граѓаните спрема актуелнава власт, убеден сум дека ВМРО-ДПМНЕ ќе извојува убедлива победа и тоа можеби на граница да оствари апсолутно мнозинство во парламентот, сето ова ќе зависи од излезеноста на изборите доколку народот излезе референдумски, таква ќе биде и победата – референдумска. Без оглед на евентуалното апсолутно мнозинство неопходно е да има учество во владата и на албанска партија и тоа не го гледам како пречка, но во таа влада ќе се знае која е носечка партија, согласно бројот на пратеници, а не како сега, партија со 15 пратеници да биде главна.

The post НА СЛЕДНИТЕ ИЗБОРИ ЌЕ СЕ ГЛАСА РЕФЕРЕНДУМСКИ, А ТАКВА ЌЕ БИДЕ И ПОБЕДАТА НА ВМРО-ДПМНЕ Никогаш повеќе партија со 15 пратеници нема да биде главна, вели поранешниот спикер Трајко Вељаноски appeared first on plusinfo.mk.

Прашан за датумот за истовремено одржување на изборите, Груби рече дека тоа не е по барање на опозициската ВМРО-ДПМНЕ, туку е нивна одлука, базирана на расположението кај граѓаните.

– Ова е наша одлука, не е по барање на ВМРО-ДПМНЕ, ние видовме дека и граѓаните го очекуваат тоа, изборите да бидат заеднички за да не се трошат ни пари ни енергија на граѓаните. ВМРО-ДПМНЕ сметаат дека имаат повеќе шанса да ги добијат изборите, со што не би се сложил. Ниту еден владин мандат за време на ВМРО-ДПМНЕ не беше целосно завршен, така што не е дека се грижат за буџетот или за барањата и очекувањата на граѓаните – вели Груби прашан за датумот за изборите во гостувањето во Студио 10 на ТВ 24.

Груби оцени дека е трагедија тоа што ВМРО-ДПМНЕ не сака пржинска влада и смета дека тоа е навестување што ќе се случува ако победи ВМРО-ДПМНЕ во што тој вели дека не верува.

– Првиот Албанец премиер не беше условен со пржинската влада или техничката влада, туку тогашниот премиер Заев рече дека ќе се повлече од неговата позиција пред изборите за да овозможи фер политички натпревар. Пржинската влада е договор и непочитувањето на договори чинат мандати на политичките партии. И јас би предложил и би поддржал укинување на техничка влада, но тоа да почне да важи од следниот мандат и да продолжиме како сите нормални демократии – вели Груби.

Тој повтори дека нема да биде премиер во техничката влада, ниту ќе биде некој од актуелните министри од редовите на ДУИ. Подвлече дека точно знаат кој ќе биде, но оставаат тоа да го соопшти лидерот на ДУИ Али Ахмети по разговорите со коалициските партнери со кои треба да се договори и начинот на кој ќе настапат на следните избори.

– Би било добро да е дама, госпоѓа, па ќе видиме, може ќе се изненади јавноста пријатно – рече Груби, прашан дали за технички премиер може да очекуваме жена.

The post ЗА ГРУБИ ТРАГЕДИЈА Е ШТО ВМРО-ДПМНЕ НЕ САКА ПРЖИНСКА ВЛАДА Тој би поддржал укинување на техничката влада од следниот мандат appeared first on plusinfo.mk.