Голем дел од Европа е зафатен од силен топлотен бран кој носи температури блиску до 40 степени Целзиусови, а во некои подрачја и повисоки. Метеоролозите предупредуваат дека жештините ќе продолжат и во наредните денови, додека властите во повеќе држави издаваат предупредувања поради ризици за здравјето на населението, можни пожари и силни невремиња по завршувањето на жешкиот период.

Најтешко погодени се Франција, Шпанија, Италија и делови од Централна Европа. Во Франција се активирани највисоки нивоа на предупредување во повеќе региони, а температурите на места достигнуваат и надминуваат 40 степени. Поради жештините се откажуваат јавни настани, затворени се училишта, а железничкиот сообраќај се соочува со нарушувања поради прегревање на инфраструктурата.

Шпанија се соочува со првиот голем топлотен бран ова лето. Во поголем дел од земјата се активни портокалови и црвени предупредувања, а температурите во внатрешноста достигнуваат околу 40 степени. Властите предупредуваат на зголемен ризик од шумски пожари, додека жителите и туристите бараат засолниште од сонцето во најтоплите часови од денот.

Во Италија се издадени црвени предупредувања за повеќе големи градови, меѓу кои Рим и Милано. Температурите од 36 до 40 степени создаваат проблеми во секојдневниот живот, особено во туристичките центри, каде што голем број посетители бараат разладување покрај фонтани и климатизирани простории.

Германија е под предупредувања за високи температури во речиси целата земја. Во некои региони се измерени и до 38 степени, а метеоролозите предупредуваат дека по екстремната жештина може да следуваат силни грмотевични невремиња со обилни врнежи и силен ветер.

Во Полска температурите се значително над просекот за овој период од годината, а жителите на Варшава и другите градови спас од горештините бараат покрај реките, езерата и зелените површини.

Белгиските железници соопштија дека некои возови нема да сообраќаат оваа недела поради очекуваните рекордни високи температури од 37 степени, и ризикот од оштетување на пругите. Управата на железницата стравува дека шините ќе се деформираат и дека постои ризик од почести дефекти на возовите, што би можело да доведе до блокирање на целиот сообраќај на одредени места.

собено тешка е состојбата во Хрватска, каде што топлотниот бран, според прогнозите, ќе трае најмалку уште една седмица и дополнително ќе се засилува. Државниот хидрометеоролошки завод издаде предупредувања за Славонија, загрепскиот регион, Истра и Кварнер поради високи температури и можност за силни бури. Температурите во најголем дел од земјата се движат меѓу 30 и 35 степени, а на поединечни локации и повисоко. Хрватските власти предупредуваат дека продолжената изложеност на сонце може да доведе до исцрпеност и топлотен удар, додека лекарите посочуваат дека особено се загрозени лицата со кардиоваскуларни, респираторни и хронични заболувања. Дополнителна загриженост предизвикува можноста по жештините да следуваат локални невремиња со грмежи, силен ветер и град.

Во Србија, Републичкиот хидрометеоролошки завод најави продор на многу топла воздушна маса од северна Африка. Температурите во повеќе делови од земјата достигнуваат од 30 до 35 степени, а во Белград и Војводина се очекуваат и таканаречени тропски ноќи, кога температурата не паѓа под 20 степени.

Словенија, која неодамна беше погодена од силни бури со град и оркански налети на ветер, повторно се наоѓа во зона на нестабилно време. Метеоролозите предупредуваат дека комбинацијата од жештина и навлегување посвеж воздух може да предизвика нови силни грмотевични процеси во делови од земјата.

Високи температури се регистрираат и во Австрија, Унгарија, Чешка, Романија, Бугарија, Грција, Португалија и други делови од Балканот и Централна Европа. Во Чешка се очекуваат температури до 36 степени, додека во делови од Романија и Бугарија прогнозите најавуваат вредности блиску до 38 степени.

Експертите предупредуваат дека ваквите топлотни бранови стануваат сè почести, подолготрајни и поинтензивни поради климатските промени. Покрај ризиците за здравјето на луѓето, жештините влијаат и врз економијата, транспортот, снабдувањето со електрична енергија и земјоделството.

