Европската Унија ја потврдува поддршката за патот на Северна Македонија кон полноправно членство, но истовремено бара видлив напредок во владеењето на правото, независноста на судството, борбата против корупцијата, основните права и добрососедските односи. Ова е една од главните пораки во заедничките препораки усвоени на 25. состанок на Мешовитиот парламентарен комитет ЕУ–Северна Македонија, одржан на 24 и 25 септември во Скопје.

Комитетот констатира дека Северна Македонија е меѓу земјите кандидати со најдолг кандидатски статус – повеќе од две децении. Во документот се повикува Советот на ЕУ да ги отвори преговорите за Кластер 1, штом ќе бидат исполнети потребните критериуми.

Истовремено, европратениците и македонските пратеници нагласуваат дека процесот на пристапување треба да остане заснован на заслуги. Од ЕУ се очекува, кога Северна Македонија ќе ги исполни договорените критериуми и одредници, да одговори со соодветен напредок во пристапниот процес, навремено и предвидливо.

Во препораките се нотира и напредокот во спроведувањето на Реформската агенда во рамките на Инструментот за реформи и раст за Западен Балкан. Се наведува дека земјата го добила најголемиот износ на финансиска помош во регионот, меѓу другото за мерки поврзани со образованието и дигиталната инфраструктура во училиштата. Сепак, идните исплати треба да останат условени со навремено и проверливо исполнување на реформските чекори.

Посебно место имаат реформите во правосудството. Комитетот го поздравува напредокот во спроведувањето на Стратегијата за реформа на правосудството 2024–2028 година и го поздравува новиот Закон за Судскиот совет, за кој се оценува дека носи поголема транспарентност при именувањето судии и во дисциплинските постапки.

Во борбата против корупцијата се констатираат стабилни резултати, вклучително и истраги против актуелни и поранешни високи функционери кои резултираат со обвиненија и судски постапки. Воедно е поздравена и новата Национална стратегија за спречување на корупцијата и судирот на интереси за периодот 2026–2030 година.

Во препораките значајно место заземаат и медиумите. ЕУ го поздравува проширувањето на законската рамка и врз онлајн медиумите, воспоставувањето правна основа за Регистарот на онлајн медиуми и подготовките за усогласување со Европскиот акт за слобода на медиумите. Од властите се бара целосно усогласување со европските правила и подобра заштита на новинарите, вклучително и од SLAPP-тужби.

Комитетот бара и зајакнување на заштитата на новинарите од онлајн вознемирување, родово засновано насилство, закани, заплашување и говор на омраза. Во истиот контекст се повикува на посилна сајбер-безбедност и транспарентност на онлајн-кампањите, со цел заштита на изборните процеси од странско мешање и манипулација со информации.

Од Северна Македонија се бара и да ја унапреди задоцнетата сеопфатна изборна реформа и да ги спроведе преостанатите препораки на ОБСЕ/ОДИХР и Венецијанската комисија. Притоа, процесот треба да биде транспарентен и инклузивен, со учество на сите релевантни чинители.

Во делот на меѓуетничките односи, Комитетот ја поздравува континуираната стабилност во земјата и повикува на доследно спроведување на Охридскиот рамковен договор. Се бара сите политички и општествени чинители да ја зачуваат кохезијата, да го поттикнуваат дијалогот и да избегнуваат реторика што предизвикува поделби. Во документот се нотира и потребата од подобра заштита на малцинствата и продолжување на мерките против дискриминацијата и инцидентите мотивирани од омраза.

Во односите со соседите, ЕУ ги нагласува значењето на Преспанскиот договор со Грција и Договорот за пријателство, добрососедство и соработка со Бугарија. Од сите страни се очекува нивно спроведување со добра волја, додека билатералните прашања, според препораките, треба да се решаваат преку конструктивен дијалог и да не се инструментализираат во пристапниот процес.

Како конкретен пример за регионалното поврзување се издвојува договорот меѓу Бугарија и Северна Македонија за изградба на прекуграничен железнички тунел, со поддршка од европските финансиски институции и ЕУ, како дел од Коридорот VIII. Комитетот бара договорените проекти да се спроведуваат навреме и ефективно. Се поздравува и очекуваниот договор за железничко поврзување со Грција во рамките на Коридорот X.

