Дваесет и пет години се доволно долг период за еден историски и политички договор да престане да се оценува само низ емоциите, стравовите и политичките околности во кои бил создаден и да почне да се оценува според она што навистина го произвел во општеството. Затоа пораките што ги слушнавме по повод 25-годишнината од Охридскиот рамковен договор заслужуваат внимание.

Беким Сали порача дека различноста не треба да ја гледаме како слабост, туку како вредност и дека соживотот не значи само да живееме едни покрај други, туку „едни со други и едни за други“. Александар Николоски, пак, нагласи дека Рамковниот договор не бил договор на победници и поразени и предупреди на политичари кои етничките поделби и национализмот ги употребувале за сопствени политички интереси.

Таквиот тон го поздравувам. Но не затоа што сметам дека по 25 години треба повторно некритички да го величаме Охридскиот рамковен договор. Напротив. Го поздравувам затоа што можеби претставува навестување дека конечно созрева политичка свест дека Договорот не е политичка сопственост на една партија, една етничка заедница или еден коалициски партнер.

И уште поважно, дека неговата имплементација не може бесконечно да биде оправдување за проширување на етничките барања, создавање политички привилегии и механизми кои во самиот Договор никогаш не биле предвидени.

Договорот го запре конфликтот, но неговата имплементација мора да се оценува критички

Дваесет години години по ред, јавни анализирајќи ги позитивните и негативните последици од Рамковниот договор, укажав дека неговата најголема историска придобивка беше отфрлањето на вооруженото насилство како средство за остварување политички цели и прекинувањето на вооружените судири.

Истовремено предупредив дека начинот на кој Договорот подоцна беше политички толкуван и селективно применуван создава сериозни проблеми за мултиетничкиот и граѓанскиот карактер на државата.

Тогаш предупредив и дека Македонија постепено се турка кон модел во кој политичките односи сè повеќе се сведуваат на односи меѓу Македонците и Албанците, додека Турците, Ромите, Србите, Власите, Бошњаците и другите заедници се ставаат во втор план.

Пет години подоцна немам причина да се откажам од таа теза. Напротив, сметам дека токму 25-годишнината е момент кога треба мирно, рационално и без етнички страсти да се постави прашањето: дали одредени механизми создадени во 2001 година и практиките изградени подоцна треба непроменети да ги пренесуваме во следните децении или конечно треба да започнеме со нивно демократско, уставно и институционално преиспитување?

Рамковниот договор не е бланко-меница

Охридскиот рамковен договор не е и не смее да стане бланко-меница што секоја нова генерација политичари ќе ја дополнува со нови барања.

Постои суштинска разлика меѓу заштита на правата и создавање привилегии. Постои разлика меѓу рамноправност и политичко условување. Постои разлика меѓу заштита на етничкиот идентитет и претворање на етничката припадност во трајна политичка валута за функции, вработувања, институционално влијание и нови законски исклучоци.

Затоа секогаш кога ќе се појави ново барање треба да поставиме три едноставни прашања: Каде го пишува тоа во Рамковниот договор? Каде го пишува тоа во Уставот? И дали истото право, под еднакви услови, би им го признале на сите други граѓани и заедници? Ако одговорот е негативен, тогаш не станува збор за имплементација на Рамковниот договор, туку за негово политичко проширување. А тоа мора да престане.

Мајскиот договор, кој заврши во кантата на политичката историја, треба вечно да остане таму

Особено е време да се напушти митот за т.н. Мајски договор како некаква трајна обврска според која најголемата албанска политичка партија автоматски треба да биде дел од секоја влада. Политичкиот договор меѓу Никола Груевски и Али Ахмети од мај 2007 година произлезе од конкретна политичка ситуација и вон-институционални преговори меѓу политички лидери. Но такво правило не е дел од Охридскиот рамковен договор, ниту произлегува од Уставот.