Лекарите предупредуваат дека високите температури можат да ги влошат состојбите кај лицата со кардиоваскуларни, респираторни, бубрежни или ментални заболувања. Поради тоа, се препорачува редовно разладување на телото и внесување доволно течности, пред сè негазирана вода и нискокалорични пијалоци, а да се избегнуваат кофеин, алкохол и шеќер.

Здравствените власти низ Европа апелираат граѓаните да избегнуваат престој на директно сонце помеѓу 10 и 17 часот, да внесуваат доволно течности и редовно да го разладуваат телото. Посебно внимателни треба да бидат децата, бремените жени, постарите лица и хронично болните. Се препорачува носење светла и лесна облека од природни материјали, заштита на главата и избегнување алкохол, кофеин и засладени пијалаци. За лицата кои работат на отворено се препорачуваат почести паузи во сенка и редовен внес на вода во текот на денот.

The post ТОПЛОТЕН БРАН ГИ ЗОВРЕ ЕВРОПА И БАЛКАНОТ Температурите се доближуваат до 40 степени, аларми во повеќе земји appeared first on plusinfo.mk.

Семјон Скрепеки, руски карикатурист кој со години јавно го критикуваше Кремљ, беше застрелан во близина на белоруската граница. Истрагата е во тек, а мотивот засега не е познат.

Само неколку дена откако протестирал пред руската амбасада во Берлин држејќи карикатура со Владимир Путин, рускиот уметник Семјон Скрепецки бил застрелан на улица во источна Полска.

Четириесет и четиригодишниот руски државјанин бил нападнат во градот Бјала Подласка, недалеку од границата со Белорусија. Напаѓачот, или напаѓачите, избегале од местото на настанот, а Скрепецки подоцна им подлегнал на повредите.

Од карикатури до егзил

Полските медиуми објавија дека Скрепецки бил познат по сатиричните дела во кои ги исмејувал Владимир Путин, Рамзан Кадиров и други личности поврзани со руската власт.

Според објавените информации, тој ја напуштил Русија во 2021 година поради страв од политички прогон.

Само неколку дена пред убиството учествувал на протест пред руската амбасада во Берлин. На фотографиите што се проширија на социјалните мрежи се гледа како држи уметничко дело на кое Јосиф Сталин го храни младиот Путин.

Semyon Skrepetsky,
RIP https://t.co/mzJtBVxnuI

— Septimia Zenobia (@SeptimiaZ503709) June 15, 2026

Russian artist Semyon Skrepetsky was killed in Poland: he had previously harshly mocked Putin and Kadyrov

The murder took place in the city of Biała Podlaska, near the border with Belarus, where a refugee camp is located.

After moving from Russia, Skrepetsky passed through… pic.twitter.com/M6HatZf7bZ

— NEXTA (@nexta_tv) June 15, 2026

Кој пукал сè уште не се знае

Полската полиција потврди дека рускиот државјанин бил застрелан на улица во близина на центарот на градот.

Портпаролот на полицијата Анджеј Фијолек изјави дека сè укажува на целно убиство.

– Ако некој се приближи до одредено лице на улица и пука, сè укажува дека имало намера да се убие – изјави Фијолек.

Според дел од медиумите, белоруски државјанин бил приведен во близина на белорускиот конзулат во Бјала Подласка, но властите засега не потврдија официјално апсење.

Случај што буди стари спомени

Убиството се случува во период на зголемени тензии меѓу Полска и Русија.

Варшава со години ја обвинува Москва, како и нејзиниот сојузник Белорусија, за сајбер напади, дезинформациски операции и обиди за дестабилизација.

Засега нема јавни докази што директно го поврзуваат нападот со руски државни структури, а истражителите не соопштија можен мотив.

Сепак, доколку се потврди дека станува збор за целно убиство на критичар на Кремљ во егзил, случајот неизбежно ќе биде споредуван со претходните напади врз руски дисиденти и новинари.

The post КОЈ ПУКАШЕ ВО УМЕТНИКОТ КРИТИЧАР НА ПУТИН? Мистериозно убиство во Источна Полска appeared first on plusinfo.mk.

Филмот „Силјан“ на македонската режисерка Тамара Котевска ја освои FIPRESCI наградата на 66. Krakow Film Festival во Полска.

Станува збор за признание што го доделува Меѓународната федерација на филмски критичари, една од најрелевантните професионални организации во областа на филмската критика. Наградата има особена тежина бидејќи доаѓа од меѓународната критичка јавност и претставува признание за авторската вредност, филмскиот јазик и уметничката сила на делото.