На безбедносен план, Комитетот го поздравува усогласувањето на Северна Македонија со надворешната, безбедносната и одбранбената политика на ЕУ, вклучително и со санкциите поврзани со руската агресија врз Украина. Се поздравува и нејзината улога како членка на НАТО, како и европската поддршка за зајакнување на капацитетите и оперативната подготвеност на Армијата преку Европскиот мировен фонд.

ЕУ и Северна Македонија треба дополнително да соработуваат во справувањето со хибридните закани, дезинформациите, странското мешање и сајбер-ризиците. Во препораките се повикува на зајакнување на сајбер-безбедноста, стратешката комуникација, медиумската писменост и независната проверка на факти.

На крајот, Комитетот бара забрзување и во областа на животната средина. Од Северна Македонија се очекуваат посилни мерки за подобрување на квалитетот на воздухот и водата, управувањето со отпадните води и контролата на загадувањето, со поголеми инвестиции, посилен надзор и потранспарентно креирање на политиките.

The post РЕФОРМИТЕ ДА ПРОДЛОЖАТ, А НАПРЕДОКОТ КОН ЕУ ДА БИДЕ ЗАСНОВАН НА РЕЗУЛТАТИ Препораки од Мешовитиот комитет ЕУ-Македонија appeared first on plusinfo.mk.

Изградбата на автопатот Охрид-Кичево се реализира со забрзана динамика. Две галерии се целосно завршени, на третата интензивно се работи. Паралелно се работи на стабилизација на земјиштето, на довршување на мостовите, како и на довршување на двете цевки на тунелите. Во следните неколку месеци ќе отвориме уште 10 километри коишто се најкомплицирани, 10 километри каде што влегуваат тунелите и галериите – истакна заменик претседателот на Владата и министер за транспорт Алекснадар Николоски, кој денеска изврши увид во градежните активности на трасата и изградба на галериите на потегот од Пресека до Кичево. 

– Тука се работат осум галерии коишто се навистина еден голем инженерски потфат. Позади нас имаме три галерии коишто се веќе во завршна фаза — две можам да кажам дека се целосно завршени и на третата интензивно се работи. Паралелно се работи на стабилизација на земјиштето, на довршување на мостовите, како и на довршување на двете цевки на тунелите, со што за неколку месеци од денес овој дел од автопатот ќе биде функционален и ставен во функција. Бројките се навистина импресивни. Само овие три галерии коишто се позади мене се во должина од 1 километар и 100 метри, додека тунелите ќе бидат најдолги во Македонија, едната цевка во должина од 2 километри, другата цевка во должина од 2 километри и 100 метри, како што кажав, најдолги тунели во Македонија, а галериите за првпат од овој тип се изведуваат не во Македонија, туку во целиот регион – изјави Николоски.

Тој додаде дека изгрaдбата на галериите било најдоброто решение за стабилизација на земиштетo, што на терен се покажува како ефикасно решение. Најави во скоро време пуштање на нови делници за сообраќај.

– Ова беше најпаметното и најдоброто решение за стабилизација на земјиштето. За да ја заштитиме трасата, за да имаме безбедно возење, овие инженерски чуда коишто се позади нас беа најдоброто решение. Ова беше напуштен проект, ова беше проект во којшто никој не веруваше, но еве го, веќе се гледа крајот, веќе имаме 34 километри на коишто се вози, а во следните неколку месеци ќе отвориме уште 10 километри коишто се најкомплицирани 10 километри каде што влегуваат тунелите и галериите – истакна заменик претседателот на Владата, Николоски.

The post 🎥 АВТОПАТОТ ОХРИД-КИЧЕВО СЕ ГРАДИ СО ЗАБРЗАНО ТЕМПО Наскоро ќе бидат пуштени нови делници appeared first on plusinfo.mk.

Во овие две години откако сум претседател на Владата пораките од Самитот ЕУ-Западен Балкан во Тиват беа најсилни а тоа е дека процесот на проширување не е завршен. Францускиот претседател Емануел Макрон и германскиот канцелар Фридрих Мерц дадоа силен мотив да продолжиме во делот на реформите, да испорачуваме, врз основа на методот на заслуга, а не врз основа на билатерални прашања и тоа беше неколку пати потенцирано на самиот самит, изјави денеска премиерот Христијан Мицкоски.

Во врска со „нон пејперот“ на Макрон и Мерц, Мицкоски посочи дека институциите во Брисел веќе добиле инструкции за операционализација на овој документ, што ќе овозможи поголемо користење на одредени алатки од страна на земјите од регионот и почести состаноци на високо ниво.

