Мултифондовите овие денови станаа новата голема надеж на македонската пензиска реформа. Идејата звучи убедливо: помладите граѓани повеќе да вложуваат во акции, кои се поризични, но долгорочно можат да донесат повисоки приноси, додека со приближувањето кон пензионирањето заштедата постепено би се префрлала во посигурни форми на вложување, како што се обврзниците.

Во принцип, тука нема ништо спорно. Идејата за мултифондови е економски оправдана. Но постои еден проблем: земјите што имаат мултифондови веќе две децении не покажуваат дека тоа само по себе е рецепт за високи приноси.

А токму тука започнува важната лекција за Македонија.

Бидејќи секогаш е подобро да се учи од туѓите грешки отколку од сопствените, да ги погледнеме искуствата на балтичките земји и Словачка. Овие земји имаат мултифондови практично од самиот почеток на своите втори пензиски столбови, а нивниот имот не е концентриран во државни обврзници како во Македонија, туку е значително пошироко диверзифициран.

Ако мултифондовите се клучот за високи приноси, тогаш резултатите на овие земји би требало да бидат убедливи. Но не се.

Реалната стапка на принос е негативна во Летонија, приближно еднаква на нула во Словачка и само нешто над нула во Естонија. И во Литванија реалните приноси долго време беа многу скромни, околу 1% годишно, сè до 2019 година.

Таа година Литванија спроведува длабинско реструктурирање на пензискиот систем и суштински ја менува улогата на вториот столб. Наместо да го истиснува државниот пензиски систем, вториот столб станува негова дополнителна поддршка и надополнување. Членството престанува да биде задолжително, а со тоа дополнително се поттикнува конкуренцијата меѓу приватните пензиски фондови.

По оваа реформа, перформансите на литванскиот втор столб стануваат значително подобри, со просечна реална стапка на принос од околу 3,5%.

Хрватска дава уште еден интересен пример. Како и Македонија, го воведе вториот столб без мултифондови, во 2002 година, а мултифондовите беа воведени дополнително во август 2014 година. Сепак, деценијата по нивното воведување не покажува јасно зголемување на просечната стапка на принос. Напротив, зависно од периодите што се споредуваат, постојат индикации дека просечниот принос бил понизок од оној што се остварувал пред воведувањето на мултифондовите.

Уште поинтересен е случајот на Полска. Во изминатата деценија токму полскиот втор столб оствари меѓу највисоките реални стапки на принос во Источна Европа, иако Полска никогаш не воведе мултифондови. Тоа само по себе покажува дека мултифондовите не се неопходен предуслов за добри инвестициски резултати.

Но полскиот пример е важен и од друга причина. Во 2014 година Полска спроведе длабоко реструктурирање на вториот столб, со кое драстично беше намален транзицискиот трошок што ги оптоваруваше јавните финансии, додека вториот столб продолжи да функционира како дополнителна пензиска заштеда што ги надополнува државните пензии, наместо да ги ограничува и истиснува.

Со други зборови, Полска не се обиде основниот системски проблем да го реши само со промена на инвестициската стратегија, туку ја промени самата улога на вториот столб во пензискиот систем.

Со тоа доаѓаме до суштината на проблемот.

Проблемот не е само во тоа каде вториот столб ги вложува парите. Проблемот е што вториот столб му прави на остатокот од пензискиот систем, па и на целиот државен буџет.

Искуствата на овие земји не докажуваат дека мултифондовите се погрешен концепт. Напротив, мултифондовите можат да бидат корисно унапредување на пензискиот систем. Но меѓународното искуство покажува дека тие не се магично решение, а особено не се решение за основниот проблем на македонскиот пензиски систем.

Клучниот проблем лежи во конструкцијата на вториот столб од 2006 година. Тој е поставен така што создава огромни транзициски трошоци што ги оптоваруваат јавните финансии и дополнително го истиснуваат државниот пензиски систем, наместо да го поддржуваат и надополнуваат, како што е случај во поразвиените системи низ Западна Европа.