Неформален договор меѓу двајца партиски лидери не може со текот на времето да се претвори во непишана уставна норма. Ниту една македонска партија нема однапред гарантирано место во власта. Зошто тогаш би го имала која било албанска партија? Владата се формира врз основа на парламентарно мнозинство, во согласност со Уставот, а не врз основа на етнички автоматизам. Тоа правило мора да важи и денес и утре, без оглед дали станува збор за ДУИ, ВЛЕН или некоја трета политичка структура што ќе се појави во иднина.

ВЛЕН има можност да покаже поинаква политичка култура

Токму затоа изјавата на Беким Сали може да има поголемо значење од една пригодна порака за годишнина. Ако тоа е вистинскиот политички правец на ВЛЕН, тогаш тој треба да биде поздравен.

Албанското политичко претставување не мора постојано да се легитимира преку нови и нови етнички барања. Албанците во Македонија не се само припадници на етничка заедница. Тие се граѓани на оваа држава, работници, професори, лекари, правници, земјоделци, претприемачи, студенти и пензионери. И тие, исто како Македонците, Турците, Ромите, Србите, Власите, Бошњаците и сите други, имаат потреба од правна држава, ефикасна администрација, добро образование, функционално здравство, економски развој и перспектива за своите деца.

Затоа е крајно време и албанската политичка сцена постепено да се ослободува од етничките стеги во кои политичките елити со децении ги држеа своите избирачи. На граѓанинот не му помагате ако постојано му кажувате дека неговиот најголем проблем е што нема уште едно колективно етничко право.

Неговата грижа е да има пристојна плата. Да има функционално здравство. Да верува во судството. Неговото дете да не мора иднината да ја бара во странство. Да има администрација која ќе му служи, а не администрација која е партизирана и неефикасна.

Тоа не се македонски или албански проблеми. Тоа се секојдневни граѓански проблеми.

И Тетово мора да биде дел од таа промена

Токму затоа новиот политички пристап ќе биде уверлив само ако се потврди во практиката. Тоа подразбира престанок на радикализирачката етничка реторика од секој политички функционер, без разлика на неговата етничка или партиска припадност. Тоа важи и за градоначалникот на Тетово, Биљал Касами.

Кога политичките пораки на кој било градоначалник, министер или лидер ги продлабочуваат етничките поделби, неговите коалициски и партиски партнери не треба да молчат само затоа што им е потребна неговата политичка поддршка. Исто така, ниту една локална или дел од централната власт не смее да добие простор законите да ги толкува или применува според етнички интерес.

Законот или важи за сите или престанува да биде закон.

Ако нешто е незаконско кога го прави Македонец, мора да биде незаконско и кога го прави Албанец. Ако некое право му следува на Албанецот, под еднакви услови мора да му следува и на секој друг граѓанин кога се исполнети истите правни претпоставки. Тоа е граѓанска држава.

Во таа насока, во најблиска иднина мора да се отвори и прашањето за составот на Комитетот за односи меѓу заедниците. Сегашниот модел, со паритетна застапеност на Македонците и Албанците со по седум членови, наспроти по еден претставник на останатите заедници, институционално ја фаворизира бинационалната логика и не соодветствува со концептот на вистински мултиетничка држава.

На ова укажувам уште од самото внесување на решенијата од Рамковниот договор во Уставот. Затоа овој модел мора да претрпи консензуална уставна измена, постигната преку сериозна и инклузивна дебата, ослободена од дневнополитички и партиски калкулации. Тоа би било целосно во духот на вчерашните пораки дека различноста треба да нè обединува, а не институционално да нè дели на две доминантно застапени заедници, оставајќи ги останатите во втор план.

Еднакви права значат и еднакви правила

Истото важи и за барањата одредени права или процедури да се приспособуваат исклучиво на потребите на една етничка заедница. Во јавноста веќе беше отворено барањето правосудниот испит да може да се полага и на албански јазик. Тогаш логично се поставува прашањето: А зошто не и на турски, српски, ромски, влашки или босански јазик?