-Она што го слушав и од францускиот претседател и од германскиот канцелар, а и таму во работниот дел од Самитот, можев да заклучам дека документот што тие го имаат подготвено, „нон пејперот“, институциите во Брисел веќе добиле инструкции за негова операционализација и претставува значајно подигнување на нивото на односи помеѓу Западен Балкан и Европската Унија, односно, тој документ и таа реформа овозможуваат механизам со којшто ќе имаме, поголемо користење на одредени алатки од страна на земјите на Западен Балкан и тој никако не е во конфликт со проширувањето. Тоа се два паралелни процеси. Ова е еден процес, а проширувањето си останува како друг процес, нагласи Мицкоски одговарајќи на новинарски прашања по посетата на Институтот за јавно здравје.

Мицкоски информира дека на самитот било договорено да има почести состаноци кои нема да бидат веќе на ниво на самити ЕУ Западен Балкан – два пати годишно, еднаш во јуни, еднаш во декември, туку најмалку два пати месечно.

-Тоа ќе значи дека ќе можете со луѓето кои што одлучуваат да разговарате и да креирате политики и да ја градите иднината заедно, така што во секој случај и францускиот претседател и германскиот канцелар дадоа силен мотив да продолжиме во делот на реформите, да испорачуваме, врз основа на методот на заслуга, а не врз основа на билатерални прашања и тоа беше неколку пати потенцирано на самиот самит. Така што јас се враќам од самитот навистина задоволен и инспириран да продолжиме сите во Владата да работиме уште попосветено и уште помотивирано за да можеме да ги користиме сите оние алатки кои што со овие нови механизми ќе ни бидат ставени на располагање, рече Мицкоски.

Одговарајќи на новинарски прашања во врска тоа дека Македонија не била спомената на прес-конференцијата во Тиват, како и на пораките од претседателот на Европскиот совет, Антонио Кошта, и бугарскиот премиер Румен Радев дека без уставни измени нема поместување во процесот, Мицкоски истакна дека неговиот оптимизам е цврсто заснован на директните разговори во Црна Гора.

-Мојот оптимизам се темели на тоа што јас бев единствениот од земјите од Западен Балкан кој имаше билатерални состаноци и со францускиот претседател Макрон и со германскиот канцелар Мерц. И точно знам што се зборуваше на тие состаноци и точно знам што ќе следи во периодот којшто е пред нас – рече премиерот, додавајќи дека од страна на соговорниците добил одговори на некои од дилемите и кога ќе се земе сето ова предвид, оттаму доаѓа неговиот оптимизам.

​Мицкоски ја отфрли како неточна тезата на одредени експерти дека планот од „нон-пејперот“ не може да се аплицира за Македонија поради тоа што земјата формално ги нема стартувано преговорите по кластери. Според него, документот е прецизно направен за да овозможи механизми дури и за земјите кои се само кандидати или немаат одржано прва меѓувладина конференција.

-Планот на Мерц и Макрон ги вклучува сите земји на Западен Балкан. Не се сите земји на исто ниво во процесот на, на интеграција, но ги вклучува сите земји на Западен Балкан – групата шест и не е поврзан со процесот на проширување, бидејќи и едниот и другиот паралелно продолжуваат. Да, точно е, одредени делови од овој план подразбираат одредени поглавја да бидат затворени, но и тука ќе има во периодот кој што следи одредени поместувања, додаде премиерот.

Тој, одговарајќи на новинарско прашање, повтори дека додека е тој претседател на Владата нема никогаш да поддржи уставни измени во кои што нема да имаме јасен крај дека ќе го почнеме процесот и ќе го завршиме.

-Додека немам јасни гаранции дека нема да има повеќе билатерални прашања и идентитетски прашања, само таков тип на уставни измени можам да поддржам. Сè останато нема никогаш да го, еве поддржам, рече Мицкоски.

Во однос на тоа дали наишол на разбирање за оваа тема на средбите со Мерц и со Макрон, тој кажа дека и двајцата високи челници на ЕУ покажале голема заинтересираност, и очекува во периодот што следи да има интензивирање на разговорите за оваа тема. Тој истакна дека темелните европски вредности треба да важат за сите.