Со ова признание, „Силјан“ продолжува да го надградува својот меѓународен успех и силниот фестивалски одек што филмот го остварува на светската сцена.~

FIPRESCI наградата на Krakow Film Festival е уште една важна потврда за позицијата на Тамара Котевска како еден од најпрепознатливите современи авторски гласови од Македонија, но и за присуството на македонскиот документарен филм во меѓународниот филмски контекст.

The post „СИЛЈАН“ ГО ОСВОИ И СВЕТОТ НА ФИЛМСКАТА КРИТИКА Тамара Котевска наградена на престижниот фестивал во Краков appeared first on plusinfo.mk.

Полскиот премиер Доналд Туск денеска апелираше до претседателите на Полска, Карол Навроцки, и на Украина, Володимир Зеленски, да го решат спорот околу новото контроверзно име на украинската воена единица што ги величи украинските националисти од Втората светска војна, пред спорот да ја уништи солидарноста на Полјаците со Украинците.

„Бидејќи дипломатијата не донесе никакви резултати, јавно апелирам до претседателите Навроцки и Зеленски да имаат директен, искрен разговор. Пред емоциите да ја уништат нашата солидарност родена од руската закана. Интересот на двете наши земји е соработката, а конфликтот е во интерес на Москва. Претпоставувам дека тоа е очигледно за сите нас“, напиша полскиот премиер на Икс.

На крајот на мај, претседателот Навроцки побара на Зеленски да му биде одземен полскиот Орден на Белиот Орел поради величење на украинските националисти кои, за време на Втората светска војна во борбата за независност против Советите, соработувале со нацистите, а во регионот Волинија извршиле етничко чистење и убиле околу 100.000 Полјаци и Чеси што живееле во селата на запад од денешна Украина, како и нивните еврејски соседи.

„За жал, претседателот Зеленски докажа дека Украина, бидејќи ги слави бандитите, убијците од Украинската бунтовничка армија (УНА), не е ментално подготвена да биде дел од европското семејство“, реагираше Навроцки на одлуката на Зеленски да ја именува една од единиците на украинската армија како Херои на УНА.

Комисијата на Редот на Белиот Орел денеска се состанува за да го разгледа барањето на полскиот претседател, иако тој самиот може да го повлече без оглед на нејзиното мислење, но таа одлука потоа мора да ја потпише премиерот Туск, кој исто така остро реагираше, но се обидува да не дозволи спорот да фрли сенка врз односите додека Украина е во војна и се брани од Русија.

За полската страна, таканаречениот Волински масакр, кога единици на Украинската бунтовничка армија (УНА), вооружена фракција на Организацијата на украински националисти на Степан Бандера, нападнаа и убија луѓе во 150 полски, чешки и еврејски села во 1943 година, претставува воено злосторство – геноцид.

Украинските историчари, особено по руската анексија на Крим, го истакнуваат фактот дека УНА се борела против Црвената армија за време на Втората светска војна, игнорирајќи ја соработката со нацистите на Хитлер, и тие ги гледаат етничкото чистење и Волинскиот масакр како симетрични темни воени настани за кои се одговорни двете страни.

„Му кажав (на Петар Порошенко) уште порано дека со идеологијата на Бандера и целиот тој багаж, тој нема да влезе во Европската Унија, во НАТО. Нема да оди на Запад. И треба да го повторуваме тоа одново и одново“, изјави денеска Јарослав Качински, лидерот на опозициските полски конзервативни националисти, во интервју за порталот „Виртуелна Полска“.

Лидерот на „Право и правда“ им порача на Украинците да најдат други национални херои, а го обвини и Зеленски дека го сторил тоа затоа што размислува за реизбор, бидејќи веројатно има некои навестувања дека војната наскоро ќе заврши.

Спорот околу тоа дали на Зеленски ќе му биде одземен Орденот на Белиот орел, што би било втор пат во историјата кога станува збор за највисокото полско одликување, се заканува да ја загрози големата меѓународна конференција за обнова на Украина на крајот од месецот во Гдањск, каде што се очекува Зеленски да биде главен гостин.

Патем, откако избувна спорот, украинскиот претседател избра да патува до Лондон преку Молдавија, наместо по стандардната рута преку Полска и аеродромот во Жешов.