Ако принципот е дека секој треба да има право професионален државен испит да го полага на својот мајчин јазик, тогаш тоа право мора да биде еднакво достапно за сите. Но ако тоа не можеме да го обезбедиме за сите, тогаш мора јасно да правиме разлика меѓу јазично право и посебна етничка привилегија.

Правото секој слободно да го употребува, негува и развива својот јазик мора да биде неспорно. Но професионалниот стандард за работа во единствен државен и правен систем е друго прашање. Не може секое ново политичко барање автоматски да се прогласува за обврска што произлегува од „духот на Рамковниот“. Особено не ако истото право не сме подготвени да им го дадеме на сите останати.

Правичната застапеност не смее да го поништи мерит-системот

Една од најчувствителните теми е принципот на соодветна и правична застапеност. Уставот зборува за „соодветна и правична застапеност на граѓаните кои припаѓаат на сите заедници“ во органите на државната власт и јавните институции. Но Уставот не вели дека етничката припадност треба да биде поважна од стручноста. Не вели дека мора да се вработи неквалификуван кандидат за да се исполни процент, ниту дека квотата треба да го суспендира професионалниот критериум.

И токму тука во изминатите години направивме една од најголемите грешки. Од инструмент кој требаше да спречи дискриминација и да овозможи рамноправен пристап до јавните институции, правичната застапеност премногу често ја сведувавме на етничка аритметика. А кога процентот ќе стане поважен од знаењето, способноста, образованието, интегритетот и работните резултати, цената ја плаќаме сите ние граѓаните. Затоа добивме обемна, партизирана, скапа и недоволно функционална администрација.

Отсега натаму правичната застапеност треба да значи: еднаква можност за пристап, забрана на дискриминација, транспарентни конкурси и еднакви професионални критериуми за сите. А потоа нека победи најдобриот кандидат, без разлика дали се вика Јован, Арбен, Ахмет, Милан, Џавид или Светомир.

Државната администрација не смее да биде етнографски попис. Таа мора да биде професионален сервис на граѓаните.

Од вербален соживот кон граѓанско заедништво

Во моите досегашни текстови и изјави по повод годишнините од Рамковниот договор укажував дека на Македонија ѝ е потребна институционална динамика која ќе ја намалува етнификацијата на политичкиот систем и ќе ја поттикнува соработката меѓу заедниците. Денес сум уште поубеден дека тоа е вистинскиот пат.

Нам не ни треба држава во која Македонците постојано ги бројат Албанците, Албанците ги бројат Македонците, а политичарите ги бројат функциите што им припаѓаат според етничкиот клуч. Ни треба држава во која етничката припадност е слободно, достоинствено и целосно заштитено право на секој човек, но не и билет за функција, работно место или политичка привилегија.

Затоа сакам пораките на Сали и Николоски да ги разберам како можен почеток на еден нов политички пристап. Пристап во кој Рамковниот договор нема да се негира, но нема ниту бесконечно да се проширува. Потребно е негово конечно ослободување од дневната политика и враќање кон она што требаше да биде неговата крајна цел а тое е мирно, стабилно, демократско, интегрирано и функционално општество во кое граѓаните ќе бидат еднакви пред институциите.

Дваесет и пет години по Охридскиот рамковен договор, Македонија мора да има храброст да премине во следната фаза од својот демократски развој. Јавно искажаните ставови на двајцата вицепремиери се добар почеток, но нивната вистинска вредност ќе се мери според тоа дали ќе бидат преточени во конкретна политика. Само така соживотот за кој денес зборуваме ќе престане да значи дека живееме едни покрај други и навистина ќе значи дека живееме заедно како рамноправни граѓани на една иста држава.

The post По 25 години од Рамковниот договор време е од етничка аритметика да преминеме кон граѓанска држава appeared first on plusinfo.mk.

The post РАМКОВНИОТ ДОГОВОР НЕ Е ТАПИЈА НА ДУИ И НА АХМЕТИ Договорот беше изопачен во средство за финансиска моќ appeared first on plusinfo.mk.