-Подготвени сме да бараме решение, но непринципиелно е, бидејќи ги слушав вчера изјавите, да се повикувате на почитување на човековите права, нели,  така кажа премиерот на Бугарија, а на бирото да ви стојат четиринаесет пресуди од Судот за човекови права во Стразбур и да не дозволувате македонската земница во Бугарија да си регистрира невладина организација. ната. Или принципите важат за сите или не важат, тоа се темелните европски вредности. Важно е дека многу почесто ќе бидеме во Брисел на масата и ќе можеме да зборуваме. Тоа е многу понапред од тоа што бевме пред година, две, три или или претходно, така што ја повикувам македонската јавност да не подлегнува на било какви притисоци кои што значат неизвесен крај, а дополнително национално понижување за граѓаните во Македонија. Ние мора да сме внимателни и прецизни со јасна стратегија која што ја имаме како влада и која што ја водиме. Имаме пријатели и чекор по чекор ќе дојдеме до целта, порача премиерот одговарајќи на новинарски прашања.

The post МАКРОН И МЕРЦ НИ ДАДОА СИЛЕН МОТИВ ДА ПРОДОЛЖИМЕ ВО РЕФОРМИТЕ Да напредуваме врз основа на заслуги, а не врз основа на билатерални прашања appeared first on plusinfo.mk.

Сѐдодека се во сила спорните правосудни закони во Србија, таа држава нема да добие финансиски средства од Планот за раст. Тоа синоќа го потврди еврокомесарката за проширување Марта Кос.

„Засега, ги запревме сите исплати од Планот за раст бидејќи Србија има назадување во областа на правосудството и додека не го поправи тоа, нема да може да добие финансиска поддршка од ЕУ“, изјави таа синоќа зборувајќи на Универзитетот во Фрајбург во Швајцарија, пренесоа српските медиуми.

Комесарката Кос претходно во неколку наврати предупреди дека тие закони – усвоени во јануари годинава – ја ограничуваат независноста на судството. На 24 април, Венецијанската комисија оцени дека неодамнешните измени во неколку судски закони во Србија ги отстрануваат претходно постоечките заштити за автономијата на обвинителството.

Ова експертско тело на Советот на Европа издаде девет препораки до Србија за тоа како да се отстранат недостатоците. ЕУ бара од Србија целосно да ги спроведе сите препораки на Венецијанската комисија во врска со судските закони и во исто време да ја суспендира примената на овие закони додека не се изменат.

Од средствата на Планот за раст, Србија има право на вкупно 1,588 милијарди евра за периодот помеѓу 2024 и 2027 година. Од првата транша од плаќањето од Европскиот план за раст во јануари, Србија доби малку повеќе од половина од предвидените средства, бидејќи беше утврдено дека исполнила само три од седумте планирани реформи. Наместо предвидените 112 милиони, земјата доби 61,1 милион евра.

Марта Кос изјави и дека е критична кон идејата на Србија и Албанија да им се овозможи да станат членки на единствениот европски пазар и Шенген зоната, посочувајќи дека не постои нешто како „лајт (лесно)“ или делумно, туку само полноправно членство во ЕУ кога сите обврски се исполнети.

Во врска со иницијативата што српскиот претседател Александар Вучиќ и албанскиот премиер Еди Рама ја презентираа во заеднички текст за „Франкфуртер алгемајне цајтунг“, Кос рече дека „двајцата политичари веројатно знаат дека за членство во заедничкиот пазар и Шенген треба да се исполни многу во областа на владеењето на правото“.

Таа додаде дека во ЕУ се води дебата дали постојната методологија на проширување е соодветна за сегашното време и дали се можни некои специфични аранжмани и постепена интеграција, но дека нејзината улога како комесар за проширување е да ги подготви земјите да станат полноправни членки. На прашањето како политичката криза во Србија влијае на процесот на пристапување, Кос рече дека Србија назадува во многу области, поради што нејзините исплати од Планот за раст се запрени.

„Србија денес е многу поларизирана. Таа е кандидат за членство во Европската Унија повеќе од 10 години. За жал, видовме, гледаме дека назадува, особено кога станува збор за вредностите за кои зборував претходно – владеењето на правото, демократијата, слободата на говорот и, особено, слободата на медиумите. Србија има иднина во Европската Унија, но курсот мора да се промени или посилно да се изрази во постапките на политичарите“, изјави таа.

The post ЗАПРЕНИ ПАРИТЕ ЗА СРБИЈА ОД ЕВРОПСКИОТ ПЛАН ЗА РАСТ Земјата назадува во многу области, нема да ги добие предвидените 1,5 милијарди евра appeared first on plusinfo.mk.