The post СЛАВЕЈЌИ НАЦИСТИ УКРАИНА ПОКАЖА ДЕКА НЕ Е МЕНТАЛНО СПРЕМНА ЗА ЕУ Полска револтирана од односот на Зеленски кон наследството на Бандера appeared first on plusinfo.mk.

Украинскиот претседател Володимир Зеленски почнал да го користи молдавскиот воздушен простор за летови кон Европа, избегнувајќи ја Полска поради затегнатите односи со Варшава во последно време, објавуваат украинските портали.

Според наводите, Зеленски претходно најчесто за меѓународни патувања го користел полскиот аеродром Жешов–Јасионка, кој од почетокот на конфликтот во Украина има важна логистичка улога за Киев и западните сојузници. Меѓутоа, вчера тој за Лондон отпатувал преку Кишињев.

Официјално објаснување за промената на рутата не е соопштено, но украинските портали наведуваат дека промената е последица на заострувањето на односите меѓу Украина и Полска.

Несогласувањата на релација Киев – Варшава се интензивираа кон крајот на минатиот месец кога Зеленски на украинска воена единица ѝ додели почесна титула „Херои на Украинската востаничка армија (УПА)“. Одлуката предизвика остри негодувања во Полска, каде Украинската востаничка армија се поврзува со масовни страдања на полското население за време на Втората светска војна.

Полските власти го оценија потегот како сериозна грешка и побараа јавно извинување од Киев. Во Варшава, според медиумските написи, се споменувала и можност за преиспитување на највисокото полско одликување што претходно му беше доделено на Зеленски.

Киев повика на продолжување на дијалогот и фокус на заедничките безбедносни предизвици, но новите информации за промената на рутата говорат дека односите меѓу Украина и Полска одат во надолна линија.

Инаку, во Лондон, Зеленски му порача на британскиот премиер Кир Стармер дека на Украина ѝ е потребно дополнително ракетно вооружување за системите за противвоздушна одбрана.

Тој наведе дека двајцата разговарале и за заштитата на украинската енергетска инфраструктура, како и за подготовките на земјата за претстојната зима.

Стармер вчера во Даунинг стрит беше домаќин на Зеленски, францускиот претседател Емануел Макрон и германскиот канцелар Фридрих Мерц, на разговори посветени на европската поддршка за Украина и на напорите за ставање крај на војната.

The post ЗЕЛЕНСКИ ЈА ЗАОБИКОЛУВА ПОЛСКА ПОРАДИ ЗАТЕГНАТИТЕ ОДНОСИ СО ВАРШАВА Летал за Лондон преку Молдавија appeared first on plusinfo.mk.

Аеродромот „Св. Апостол Павле“ во Охрид денеска ги пречека првите 239 патници од Вроцлав, Полска, кои пристигнаа со новата авиолинија на авиокомпанијата Wizz Air. Со ова официјално започна сообраќањето на новата редовна линија меѓу Охрид и еден од најатрактивните полски градови.

По повод првиот лет, ТАВ Македонија организираше свечен пречек за патниците, кои беа послужени со традиционално охридско ѓомлезе од хостеси облечени во македонски народни носии, претставувајќи дел од локалната култура и гостопримство.

Новата авиолинија Охрид – Вроцлав ќе сообраќа двапати неделно, секоја среда и недела. Од ТАВ Македонија најавија дека веќе на 9 јуни ќе започне и новата линија од Катовице, која ќе се реализира двапати неделно, а во шпицот на летната сезона и трипати неделно.

Генералниот директор на ТАВ Македонија, Неџат Курт, истакна дека новите авиолинии претставуваат значаен чекор во зајакнувањето на меѓународната поврзаност на Охрид и развојот на туризмот.

-Новите линии од Вроцлав и Катовице до Аеродромот „Свети Апостол Павле Охрид“ претставуваат силен поттик за понатамошен развој на туризмот во Охрид, како и за продлабочување на економските и културните врски меѓу Македонија и Полска. Очекуваме овие дестинации значително да придонесат за зголемување на бројот на посетители и за подобрување на видливоста на Охрид на европската туристичка мапа. Исто така, ги охрабруваме македонските патници да ги откријат двата живописни полски градови- изјави Курт.