Последиците од таквото решение стануваат сè повидливи: вториот столб не ги оствари приносите што беа очекувани кога беше воведена реформата. Оттаму, наместо да ги зголемува пензиите, вториот столб го зголемува буџетскиот дефицит и јавниот долг.

Затоа првиот чекор не треба да биде потрага по нов инвестициски модел, туку промена на основната организација на вториот столб. Тој треба да стане вистинско надополнување и поддршка на јавниот пензиски систем, како што веќе е направено во Литванија, Полска и други земји од Источна Европа.

Дури потоа има смисла да се разговара за дополнителни унапредувања, вклучително и за мултифондовите.

Мултифондовите можат да бидат корисен инструмент. Но од корисен инструмент не треба да се прави волшебно стапче.

The post Мултифондовите не се волшебно стапче appeared first on plusinfo.mk.

Полската полиција уапси маж кој упатувал закани и планирал напад врз полскиот премиер Доналд Туск, соопшти министерот за внатрешни работи Марчин Кервински.

„Мажот кој се закануваше со напад е приведен. Ѝ благодарам на полицијата за брзите и одлучни мерки“, напиша премиерот Туск на социјалната мрежа Икс.

Претходно денеска, полската полиција соопшти дека добила информации за можен заговор за напад врз Туск и министерот за одбрана Владислав Кошњак-Камиш. Заканата била исклучително загрижувачка, а премиерот бил информиран за неа рано утрово, изјави портпаролот на полската влада, Адам Шлапка.

– Ова прашање го сфаќаме исклучително сериозно – изјави портпаролот на министерот задолжен за полските разузнавачки служби, Јацек Добжински, по вонредниот состанок на безбедносните служби, полицијата и претставниците на Министерството за внатрешни работи.

Тој објасни дека информациите за заканата првично пристигнале во Службата за државна заштита, која потоа ја известила полицијата, додавајќи дека, според проценките на властите, постоела голема веројатност заканите да бидат реализирани.

Ниту Кервински ниту Добжински не открија детали за идентитетот на затворениот маж, ниту за видот на планираниот заговор, но истакнаа дека разузнавачките служби секој месец добиваат сè поголем број закани.

Овој инцидент доаѓа во момент кога Полска е во состојба на зголемена готовност по серијата напади со ладно оружје во училишта во текот на неделава — каде што во период од четири дена беа извршени три напади во кои едно лице загина, а повеќемина беа повредени, меѓу кои и деца.

Исто така, во земјата владеат стравувања од евентуален руски хибриден напад чија цел би била да ја ослабне западната поддршка за Киев во војната против целосната руска инвазија врз Украина. Минатиот месец, Туск предупреди на веројатна ескалација на хибридните напади од Русија долж источното крило на НАТО, истакнувајќи дека Русија планира напади со беспилотни летала или ракети врз европски држави кои ја поддржуваат Украина, меѓу кои и Полска. Москва ги негираше ваквите планови.

The post ПОЛСКА УАПСИ МАЖ КОЈ СЕ ЗАКАНУВАЛ СО АТЕНТАТ ВРЗ ТУСК Имало закани и за министерот за одбрана appeared first on plusinfo.mk.

Полското Министерство за внатрешни работи соопшти дека е закажан итен состанок во Антитерористичкиот центар при Агенцијата за внатрешна безбедност, откако полицијата добила информации за можни обиди за атентат врз премиерот и врз министерот за одбрана.

„Во врска со информациите добиени од полицијата за можен обид за атентат врз премиерот, како и врз вицепремиерот и министер за национална одбрана, министерот за внатрешни работи и министерот задолжен за координација на специјалните служби наредија преземање соодветни мерки“, објави на социјалната мрежа Икс портпаролката на Министерството за внатрешни работи, Каролина Галецка.

Таа појасни дека на итниот состанок ќе учествуваат претставници на полицијата, Државната служба за заштита и Агенцијата за внатрешна безбедност.