Во рамки на проектот Converge2EU, објавуваме позитивни податоци за напредокот на Македонија во областа на неонаталното здравје, кои покажуваат дека земјата во последната деценија постигнала исклучително значајно намалување на смртноста кај новороденчињата и децата до 5 години.

Според анализата, неонаталната смртност во Македонија се намалила од 8,1 смртни случаи на 1.000 живородени деца во 2016 година на 1,1 смртни случаи на 1.000 живородени деца во последните години. Со ова, земјата не само што се доближила до просекот на Европската Унија, туку во овој индикатор бележи и подобри резултати од европскиот просек, односно 174% конвергенција според користената методологија на Converge2EU .

Овој успех е особено значаен бидејќи во други здравствени области, како што се бројот на лекари и должината на животниот век, Македонија и понатаму дивергира, односно се оддалечува од европскиот просек. Сепак, намалувањето на смртноста кај новороденчињата и децата до 5 години покажува дека позитивни промени се можни и во македонскиот здравствен систем, доколку постои јасна цел, координирана работа и соработка меѓу сите страни: експертската јавност, институциите, здравствените работници, меѓународните партнери и политичките чинители.

Напредокот не е резултат на една изолирана мерка, туку на подолгорочна системска трансформација која вклучува обука на здравствениот кадар, стандардизација на протоколите во родилиштата, унапредување на перинаталната грижа и подобрување на пристапот до услуги за мајките, новороденчињата и ранливите групи. Значајна улога во овој процес имаат институциите, како и меѓународните партнери, меѓу кои UNICEF, WHO и UNFPA .

Во секоја реформа, клучна е одржливоста. Таа зависи од квалитетни кадри во рамки на системот, кои треба да се создаваат, поддржуваат и задржуваат независно од промените на политичките партии и властите. Само на тој начин може да се обезбедат долгорочни и квалитетни промени, како и вистинско доближување до стандардите на Европската Унија.

Во рамки на анализата Converge2EU се истакнува и пошироката важност на отворањето на европските фондови за Македонија, како и на полноправното членство во Европската Унија. Овие процеси се клучни механизми преку кои земјата може економски да се доближи до европскиот просек, преку намалување на сиромаштијата и зголемување на БДП. Економските фактори, пак, понатаму влијаат врз речиси сите други области, вклучително и здравството, образованието, социјалната заштита и демографските предизвици.

„Трансформацијата најчесто не се гледа само во индикаторите, туку во секојдневните искуства на семејствата. Кога прегледите, советувањето и грижата за мајката и новороденчето стануваат навремени, достапни и сигурни, тогаш системската промена станува дел од нормалниот живот“, се наведува во објавата.

Целосната анализа „Безбеден почеток: како Македонија го трансформираше неонаталното здравје“ е достапна тука:
https://zmai.mk/bezbeden-pocetok-kako-severna-makedonija-go-transformirase-neonatalnoto-zdravje/

Целосниот интерактивен dashboard на Converge2EU, со податоци, индикатори и компаративни анализи за процесот на конвергенција со Европската Унија, е достапен тука:
https://converge2.eu/

The post НАМАЛЕНА СМРТНОСТА КАЈ НОВОРОДЕНЧИЊА Напредокот во неонаталната грижа покажува дека системски промени се можни и во македонското здравство appeared first on plusinfo.mk.

Во втората половина од 2025 година ја презедов одговорноста да го водам Министерството за здравство со јасно поставена цел -здравството да нема потреба од импровизација, туку од архитектура. Од првиот ден, мојот фокус не беше да ветувам брзи решенија, туку да поставам одржливи темели за систем што внимателно планира, мери, се пресипитува и континуирано се подобрува.

Втората половина од 2025 година беше период на поставување развојна насока. Време исполнето со внимателно слушање на здравствените работници, темелна анализа на податоците, со цел реално согледување на состојбата во здравството. Овој процес се одликуваше со тивка и структурирана работа, затоа што трајните промени во здравствениот систем бараат јасност и трпение.

Од задоцнета реакција кон управување во реално време

Една од клучните пораки што ја истакнав на мојата прва прес-конференција беше дека одлуките во здравството мора да се носат врз основа на реални податоци, а не на интуитивно чувство или моментален надворешен или внатрешен притисок. Во месеците по јуни 2025 година започна поставувањето темели на новиот пристап, насочен кон навремено препознавање на ризиците пред тие да се претворат во проблем за граѓаните.

Во 2026 година, овој пристап станува стандард. Целта е Министерството за здравство да функционира како систем што во реално време ги следи капацитетите, оптоварувањата и човечките ресурси и интервенира со промислени, проактивни, а не реактивни мерки.