Охридскиот договор не е сопственост на ДУИ и не е нивен имотен лист, вели партијата ВРЕДИ во соопштение.

– Тој договор е резултат на жртвувањето и напорите на еден цел народ. Во 24 години власт на оние што си го присвоија тоа наследство, Албанците видоа сè, но најмногу недовршени проекти и привремени решенија без суштински резултати – изјави на прес-конференција Мустафа Даути.

Даути вели дека во изминатите 24 години, Албанците никогаш не го виделе вистинското спроведување на децентрализацијата. Според него, доволно е да се погледнат општините со кои управуваа овие самопрогласени патриоти и сликата станува сосема јасна.

– Во текот на 24 години, уставниот принцип што произлегува од Охридскиот договор – правичната и соодветна застапеност, никогаш не го претворија во закон. 24 години слушавме многу ветувања, а видовме многу малку резултати за автопатот Скопје–Блаце. Го ветуваа во 2008, 2011, 2014, 2017, 2020 и 2023 година. Исходот секогаш беше ист, одолговлекување, недовршени работи и пропаганда. Ова е политичкото досие на една власт која 24 години зборуваше во име на Албанците, а работеше за сопствени интереси.

Даути тврди дека во изминатите 24 месеци, откако ВРЕДИ ја доби довербата на Албанците да ги претставува, партијата отворила процеси што ДУИ не ги отворила ниту за две децении.

– За 24 месеци, правичната и соодветна застапеност конечно добива законско решение. Го унапредуваме Охридскиот договор. Во изминатите 24 месеци, преку Оперативниот план за вработување, едно од највредните достигнувања на владата во која учествува ВРЕДИ, отвораме можности за вработување, самовработување и поддршка на младите, со цел да го запреме иселувањето.

Понатаму во говорот, Даути истакнува дека за 24 месеци, автопатот Скопје–Блаце од долгогодишен застој премина во фаза на реализација и деблокирање.

– За 24 месеци, Коридорот 8 повеќе не се користи за пропаганда. Денес се работи на терен, се градат патишта, се поврзуваат општините и се создава развој. За 24 месеци, децентрализацијата ја претворивме во конкретна политика, со реални средства и заслужен удел за општините. Обезбедивме 100 милиони евра за повеќе од 1.200 проекти во општините. За 24 месеци, го решивме статусот на медресантите, официјализиравме три факултети, инвестираме во кампусот на Мајка Тереза и потпишавме колективни договори со нашите универзитети.

Сонцето не може да се скрие со сито, порачува Даути во името на партијата ВРЕДИ.

„Тие од ДУИ го користеа Охридскиот договор за да ги полнат своите џебови, а ние градиме во општини, носиме закони и нудиме решенија“, се вели во партиското соопштение на ВРЕДИ.

The post РАМКОВНИОТ ДОГОВОР НЕ Е СОПСТВЕНОСТ НА ДУИ Партијата ВРЕДИ ги спореди своите 2 со 24 години на ДУИ appeared first on plusinfo.mk.

Изјавата на премиерот Христијан Мицкоски во Собранието, во врска со употребата на албанскиот јазик, претставува еден од најзагрижувачките моменти во политичкиот дискурс од потпишувањето на Охридскиот мировен договор, соопшти Демократската унија за интеграција на Али Ахмети.

„Тврдењето дека албанскиот јазик може да се користи „колку сакате“, но дека службен јазик е македонскиот, не е само политичка изјава, тоа е директно враќање на логиката на Уставот од 1991 година и тогашниот член 7, игнорирајќи го Амандманот 5 од 2001 година, кој претставува темел на уставниот поредок и на меѓуетничката рамнотежа во државата. Овој став ја нарушува суштината на Охридскиот договор, кој не е симболичен компромис, туку реална архитектура на соживот, изградена токму за да ги надмине изворите на конфликт што ги создаде Уставот од 1991 година“, соопшти ДУИ.