Вера Јардан, менаџер за корпоративни комуникации во Wizz Air, оцени дека новите линии ќе понудат повеќе можности за патување и ќе придонесат за раст на туристичката размена меѓу двете земји.

-Со задоволство го прославуваме отворањето на двете нови авиолинии на Wizz Air што го поврзуваат Охрид со Вроцлав и Катовице, дополнително зајакнувајќи ја поврзаноста на Охрид со Полска. Овие нови услуги ќе обезбедат повеќе можности за патување за патниците, а воедно ќе придонесат и за пораст на туризмот меѓу двете земји. Уверени сме дека обете линии ќе бидат топло пречекани од патниците на двата пазари и сме благодарни на сите патници што продолжуваат да го избираат Wizz Air и да летаат со нас за да откриваат нови дестинации- изјави Вера Јардан.

Авиокомпанијата моментално опслужува летови од аеродромот во Охрид до осум дестинации, вклучувајќи ги и двете нови рути: Вроцлав, Катовице, Дортмунд, Меминген/Минхен, Базел-Милуз, Штутгарт, Милано-Малпенса и Братислава.

Во текот на летниот распоред на летови, 8 авиокомпании ќе опслужуваат летови до 17 дестинации од Аеродромот „Свети Апостол Павле“ Охрид. Од нив, 14 се редовни и сезонски авиолинии, додека три се чартер-летови.

The post 239 ПОЛСКИ ТУРИСТИ СЛЕТАА ВО ОХРИД Визер ја стартуваше авиолинијата од Вроцлав appeared first on plusinfo.mk.

Лажна дојава за пожар во семејниот дом на полскиот претседател Карол Навроцки во Гдањск предизвикала итна интервенција на пожарникарите, кои влегле во објектот откако биле алармирани дека има опасност од пожар, јавуваат полските медиуми.

Според информациите, станува збор за уште една во серијата лажни дојави за итни случаи, кои во последните денови ги оптоваруваат службите во Полска.

Портпаролот на претседателот, Рафал Лешкјевич, потврди дека дојавата пристигнала преку бројот за итни случаи 112 и дека службите веднаш реагирале.

– Денеска беше упатен уште еден лажен повик на бројот 112. Овојпат се однесуваше на пожар во семејната куќа на претседателот на Република Полска, Карол Навроцки, во Гдањск. Додека станарите беа отсутни, службите ја пробија вратата и влегоа во станот – изјави Лешкјевич.

Тој предупреди дека ваквите лажни дојави стануваат сериозен безбедносен проблем и дека службите за итни случаи веќе подолг период се под притисок од слични пријави.

– Станува збор за организирани провокации. Метата денес се јавни личности, но утре тоа може да биде секој граѓанин. Потребна е брза и решителна реакција – додаде тој.

Полскиот премиер Доналд Туск соопшти дека е во постојан контакт со надлежните институции и дека е свикана итна владина седница.

– Уште една телефонска провокација, овојпат за пожар во семејниот стан на претседателот Навроцки во Гдањск. Во постојан контакт сум со министрите и службите. Акциите на провокаторите се насочени против државната безбедност. Ќе ги искористиме сите механизми за да ги идентификуваме и процесираме – порача Туск.

Службите најавија истрага за идентификување на лицата кои стојат зад лажните дојави.

The post ЛАЖНА ДОЈАВА ЗА ПОЖАР ВО ДОМOT НА ПОЛСКИОТ ПРЕТСЕДАТЕЛ Пожарникари насилно влегле во станот во Гдањск appeared first on plusinfo.mk.

Британија, Полска, Канада и Италија ги повикаа израелските амбасадори поради видеото што го објави министерот за национална безбедност на Израел Итамар Бен-Гвир. Снимката прикажува приведени активисти од флотилата за Газа. Реакции стигнаа и од Европската Унија, додека дел од приведените активисти започнаа штрајк со глад во израелските затвори.

Бен-Гвир објави видео на кое се гледаат како активистите врзани со пластични стеги клечат на земја. Според израелски и меѓународни медиуми, активистите биле приведени откако израелските сили ја пресретнале флотилата „Глобал Сумуд“ во меѓународни води.

Лондон соопшти дека снимката и однесувањето кон активистите предизвикале сериозна загриженост.