Инвестиции што создаваат капацитет и рамномерност

Оваа година означува важна фаза на капитални инвестиции, кои се резултат на анализите и планирањето започнати во втората половина од 2025 година. Со инвестиција од 205 милиони евра, ќе напредуваат проектите за клиничките болници во Штип, Тетово и болницата во Кичево. Овие инвестиции нема да бидат само градежни зафати, туку дел од инфраструктурна политика за јакнење на регионалните капацитети и намалување на хроничната преоптовареност на постојните клиники од терциерно здравство. Според нашите анализи, 70% од пациентите кои треба да добијат здравствени услуги на примарно и секундарно здравство тие се приморани, поради системски слабости се упатуваат на терциерно ниво. Оваа аномалија, освен што претставува екстра трошок за пациентите, таа е губење време за нив, но исто така, претставува и дополнителен товар за терциерното здравство, односно значјано отежнување на исполнувањето на неговата обврска за научно истражувачка дејност и следење на новите технологии и протоколи кои се дел од современите трендови во здравството.

Во насока на одговорно планирање, во текот на оваа година ќе започне и изработка на физибилити студија за нов клинички центар во Скопје, како неопходен чекор за долгорочен и одржлив развој на здравствениот систем во нашата држава.

Дополнително, решавањето на проблемот со паркирањетво клиничкиот комплекс „Мајка Тереза“ во Скопје, ќе биде резултат на конкретен проект што покажува дека реформите не се однесуваат само на големи стратегии, туку и на секојдневните услови кои директно влијаат врз пациентите и здравствените работници.

Првпат здравството ги познава своите човечки капацитети

Еден од најзначајните процеси започнати во втората половина на 2025 година е креирањето прва структурирана база на податоци за човечките капацитети во здравството. Првпат, системот гради реална слика за професионалните профили, нивната распределба и критичните недостатоци.

Врз основа на овие податоци, во 2026 година започнува и суштинска промена во системот на специјализации и курикулуми за специјалистичка едукација. Специјализациите повеќе нема да се креираат изолирано или врз основа на застарена историска меморија, туку ќе се адаптираат врз основа на реалните потреби на здравствените институции. Преку овој пристап, ќе се воведе појасна структура на општи специјализации и супспецијализации, не само во терцијарното, туку и во примарното и секундарното здравство. На овој начин ги оспособуваме нашите човечки капацитети нивниот профил да биде компатибилен со потребите на сите нивоа на здравствениот систем.

Оваа реформа значи подобро планирани кадри, поквалитетни услуги и систем кој не произведува специјалисти „по желба“, туку професионалци што реално му се потребни на здравството и на граѓаните.

Дигитализацијата како алатка за транспарентност и доверба

Од јуни 2025 година, дигитализацијата е поставена како централна столб на реформата. Годинава, овој пристап го конкретизираме преку националната стратегија за дигитална трансформација на здравството, со фокус на дигитализација на процесите, зголемување на транспарентноста и носење одлуки базирани на податоци.

Дигитализацијата не е цел сама по себе, затоа ја поставуваме таа да биде алатка за зголемување на отчетноста, за намалување на просторот за злоупотреби и за создавање пофер систем за секој граѓанин.

Правна рамка за здравство што превенира

Сериозна реформа не е можна без стабилна правна основа. Затоа, во моментот се подготвуваат две целосно нови законски решенија во здравството, додека 12 постојни закони се адаптираат и модернизираат, во согласност со стратегијата, мисијата и визијата што ја градиме.

Целата кон која системски се стремиме е да создадеме правна рамка што поддржува превентивно здравство, а не систем кој реагира само кога болеста веќе се појавила.

Довербата како секојдневна обврска

Позитивниот фидбек што го добив од преземањето на мандатот во јуни 2025 година не го доживувам како личен успех, туку како дополнителна одговорност за постојана доследност и транспарентност во извршувањето на министерската функција. Довербата, без воздржување, се гради секој ден, со прецизни одлуки и искрена комуникација.

Здравството во 2026 година нема да биде совршено, но ќе биде подобро планирано, потранспарентно, попредвидливо и поблиску до сите граѓани. Тенденцијата која е поставена води кон систем што нема да реагира од страв, туку ќе делува со знаење, податоци и одговорност. Ова е насоката на движење на здравството која ја започнавме во јуни 2025 година, за да продолжиме сериозно и одговорно и текот на 2026 година.