Релативизирањето на статусот на албанскиот јазик не е прашање на толкување, туку отворање опасен пат што директно ги засега меѓуетничките односи и функционалноста на нашата мултиетничка демократија, се додава во соопштението.

„Овој пристап претставува чекор назад и обид за ревизија на темелните достигнувања на државата, инспириран од логики што се во спротивност со концептот на мултиетничка и демократска држава. Го повикуваме Премиерот веднаш да се повлече од оваа позиција и целосно да го почитува уставниот поредок произлезен од Охридскиот договор. Секое отстапување од овој поредок не е само политичка грешка, тоа е удар врз самите темели на соживотот и функционалноста на државата“, се вели во соопштението на ДУИ.

The post ИЗЈАВАТА НА ПРЕМИЕРОТ ЗА АЛБАНСКИОТ ЈАЗИК, СПОРЕД ДУИ, Е ЗАГРИЖУВАЧКА „Отворање опасен пат што директно ги засега меѓуетничките односи“ appeared first on plusinfo.mk.

Поминаа 24 години од потпишувањето на Охридскиот договор, најважниот документ за рамноправност на Албанците во Македонија, но сенката од неговата нецелосна имплементација продолжува да ги оптоварува државните институции, соопшти коалицијата Вреди.

„Сите го знаеме главниот виновник: ДУИ, партијата нон-грата, која беше на власт 22 години по ред и која наместо да го претвори Договорот во реалност, го користеше како изборен банер и банкомат за лично богатење. Фактите зборуваат сами за себе: Во 2013 година, тогашниот Секретаријат за спроведување на Охридскиот договор објавил тендер од 6 милиони денари за анализа на спроведувањето на рамковниот договор. Победник, според информациите, беше компанијата „ТАГ Комуникации“, во сопственост на лице блиско со ДУИ, по својата позиција во државните структури контролирани од оваа партија!“, се вели во соопштението на Вреди.

Парите на граѓаните, се додава, се трошеа на „анализи“, „конференции“ и „трибини“, додека од друга страна создаваа илузија за напредок.

„Скапо платените анализи препорачуваа мерки што ДУИ никогаш не ги спроведе: законски обврски за правична застапеност во државните компании, справување со говорот на омраза во Кривичниот законик, децентрализација со конкретен буџет и решавање на статусот на жртвите од 2001 година. Ништо од ова не стана реалност, затоа што за ДУИ Охридскиот договор не беше алатка за еднаквост, туку алатка за тендери, богатење и за криење зад измислени анализи, секогаш кога нивните неуспеси стануваа очигледни. Вреди ги повикува граѓаните да не стануваат жртви на пропагандата на партија која две децении го користеше аманетот од 2001 година за тесни лични интереси“, соопшти владејачката коалиција.

Решени сме, се додава, целосно да го спроведеме Охридскиот договор, не на хартија, не на празни конференции, туку во секојдневниот живот на секој граѓанин Албанец.

„Најјасен доказ за ова е историското усвојување на Законот за правична и соодветна застапеност, голема политичка победа, епохална пресвртница во институционалната еднаквост, правна гаранција што става крај на 20-годишната неправда. Овој закон не е само член во службен тефтер, тој е печат на нова ера за Албанците, тоа е сигурност дека нашиот глас никогаш повеќе нема да биде игнориран во нашата земја“, соопшти коалицијата Вреди.

The post „ДУИ ГО КОРИСТЕШЕ РАМКОВНИОТ ДОГОВОР ЗА ЛИЧНО БОГАТЕЊЕ“ Вреди ветува целосно спроведување на мировниот договор од 2001 година appeared first on plusinfo.mk.

Охридскиот договор не е само политички документ. Тој е визионерски акт, историски договор меѓу заедниците кои живеат во оваа земја, посветеност за изградба на држава во која секој се чувствува еднаков, претставен и почитуван, порача вечерва првиот вицепремиер во Владата Изет Меџити на одбележувањето 24 години од Рамковниот договор.