Полска — членка на НАТО и на Европската Унија, која се наоѓа на источното крило на двата сојуза — се наоѓа во состојба на зголемена готовност по неколку напади со ладно оружје и обиди за напади што ги извршија малолетници и млади лица во основните и средните училишта од почетокот на учебната година во септември.

Полскиот премиер Доналд Туск во четвртокот ја осуди, како што ја нарече, „сеопфатната култура на насилство во светот“, која, според него, „стигна и во Полска“.

The post ПОЛСКА НА ШТРЕК ПО ЗАКАНИТЕ ЗА АТЕНТАТ ВРЗ ПРЕМИЕРОТ ТУСК Итен состанок во Антитерористичкиот центар appeared first on plusinfo.mk.

Полскиот премиер Доналд Туск на вонредниот состанок во Варшава по повод серијата напади со ножеви во училиштата во Полска, три во само четири последни дена, најави дека зајакнатите мерки за безбедност и контроли во училиштата продолжуваат и утре, а за нападите ги обвини „мрачната фасцинација од насилство“.

– В понеделник исто така ќе има контроли. Не затоа што се зголемува ризикот, туку таквите инциденти, посебно оние два брутални, предизвикуваат силни емоции. Тоа е тема на денот и во групите на нивните врсници. Свесни сме дека на некого може спонтано да му падне на памет опасна идеја – изјави Туск.

Серија од шест напади со ножеви почна на 22 септември, а оттогаш напаѓачите, кои се малолетници, избодоа ученици или наставници, додека во еден напад ученик ја уби хигиеничарката.

Според полскиот премиер, тоа не е дело на некоја организирана група со план, туку се работи за спонтани напади.

– Тоа се спонтани постапки кои се одраз на активностите на мрежите. Последните години и месеци забележуваме пораст на фасцинацијата од насилство. Соочени сме, како во Полска така и ширум светот, со многу мрачна мода на насилство – рече Туск.

Полскиот премиер предупреди дека полските служби посебно внимание посветуваат на групи млади на мрежите кои ги фасцинира насилството од времето на Втората светска војна и кои бараат фашистички и нацистички содржини.

– Гледаме, меѓутоа, и еден позитивен аспект од драматичните настани во последните денови. Позитивен во тоа што имаме сигнали дека родителите почнуваат да контролираат што ги интересира децата на интернет и што ги фасцинира. Тоа е многу важно затоа што не сакаме да ги контролираме училиштата со полициски методи – рече Туск.

Полската полиција почна контроли во училиштата во четвртокот по двата напади – во среда, кога во Остроленка во Мазовското Војводство 19-годишен ученик нападна и избоде со нож девет лица, меѓу кои петмина ученици и двајца наставници, а во ранецот кај него беше пронајден и експлозив од домашно производство.

Следниот ден, во четвртокот, во основно училиште во местото Лешчидол-Новини во истиот регион на Полска, 15-годишник со нож ги нападна директорот, една од учителките и хигиеничарката, која им подлегна на повредите за време на транспортот кон болницата, додека во последниот напад во саботата во Варшава 21-годишна девојка со нож нападна и повреди три други девојки.

The post КАЈ МЛАДИТЕ ИМА МРАЧНА ФАСЦИНАЦИЈА ОД НАСИЛСТВОТО Туск најави строги контроли по нападите со ножеви во училиштата appeared first on plusinfo.mk.

Ветерните електрани обично се проектираат според едноставен принцип: лопатките се поставуваат на места каде што дува најсилен ветер, а роторот се користи за да се извлече што е можно повеќе енергија.

Но, инженерите од Политехничкиот универзитет во Лоѓ, Полска, испитувале поинаков пристап. Наместо роторот да остане изложен на воздушниот проток, тие го опкружиле со специјално обликуван дифузор, кој завршува со проширен прстенест раб.