И оваа активност почна во јуни 2025 година, за да се гради сериозно и одговорно во текот на оваа година.

Модерниот екосистем и нашата одговорност

Современиот здравствен екосистем во светот функционира како жива мрежа во која клиниките, лекарите, лабораториите, регистрите, осигурувањето, но и самите граѓани се внимателно поврзани преку податоци, стандарди и јасни патеки на пациентите. Најразвиените системи веќе не го мерат успехот само по број на интервенции, туку по тоа колку успеале да спречат појава и развој на болест, колку брзо препознале ризик и колку безбедно го насочиле пациентот низ системот. Тоа е премин од „пожарникарско“ здравство кон здравство кое преку предвидување превинира, односно здравство кое е исполнето со современи болници, интероперабилни дигитални платформи, поддржано од вештачка интелигенција и телемедицина која релативизирајќи го просторот ја елиминира географијата како бариера.

Токму затоа, дигитализацијата кај нас не смее да се сведе на набавка на софтвер или на „електронски печат“ за старите навики. Таа мора да биде системска алатка што ги ослободува лекарите од административни обврски, ги прави податоците побрзи од бирократијата и ја гради довербата преку транспарентност. За помалите држави како Македонија, ова е и шансата за „скок“ со правилно поставени правила на упатување и алгоритамски „gatekeeper“ меѓу примарно, секундарно и терциерно ниво, со поврзани регистри и стандарди што создаваат заеднички јазик на системот, можеме да ја исправиме аномалијата каде што пациентите непотребно завршуваат на терциерно. Така, инвестициите во инфраструктура, кадар и дигитални решенија стануваат една иста политика на рамномерност, безбедност и предвидливост.

Иднината која ја гледаме во светот, како што се дигитални близнаци што симулираат исходи, ВИ што препознава ризик пред симптомите, виртуелни болници без ѕидови и персонализирана медицина, не мора утре да биде наша секојдневна реалност, но мора денес да биде наша насока. Нашата обврска е да преминеме од вчерашната реалност на преполни болници, лекари под огромен притисок, системи што постојано се обидуваат да балансираат меѓу ограничени ресурси и сè поголеми очекувања од граѓаните, кон иднина исполнета со здравство водено од податоци, паметни болници, дијагностика поддржана од вештачка интелигенција и технологии што не само што реагираат, туку превенираат и предвидуваат.

Авторот е министер за здравство

The post Здравството во 2026 – од темели до систем што планира, превенира и штити appeared first on plusinfo.mk.

The post НЕКА БИДЕ ОВА ГОДИНА ВО КОЈА МИРОТ И НАПРЕДОКОТ ЌЕ ГИ ПОБЕДАТ СИЛИТЕ НА ЗЛОТО, ХАОСОТ И СТРАДАЊАТА appeared first on plusinfo.mk.

Македонија постигна значителниот напредок во спроведувањето на реформите предвидени со Реформската агенда, за што доказ е и исплатата на две транши на средства во рамки на Планот за раст на Западен Балкан, се наведува во Извештајот за напредокот на земјава на европскиот пат, што Европската комисија официјално ќе го објави утре.

– (Македонските) власти продолжија да работат на имплементација на патоказите за владеење на правото, на реформата на јавната администрација и на функционирањето на демократските институции, како и на Акцискиот план за заштита на малцинствата – се вели во извештајот.

Сепак, во него се забележува дека земјата треба да ги интензивира напорите за почитување на владеењето на правото, особено заштитата на независноста и интегритетот на судството и да ја засили борбата против корупцијата, при што се оценува дека е постигнат „ограничен напредок“ во областа на судските реформи.

Како позитивен развој на настаните во извештајот се наведува формирањето на Советот за соработка меѓу Владата и граѓанското општество и се оценува дека земјата постигнала одреден напредок во однос на плурализмот и слободата на медиумите и на слободата на изразување.

Европската комисија во документот посочува и дека земјата е целосно усогласена со надворешната и безбедносната политика на ЕУ, како и дека една од државите што се приклучи на Конвенцијата за заеднички транзит, чија цел е забрзување на движењето на стоките преку границите.

Во извештајот се повторува и претходно изнесениот став за потребата од спроведување „со добра волја од сите страни“ на склучените билатерални договори, вклучувајќи го и Преспанскиот договор со Грција и Договорот за пријателство, добрососедство и соработка со Бугарија.