Овој договор, рече тој, стави крај на вооружениот конфликт и ги постави темелите за нов соживот врз принципите на демократија, инклузивност и меѓусебно почитување.

– Денес сме собрани овде за да се потсетиме и да оддадеме почит на еден од најзначајните настани од нашата понова историја Охридскиот рамковен договор, кој пред 24 години стави крај на еден болен конфликт и ја отвори патеката кон побезбедна и поправедна иднина за сите граѓани на нашата земја – истакна Меџити.

Според него, август носи длабока симболика, а тоа, како што рече се Илинден и Охридскиот договор кои се два темелни камена на современата државност на Република Северна Македонија.

– Тоа се два датума кои не треба да живеат само во календарот, туку и во нашата колективна свест. Тие нè потсетуваат дека само преку заеднички напори, жртва и дијалог можеме да изградиме функционално, праведно и демократско општество – потенцира првиот вицепремиер.

За Охридскиот договор рече дека не е само политички документ и дека Албанците и Македонците, но и сите други етнички заедници, не се само делови од една држава, туку дека сите се нејзини соосновачи.

– Не можеме да се избегнуваме едни со други, ниту треба да се обидуваме. Повикани сме да живееме заедно, да создаваме заедно, да ги делиме одговорностите и успесите, да градиме заедничка иднина за генерациите што доаѓаат. Ова не е обврска, ова е историска можност – нагласи Меџити.

Тој потсети и најави дека се ближат локалните избори и дека било природно во секое плуралистичко општество, политичките тензии да се зголемат, но и дека имаат обврска преку институционална зрелост и политичка одговорност да го зачувааат единството и стабилноста. Порача дека граѓаните очекуваат одговорност и работа и најави посветеност во остварување на тоа.

Охридскиот рамковен договор беше потпишан на 13 август 2001 година во претседателската резиденција на Водно во Скопје од страна на тогашниот претседател на државата Борис Трајковски, тогашниот премиер и лидер на ВМРО-ДПМНЕ, Љубчо Георгиевски, како и тогашните лидери на СДСМ, Бранко Црвенковски, на ПДП, Имер Имери и на ДПА, Арбен Џафери. Свои потписи на договорот ставија и специјалните претставници на ЕУ и на САД, Франсоа Леотар и Џејмс Пердју. Во разговорите што започнаа во јули во Скопје, а потоа продолжија во Охрид, беа консултирани повеќе советници и експерти.

The post 24 ГОДИНИ ОД ОХРИДСКИОТ ДОГОВОР Меџити порача дека можеме да живееме и да создаваме заедно appeared first on plusinfo.mk.

По повод 24-годишнина на Охридскиот договор лидерот на ДУИ Али Ахмети се обрати до „сограѓаните Македонци, на македонски јазик“, преку колумна објавена на порталот 360 степени, и препратена до сите медиуми.

Тој вели дека друга држава нема и дека тој и Албанците се залагаат за унитарна, заедничка и еднаква Македонија.

„Наспроти тоа што ова го знаат и Црвенковски и Груевски, и Заев и Мицкоски, а го знаеја и нивните претходници, во нашите млади години, сите ние што се осмелувавме да се залагаме за еднаквост, нѐ гонеа за сепаратизам, национализам, шовинизам, а денес истиот пристап софистицирано се повторува со прогон и оцрнување за наводна корупција и криминал од истата доктрина и истите заробени умови кои ги карактеризираат граѓаните во граѓани од прв, втор, трет ред и сметаат дека државата им припаѓа само ним“, пишува Ахмети.

„Премиери и академици ми нудеа да ја поделиме Македонија, не прифатив. Ме оцрнуваа од тоа дека сум бил соработник на српските служби со фалсификувани досиеја, па сѐ до наводно корумпиран, но граѓаните секогаш се определуваа да нѐ поддржат нас“, додава Ахмети.