Според истражувањето објавено во научното списание International Journal of Numerical Methods for Heat & Fluid Flow, ветерна турбина со дифузор (DAWT) била тестирана во аеродинамички тунел. Во исти услови, таа произвела до 70–75 отсто повеќе енергија од идентичен ротор без насочувач на воздухот.

Овој резултат, сепак, не значи дека едноставното додавање голем прстен на која било ветерна турбина автоматски ќе го зголеми производството на електрична енергија за три четвртини.

Експериментот бил спроведен со мал модел во контролирани лабораториски услови. Сепак, резултатите покажале дека внимателно насочениот воздушен проток потенцијално може да ја зголеми ефикасноста на компактните турбини, особено во подрачја со релативно слаби ветрови.

Идејата зад необичниот насочувач на воздухот

Целта на инженерите била да ја зголемат количината воздух што минува низ работната зона на турбината. За да го постигнат тоа, роторот го поставиле во дифузор кој, во суштина, формира краток аеродинамички канал околу лопатките.

Каналот се проширува кон задниот дел и завршува со прстенест раб, односно прирабница, што е клучна карактеристика на дизајнот. При минувањето на воздухот низ дифузорот се создава зона со понизок притисок зад роторот.

Во истражувањето, објавено во списанието Renewable Energy, научниците ги споредиле перформансите на самостоен ротор со оние на истиот ротор опремен со дифузор и проширен раб. Притоа ги мереле брзината на вртење, вртежниот момент и оптоварувањето на лопатките.

Експериментите покажале дека дифузорот го менува воздушниот проток што стигнува до роторот и влијае врз однесувањето на лопатките.

Овој концепт не е целосно нов. Јапонски истражувачи претходно развиле слични решенија, познати како „ветерни леќи“ (wind lens), со цел да ја зголемат количината воздух што минува низ турбината. При тестирањето на ветерна турбина со дифузор од три киловати, истражувачите го испитувале однесувањето на лопатките при брзина на ветерот од 6,9 до 11,6 метри во секунда.

Што се случило во аеродинамичкиот тунел?

Тестирањето било спроведено во мал подзвучен аеродинамички тунел во Институтот за турбомашини при Политехничкиот универзитет во Лоѓ. Роторот бил анализиран со и без насочувач на воздухот, а коефициентот на моќност бил прикажан во зависност од брзината на врвовите на лопатките.

Зголемувањето на моќноста било поврзано со поголемиот проток на воздух низ дифузорот. Мерењата покажале и дека распределбата на притисокот и брзината на воздухот во близина на проширениот дел влијаат врз работењето на целиот систем.

Подоцнежни истражувања испитувале како обликот на прстенестиот раб влијае врз овој ефект. Во студија од 2017 година, објавена во списанието Alexandria Engineering Journal, научниците користеле компјутерска динамика на флуиди за да испитаат различни агли на работ.

Тие утврдиле дека вртлозите што се создаваат зад прстенестиот раб можат да формираат зона со уште понизок притисок зад дифузорот, со што се поттикнува вовлекување поголема количина воздух низ уредот.

Симулациите покажале дека промената на геометријата на работ директно го менува протокот на воздух низ дифузорот и областа околу роторот. Наодите укажуваат дека прстенестиот насочувач не служи само како заштита за роторот, туку со својот облик активно влијае врз околниот воздух и ја зголемува количината воздух што минува низ лопатките.

Перспективна идеја со практични ограничувања

Истражувањето ја разгледувало и можноста за примена на овој концепт кај малите ветерни турбини. Во тој период, на институтот се развивала турбина со дифузор од три киловати, наменета за работа во услови на послаб ветер.

Таквата турбина би можела да биде корисна во подрачја каде што конвенционалните турбини потешко ја претвораат енергијата на слабите ветрови во електрична енергија.

Со создавање разлика во притисокот околу насочувачот, дифузорот го засилува протокот на воздух кон роторот. Така, во соодветни услови, и мал ротор би можел да произведува значително количество енергија.