„Таквото однесување ги крши најосновните стандарди на почит кон луѓето и нивното достоинство“, се наведува во соопштението на британското Министерство за надворешни работи кое бара објаснување од Израел за условите во кои се држат активистите.

„Понижување и бес“ ја тресат Европа

Полскиот министер за надворешни работи Радослав Сикорски објавил дека израелскиот вршител на должноста во Варшава ќе биде итно повикан на разговор. Варшава побарала извинување поради, како што навел Сикорски, „крајно несоодветното однесување“ на член на израелската влада.

Полска истовремено побарала итно ослободување на своите државјани кои биле дел од флотилата.

Бен-Гвир веќе е под санкции од Канада

Канада исто така го повикала израелскиот амбасадор поради притворањето на активистите од флотилата „Глобал Сумуд“. Канадскиот премиер Марк Карни соопштил дека официјална Отава бара гаранции за безбедноста на канадските државјани кои учествувале во мисијата. Организаторите тврдат дека во флотилата имало 11 канадски државјани.

„Одвратниот третман на цивилите на флотилата, вклучително и оној документиран во видеото што го сподели Итамар Бен-Гвир, е неприфатлив“, напишал Карни на Икс.

Карни потсетил дека Канада веќе вовела санкции против Бен-Гвир, меѓу кои замрзнување на средства и забрана за патување.

ככה אנחנו מקבלים את תומכי הטרור

Welcome to Israel pic.twitter.com/7Hf8cAg7fC

— איתמר בן גביר (@itamarbengvir) May 20, 2026

„Неприфатливо и погрешно“ 

Италијанската премиерка Џорџа Мелони побара официјално извинување од Израел поради третманот на италијанските активисти. Италијанскиот министер за надворешни работи Антонио Тајани го повикал израелскиот амбасадор за да побара објаснување.

Рим оценил дека израелските власти покажале целосно непочитување кон барањата на италијанската влада.

Портпарол на Европската комисија го опишал третманот кон активистите како „целосно неприфатлив“.

Високата претставничка на ЕУ за надворешна политика и безбедност Каја Калас, пак, изјави:

– Однесувањето на израелскиот министер Итамар Бен-Гвир е недостојно за секој што извршува функција во демократска држава – изјавила Калас.

Реакција испратил и претседателот на Европскиот совет Антонио Кошта. Тој навел дека е потресен од начинот на кој биле третирани активистите и побарал нивно итно ослободување. Сличен став објавила и британската министерка за надворешни работи Ивет Купер.

И Нетанјаху го прекори министерот

Реакција стигна и од Израел.

Израелскиот премиер Бенјамин Нетанјаху изјавил дека Израел има право да спречува, како што рекол, „провокативни флотили на поддржувачите на Хамас“, но оценил дека начинот на кој биле третирани активистите не е во согласност со вредностите и нормите на Израел.

Флотилата „Глобал Сумуд“ соопштила дека Израел ги запленил сите 50 бродови од конвојот за помош за Газа. Во мисијата учествувале 428 лица од 44 држави, кои испловиле од Мармарис, Турција, со намера да ја пробијат блокадата на Газа што трае од 2007 година.

Активстите ќе бидат депортирани во Турција

Активистите денеска се ослободени и во текот на денот ќе бидат депортирани во Турција.

Во соопштението на израелската организација за човекови права „Адалах“ се наведува дека околу 430 активисти се ослободени од затвор во јужен Израел и ќе бидат депортирани преку аеродромот „Рамон“ во близина на Еилат на Црвено Море.

Претходно, дел од приведените активисти започнале штрајк со глад во израелските затвори. Организаторите на флотилата тврдат дека најмалку 87 лица се приклучиле на протестот. Тие навеле дека штрајкот претставува солидарност со  над 9.5000 палестински затвореници што се наоѓаат во израелските затвори.

The post 📽️ ЕУ „ЗОВРЕ“ ПОРАДИ ВИДЕОТО НА БЕН-ГВИР Повикани амбасадори на Израел, се бара ослободување на активистите appeared first on plusinfo.mk.

Новиот унгарски премиер Петер Маѓар, заедно со полскиот премиер Доналд Туск, од Варшава испрати порака дека е време повторно да оживее влијанието на Вишеградската група.

Маѓар предложил В4 да се прошири и со земјите од Западен Балкан кои сè уште не се дел од Европската Унија.