Во колумната тој тврди дека за овие 24 години, тој и неговите соработници се залагале да го спроведат Охридскиот Договор, да ја интегрираат земјата во НАТО и во ЕУ, да преземат одговорност за заедничката држава…

„Ретки се лидерите во нашето општество кои што му оддолеваат на искушението да зајаваат на бранот на национализмот и популизмот за пирова краткотрајна победа со далекусежни негативни последици за државата и за општеството. За жал, сведоци сме дека можело да се враќаме назад. Сведоци сме дека можело да се заборави минатото и да се повторуваат грешките во сегашноста кои што ќе нѐ чинат во иднината, и тоа од површни пориви. Барам и очекувам и Македонецот да ги почитува засебностите на мојот народ и да разбере конечно и без предрасуди дека од еднаквоста не губи ништо, напротив добива многу“, пишува Ахмети.

The post АХМЕТИ ОБВИНИ ДЕКА ЗАД ПРОГОНОТ ЗА КОРУПЦИЈА СТОЈАТ ЗАРОБЕНИ УМОВИ КОИ ПРЕТХОДНО ГИ ГОНЕЛЕ АЛБАНЦИТЕ ЗА СЕПАРАТИЗАМ Лидерот на ДУИ вели дека премиери и академици му нуделе да ја поделат Македонија appeared first on plusinfo.mk.

Поранешниот министер за надворешни работи и пратеник од редовите на ДУИ, Бујар Османи, остро реагираше на изјавите на актуелниот министер за надворешни работи, Тимчо Муцунски, поврзани со улогата на Охридскиот рамковен договор во современото уредување на државата.

Во својата реакција објавена на социјалните мрежи, Османи порача дека „функционалноста на мултиетничката демократија не може да се редефинира со дневнополитички флоскули“ и предупреди дека непризнавањето на договорот е удар врз темелите на државата.

– Во начелата и принципите на Охридскиот мировен договор е пресликан современиот модел на соживот и функционалната унитарност на земјава – нагласи Османи, додавајќи дека договорот обезбедува механизми како што се Бадентеровото мнозинство, правичната застапеност преку Балансерот, засилената децентрализација и јазичната еднаквост.

Според него, токму овие механизми ја гарантираат стабилноста и кохезијата во државата, а нивното игнорирање или негирање е „директен удар во темелите на современата државност“.

– Оној што не ја разбира, или не сака да ја прифати оваа реалност, директно удира во темелите на современата државност, кои се нашироко прифатени не само во земјава туку и од нашите стратешки партнери како САД и ЕУ – потенцира Османи.

Тој ја обвини новата влада дека „не влече храбри, туку неразумни потези“, обвинувајќи ја дека создава тензии во момент кога државата има потреба од обединување околу европската агенда.

– Изјавата на Муцунски не претставува само погрешно разбирање на суштината на Охридскиот договор, туку делува и како обид за отворање на непотребен етнички фронт, во политички контекст кога ни е потребен суштински консензус за европското досие – напиша Османи.

Поранешниот министер ја заклучи својата реакција со силна порака.

– Охрид не е проблемот – Охрид е решението. Исто како и Преспа, исто како и Договорот за пријателство со Бугарија. Тој што не го разбира тоа или не сака да ја прифати таа реалност директно ѝ наштетува на иднината на земјата – вели Османи.

The post НЕРАЗУМНО Е ДА ГО РУШИТЕ ОХРИДСКИОТ ДОГОВОР Османи со жесток одговор до Муцунски appeared first on plusinfo.mk.

Колку повеќе завива Демократската унија за интеграција, толку повеќе се разобличуваат нивните лаги и манипулации, и толку подлабоко паѓаат во стапиците што самите ги поставиле за да ги закопаат своите политички противници, реагираше денеска коалицијата Вреди.

Според Вреди, аргументот на Али Ахмети за легитимитет е разобличен со фактот дека „барем тројца од пратениците на Европскиот фронт не зборуваат албански и на албанската јавност ѝ се обраќаат на македонски јазик“.