Сепак, овој дизајн има и недостатоци. Прстенестиот насочувач значително ја зголемува тежината и вкупните димензии на турбината. Поради проширениот облик, тој е изложен и на поголеми аеродинамички сили и оптоварувања од ветерот.

Турбините во реални услови мора да се приспособуваат на променливи правци на ветерот, турбуленции и механички оптоварувања што не можат целосно да се пресликаат во лабораторија.

И покрај овие ограничувања, експериментот укажува на интересна можност: наместо само да ги зголемуваат лопатките или брзината на вртење, инженерите можат активно да го обликуваат воздушниот проток околу роторот.

Лабораторискиот тест покажал дека проширениот прстенест насочувач може значително да го зголеми протокот на воздух и да го подобри производството на енергија. Колкав би бил ефектот во реални услови, сепак, треба дополнително да се утврди.

The post ДОДАЛЕ ОБИЧЕН ПРСТЕН НА ВЕТЕРНИЦА И ДОБИЛЕ 75 ОТСТО ПОВЕЌЕ СТРУЈА Инженери тестираа нов начин за искористување на ветерот appeared first on plusinfo.mk.

Повеќе од 70 лица се уапсени во Полска по двата напада со нож во училишта, во кои едно лице загина, а повеќе беа повредени. Полската полиција денеска соопшти дека се приведени вкупно 76 лица, по инцидентите што се случија во средината на неделата.

Полицијата проверила околу 50.000 училишта низ земјата, објави на социјалната мрежа X. Во рамки на проверките биле регистрирани 231 инцидент во кои полициските службеници интервенирале поради основано сомнение за сторено кривично дело.

– Забележани се вкупно 231 инцидент во кои полициските службеници интервенираа поради основано сомневање за извршено кривично дело – соопшти полицијата.

Засега нема информации за идентитетот на уапсените.

Во четвртокот, 37-годишен училиштен домаќин беше убиен, а две лица беа повредени во напад со нож во училиште во Лешчидол-Новини, населено место на околу 70 километри североисточно од Варшава. Осомничен за нападот е 15-годишник.

Ден претходно, во средата, 19-годишник со нож повреди девет лица, од кои две потешко, во стручно училиште во Остроленка, град на нешто помалку од 100 километри северно од Варшава.

По нападите, полскиот премиер Доналд Туск во четвртокот нареди редовни полициски проверки во училиштата низ земјата. Многу училишта во регионот Мазовија, кој ја опкружува Варшава, вчера останаа затворени.

Туск изјави дека 15-годишниот осомничен за нападот во Лешчидол-Новини носел кацига со камера, со која го снимал злосторството.

Полицискиот оддел за кибер-криминал дополнително истражувал дали на социјалните мрежи постои предизвик што ги поттикнува младите да извршуваат вакви напади. Сепак, полицијата вчера соопшти дека засега нема индикации дека нападите се поврзани со таков предизвик.

The post 76 УАПСЕНИ ПО НАПАДИТЕ СО НОЖ ВО ПОЛСКИТЕ УЧИЛИШТА Полицијата проверила околу 50.000 училишта appeared first on plusinfo.mk.

Полската полиција употреби дрон за да ги открива возачите кои со блендање со долгите светла ги предупредуваат другите учесници во сообраќајот дека во близина има полициска контрола.

Акцијата ја спровеле сообраќајните полицајци од Мишленице на 30 септември, на територијата на општините Мишленице и Токарнија. Од воздух бил следен сообраќајот, а полицајците ги регистрирале возачите кои со светлосен сигнал ги предупредувале оние што доаѓаат од спротивната насока дека во близина има полициска патрола.

Резултатите од акцијата се интересни: полицијата контролирала 71 возило и регистрирала вкупно 76 прекршоци. Од нив, 47 биле поврзани со користење на долгите светла за предупредување на другите возачи за полициската контрола.

Сите 47 возачи биле казнети со по 200 злоти, што е околу 46 евра, и добиле по четири казнени поени. Полската полиција потсетува дека користењето на долгите светла е регулирано со Законот за сообраќај и дека нивната употреба надвор од дозволените ситуации претставува прекршок.