– Подготвен сум да ја прошириме соработката на Вишеградската четворка и на други земји, можеби скандинавските држави, Австрија, Хрватска, Словенија, Романија и земјите од Западен Балкан кои уште не влегле во ЕУ – изјавил Маѓар на заедничката прес-конференција со Туск.

Полскиот премиер порача дека Централна и Источна Европа повеќе не се периферија, туку простор каде се решава иднината на континентот.

Маѓар изразил надеж дека Унгарија до крајот на своето претседавање во јуни ќе организира самит на Вишеградската група во Будимпешта.

Полска и Унгарија како една тупаница

Туск директно посочил дека односите меѓу Полска и Унгарија биле нарушени во последните години од владеењето на Виктор Орбан.

Сепак, тој нагласил дека со доаѓањето на Маѓар гледа можност двете држави повторно да дејствуваат координирано во Европската Унија.

– Петер Маѓар е гарант дека Полска и Унгарија повторно ќе делуваат како една тупаница во ЕУ, бидејќи имаме заеднички интереси – изјавил Туск.

Азилот за полските функционери повторно отвори стара рана

За време на посетата во Варшава, Маѓар се осврнал и на чувствителното прашање околу азилот што претходната унгарска влада им го дала на поранешниот полски министер за правда Збигњев Зјобро и неговиот заменик Марќин Романовски.

Двајцата во Полска се обвинети за злоупотреба на службената положба и финансиски малверзации.

– Будимпешта и Унгарија повеќе нема да бидат прифатилиште за кривично прогонувани престапници. Едниот од нив побегна во САД, а другиот, колку што е познато, преминал во Србија. Подготвен сум да помогнам овие лица да бидат вратени во Полска – истакнал Маѓар.

Тој појаснил дека европскиот налог за апсење нема правна сила во Србија и во САД, каде што тие на крајот нашле засолниште.

Што значи ова за Балканот?

Предлогот на Маѓар доаѓа во време кога Брисел бара нови модели за приближување на Западен Балкан кон Европската Унија.

Идејата за поширока Вишеградска група би можела да отвори нов политички и економски канал меѓу Централна Европа и Балканот, особено во делот на енергетиката, безбедноста и инфраструктурата.

The post ВИШЕГРАДСКА ГРУПА ПЛУС ЗАПАДЕН БАЛКАН Маѓар и Туск предлагаат нова оска во Европа appeared first on plusinfo.mk.

Одлуката на САД да го прекинат планираното распоредување војници во Полска предизвикала сериозен хаос откако се откри дека важното известување останало непрочитано во електронската пошта на началникот на Генералштабот, генерал Вјеслав Кукула.

Според бриселски „Политико“, американската порака пристигнала уште во понеделник преку класифициран комуникациски систем, но не била проследена до командата и Министерството за одбрана.

Поголемиот дел од армијата за промената дознал од медиумите.

„Сите дознаваме од медиумите“

Американскиот медиум „Арми тајмс“ во средата прв објавил дека е прекината ротацијата на повеќе од 4.000 американски војници од Втората оклопна бригада на Првата коњаничка дивизија. Дури потоа полската команда била официјално информирана.

– Сите сме бесни што за сè дознаваме од медиумите, а не од нашите претпоставени – рекол извор близок до Генералштабот.

Организациски хаос

Извори блиски до генералот Кукула тврдат дека пораката од Американците била многу кратка и испратена преку редовни воени канали.

Еден од соговорниците оценил дека проблемот лежи во системот за управување со тајната преписка.

– Началникот на Генералштабот често е отсутен и многу зафатен. Затоа треба да овласти други да ја читаат тајната преписка – рекол изворот.

Пентагон смирува, офицерите не веруваат

Пентагон во меѓувреме се обидел да ја намали тежината на ситуацијата и соопштил дека не станува збор за изненадна одлука.

Од полска страна, вицепремиерот Владислав Косињак-Камиш уверил дека американското присуство нема трајно да се намали.

Но, дел од офицерите тврдат дека бројот на американски војници сепак ќе биде намален, иако можеби не во обемот што првично се споменувал во медиумите.

The post ГО СМЕНИЛЕ ПЛАНОТ ЗА ПОЛСКА, МЕЈЛОТ ОСТАНАЛ НЕПРОЧИТАН Американците нема да испратат 4.000 војници appeared first on plusinfo.mk.