„Во оваа група се поранешниот претседател на Уставниот суд Сали Мурат, милионерот и пратеник Исмаил Јахоски, познат како Пуцко Петрол и пратеникот Бејџан Иљас. Второ, Али Ахмети одамна го загуби ексклузивното право да зборува во име на Охридскиот договор. Бидејќи долго време е на власт и за да ја зачува својата фотелја, Ахмети направи стотици отстапки и извитоперувања на основните дефиниции на Охридскиот договор. За време на неговиот 22-годишен мандат, официјализацијата на албанскиот јазик стана предмет на пазарење, децентрализацијата на власта деградираше во банално прашање, а вниманието се посвети само на збогатувањето на неговите вечни функционери“, се вели во соопштението.

Трето, се додава, Ахмети веќе нема морален кредибилитет да зборува за статусот на поранешните борци на Ослободителната народна армија (ОНА).

„За жал, за време на сите мандати на Ахмети беа затворани и убивани поранешни борци на ОНА. Неговиот заменик Арбер Адеми беше фатен на дело! Јавноста виде во оптужницата што Арбер ја поднесе против државата поради „бегството од домашен притвор“ на Блерим Рамадани. Покрај тоа, сите влади на Али Ахмети досега редовно доделуваа финансиски средства за социјална поддршка на бранителите. Но, ниту една влада на Али Ахмети досега не го реши статусот на поранешните борци на ОНА“, соопшти Вреди.

Коалицијата додава дека Ахмети преку контрола на судството го спасил Никола Груевски од затвор.

„Фактот дека Сашо Мијалков денес е слободен граѓанин, а сите негови казни застареа затоа што ДУИ заедно со Кренар Лога го сменија Кривичниот законик, не бара дополнителен аргумент дека Али Ахмети бил животно заинтересиран и работел на спасување на Груевски и негово враќање како херој од Будимпешта“, соопшти коалицијата.

Ахмети имаше 22 години време, шест владини мандати, министер за надворешни работи и премиер, додава Вреди, за да ги реши отворените прашања со соседите и да ја направи Македонија членка на ЕУ, ама не успеа и сега е време да биде опозиција.

The post ДУИ ЗАВИВА И ПАЃА ВО СТАПИЦИТЕ ШТО ГИ ПОСТАВУВА ЗА НАС Вреди го потсети Ахмети дека времето му поминало appeared first on plusinfo.mk.

Од партијата соопштија дека Ахмети му го честитал враќањето во Македонија на амбасадорот Радуков и го уверил дека блиската соработка во поглед на европската иднина и добрососедството ќе продолжи уште повеќе.

„Бугарската заедница во Македонија е реалност и треба да биде вклучена во Уставот, а од ова никој ништо не губи, напротив, сите добиваат. Приоритет на ДУИ е токму продолжување на европскиот пат, затоа уставните измени мора веднаш да се случат, бидејќи граѓаните очекуваат да станеме дел од Европската Унија“, порачал Ахмети.

Тој повторил дека Охридскиот договор, Договорот од Преспа и Договорот за добрососедство се одредби на ДУИ и ќе се ангажира за нивна поддршка и имплементација.

„Ахмети и Рудаков разговараа и за политичката состојба во земјата, при што Ахмети зборуваше за тенденцијата на власта со моноетнички легитимитет и на надгласувачкиот Уставен суд целосно да го прекрши Охридскиот договор, неговиот дух и социјалната кохезија, кај нас со наметнување етничка надмоќ. Ова е неприфатливо. `Чесните` и претпочитани Албанци избрани од ВМРО-ДПМНЕ се откажаа од Европа, но и од еднаквоста, омаловажувајќи ги и понижувајќи ги Албанците за нивните лични корумпирани мотиви“, соопшти ДУИ.

The post БУГАРИТЕ ВО МАКЕДОНИЈА СЕ РЕАЛНОСТ, МЕСТОТО ИМ Е ВО УСТАВОТ Ахмети му се жали на амбасадорот Радуков за наметнување етничка надмоќ appeared first on plusinfo.mk.