Poland has started using drones to catch drivers who flash their headlights to warn others about upcoming police checkpoints

Police in Myślenice sent a quadcopter into the air to spot every “helpful” driver warning oncoming traffic.

Those who flashed their headlights were then met by another police patrol further down the road.

— NEXTA (@nexta_tv) October 6, 2026

Полицијата објаснува дека предупредувањето на другите возачи за контрола може да има и безбедносни последици. Возачот кој ќе биде предупреден може само привремено да ја намали брзината или да го промени однесувањето, а откако ќе ја помине патролата повторно да продолжи со прекршување на сообраќајните правила.

Од полицијата дополнително предупредуваат дека никогаш не се знае кого всушност предупредува возачот кој бленда. Тоа може да биде лице кое вози под дејство на алкохол или дрога, но и лице кое се бара поради друго кривично дело.

Акцијата покажува и како полицискиот дрон може да се користи за следење на однесувањето на возачите од воздух и за документирање на прекршоци што тешко би се забележале од самата патрола на патот.

The post И БЛЕНДАЊЕТО СЕ СНИМА, ДРОН ГИ ФАЌА „ПРЕДУПРЕДУВАЧИТЕ“ Полската полиција казни 47 возачи, добија казна од 46 евра appeared first on plusinfo.mk.

Полициски службеници од Полициското одделение Попова Шапка ги уапсија тројцата полски државјани К.В. (49), О.А.Б. (56) и С.К.З. (55), кои побегнаа, откако завчера со четирицикли, заедно со уште четворица свои земјаци, неовластено влегоа во воен објект.

Четворицата од групата беа уапсени, откако ја пробиле капијата и влегле во воените магацини „Еребино“. Војниците кои биле на стража ги привеле четворица од групата, а останатите тројца побегнале. Полицијата ги лоцирала тројцата и ги уапсила вчера околу 13.00 часот.

„По преземени мерки, тие се лишени од слобода поради сторено кривично дело „неовластено влегување во воени објекти” по член 350 став 1 од Кривичниот законик и по документирање на случајот, ќе бидат поднесени соодветни поднесоци“ – се вели во полицискиот билтен.

7 ПОЛЈАЦИ СО ЧЕТИРИЦИКЛИ УПАДНАЛЕ ВО ВОЕНИ МАГАЦИНИ ВО ТЕТОВО Уапсени се четворица, по тројца се трага

The post ФАТЕНИ ТРОЈЦАТА ПОЛЈАЦИ ШТО УПАДНАА ВО ВОЕН МАГАЦИН И ПОБЕГНАА Им се придружија на останатите четворица уапсени appeared first on plusinfo.mk.

14-годишно девојче на електричен тротинет беше удрено од автомобил за време на пренос во живо од полскиот град Кошчержине, додека новинарска екипа известуваше за прегазено 3-годишно дете. Моментот на несреќата беше снимен од камера на TVP Info.

Репортерот Милош Сиеливончик во саотата известуваше во живо од улицата кога слушна силен тресок зад себе. Камерата сними автомобил што ја удри девојчето на тротинетот додека свртуваше на споредна улица.

Девојчето падна на земја по ударот, а новинарската екипа веднаш му се приближи и повика брза помош, по што беше однесено во болница на преглед.

Според медиумот, таа носела кацига во времето на несреќата.

Медиумот потоа извести дека возачот бил 20-годишен маж на кој не му било дозволено да вози. По несреќата, тој првично го напуштил местото на настанот.

Репортерот известувал од местото на настанот каде што  неколку часа претходно е прегазено 3-тригодишно момче.

Moment uderzenia samochodu w 14-latkę jadącą na hulajnodze elektrycznej uchwycony przez kamerę TVP Info pic.twitter.com/Jldfuas0Ka

— tvp.info (@tvp_info) September 26, 2026

The post 🎥 ИЗВЕСТУВАЛ ЗА СМРТНО ПРЕГАЗЕНО ДЕТЕ, КАМЕРАТА СНИМИ УДАР ВО ДРУГО ДЕТЕ Несекојдневен медиумски извештај во Полска appeared first on plusinfo.mk.

Руски дрон погоди на два километри од полската граница: Полска подигна авиони, евакуиран граничниот премин

Руски реактивен дрон погодил подрачје недалеку од граничниот премин Дорохуск, во близина на местото Јагодин во западна Украина, на само околу два километри од границата со Полска. Поради нападот, полската армија ги подигнала авионите и ги ставила системите за противвоздушна одбрана во состојба на готовност, додека граничниот премин бил евакуиран.

Русија во понеделникот попладне со дронови нападнала цели во западна Украина. Според првичните информации од градоначалникот на општина Дорохуск, Војчех Сава, дронот погодил подрачје покрај стариот терминал на украинската страна од границата. Локалните власти соопштиле дека од местото се слушнала силна експлозија, а бил забележан и црн чад.

BREAKING:

A Russian suicide drone just struck near the Yahodyn border crossing with Poland pic.twitter.com/C3YsgR4X4H

— Visegrád 24 (@visegrad24) September 28, 2026

Претходно, околу 17:15 часот, потполковникот Јацек Горишевски, портпарол на Оперативната команда на вооружените сили на Полска, за „TVN24“ изјавил дека сè уште нема информации што точно погодил беспилотниот летечки објект.

– Недалеку од преминот во Дорохуск повторно удри беспилотно летало на Руската Федерација, повторно во непосредна близина на местото Јагодин – рекол Горишевски.

Претходно, руски дрон паднал во близина на бензинска пумпа во Јагодин на 13 септември.

Додека полската армија ги подигнувала авионите и ги ставала системите за противвоздушна одбрана во состојба на готовност, во Лублинското Војводство се огласиле сирени за воздушна опасност поради рускиот напад во непосредна близина на границата.

На снимките од подрачјето се слушаат сирени, додека вознемирени граѓани излегуваат надвор и загрижено гледаат кон небото.

BREAKING: A Russian Geran-5 drone struck the truck parking area at the Yahodyn border crossing in Volyn Oblast, about 1 km from the Polish border. pic.twitter.com/D9kyC2srKK

— Faytuks Network (@FaytuksNetwork) September 28, 2026

Полскиот вицепремиер и министер за одбрана Владислав Косинијак-Камиш потврдил дека рускиот реактивен дрон паднал на околу два километри од полската граница.

– Уште еден руски напад врз западна Украина. Реактивен дрон погоди на украинската страна, на околу два километри од граничниот премин со Полска во Дорохуск. Не дошло до нарушување на полскиот воздушен простор. Нашите системи за противвоздушна одбрана и авионите беа подготвени за дејствување. По укинувањето на тревогата, авионите се вратија во базите, а системите за противвоздушна одбрана преминаа во режим на набљудување и готовност – напишал тој на мрежата „X“.

Заменичката министерка за внатрешни работи и администрација Магдалена Рогуска изјавила во емисијата „Tak jest“ на „TVN24“ дека граничниот премин морал да биде евакуиран за време на нападот.

– Најпрво беше прекината граничната контрола на преминот во Дорохуск, а потоа навистина беше неопходна евакуација бидејќи ситуацијата беше многу динамична. Дронот се најде многу блиску до границата – рекла Рогуска.

Полските власти нагласиле дека, и покрај непосредната близина на ударот, не дошло до нарушување на воздушниот простор на Полска. По престанувањето на опасноста, воените авиони се вратиле во своите бази, додека системите за противвоздушна одбрана повторно биле ставени во режим на набљудување и готовност.

The post 📽️ РУСКИ ДРОН ПОГОДИ НА ДВА КИЛОМЕТРИ ОД ПОЛСКАТА ГРАНИЦА Полска подигна авиони, евакуиран граничниот премин appeared first on plusinfo.mk.