Исто така, се нотира и дека се уште не се усвоени уставните амандмани насочени кон вклучување во Уставот на граѓани кои не претставуваат мнозинство, како што се Бугарите, за што земјата презела обврска.

The post МАКЕДОНИЈА ЗНАЧИТЕЛНО НАПРЕДУВА ВО РЕФОРМСКАТА АГЕНДА Според Извештајот на ЕК, има „ограничен напредок“ во судските реформи appeared first on plusinfo.mk.

Известувачот на Европскиот парламент за Македонија, Томас Вајц, во интервју за бугарската новинска агенција БГНЕС рече дека големото мнозинство во ЕП сака да ја поддржи Македонија и целиот регион за подобар економски, политички и социјален развој.

– Знам дека и јас самиот се обидувам да го поддржам процесот на пристапување на сите шест земји од Западен Балкан, вклучувајќи ја и Македонија. Јас исто така сум и пријател на Бугарија – изјави Вајц.

На прашањето дали сегашната влада на Македонија има реална намера да ги спроведе бараните промени, Вајц беше дециден дека не може да го потврди тоа, но нагласи дека Европскиот парламент и понатаму е подготвен да ја поддржи земјата.

– Она што го знам е дека мнозинството во ЕП сака да ја поддржи земјата и целиот регион за подобар економски, политички и социјален развој – рече тој.

Тој нагласи дека лично се залага за процесот на пристапување на сите шест земји од Западен Балкан.

– Знам дека и јас самиот се обидувам да го поддржам процесот на пристапување на сите шест земји од Западен Балкан, вклучувајќи ја и Македонија – изјави Вајц.

Во однос на шпекулациите дека претседателот на ВМРО-ДПМНЕ, Христијан Мицкоски, извршил притисок врз европските институции, Вајц одговори дека извештајот го изработил објективно и врз основа на факти.

– Ја работам својата работа врз основа на фактите и што е можно пообјективно. Мојата единствена задача е да анализирам каде се наоѓа земјата во однос на европското право, владеењето на правото, независноста на судството, медиумите… И токму тоа го направив во овој извештај – додаде тој.

Според него, извештајот не задира во прашања на јазик и идентитет, туку оценува состојбата во државата во рамки на европските вредности.

– Да, дел од тие вредности е правилното вклучување на малцинствата. Во овој случај, имаше многу дебати за вклучувањето на бугарската заедница, што е одразено во текстот. Но, покрај тоа, како што реков, станува збор за државата, за владеењето на правото – ова е процес базиран на заслуги, а билатералните прашања треба да се решаваат меѓу самите земји – рече Вајц.

Тој нагласи дека во моменталниот геополитички контекст, Европејците мора да се обединат.

– Во сегашната геостратешка реалност, Европејците мора да бидат обединети и да го стават она што ги обединува на прво место. Тоа ќе ни помогне да продолжиме заедно напред – додава тој.

Во заклучокот, Вајц ја повтори својата поддршка за регионот, но истакна дека напредокот мора да биде исклучиво базиран на реални резултати.

– Се сметам за голем пријател на земјите од Западен Балкан, како и за голем пријател на Бугарија. Мислам дека ако го ставиме она што нè обединува на прво место, тоа ќе биде во најдобар интерес на нашите земји и нашите народи – вели тој.

На прашањето дали бил под влијание од Мицкоски или други европски политичари, Вајц кусо одговори:

„Категорично – не“.

The post 📽️ НЕ СУМ ПОД ВЛИЈАНИЕ НА МИЦКОСКИ Томас Вајц тврди дека неговиот извештај за Македонија е објективен appeared first on plusinfo.mk.

Европскиот парламент утре треба да гласа за извештајот за напредокот на Македонија, но Бугарија испраќа јасна порака: документот нема правна сила и нема да влијае на ставот на официјална Софија.

Бугарскиот министер за надворешни работи Георг Георгиев, од Брисел, изјави дека извештаите на ЕП не се обврзувачки и не можат да ја заобиколат волјата на земјите-членки.

– Секоја земја-кандидат мора да ги исполни условите што сме ги поставиле. Бугарија е доследна, проширување ќе има само ако се почитуваат договорите. Никој не може да ја заобиколи преговарачката рамка од 2022 година – рече Георгиев.

Прашан дали има очекувања од утрешното гласање во Комитетот за надворешна политика на ЕП, Георгиев остро возврати.

– Ние не се мешаме како некои наши југозападни соседи. Не е коректно политичари однапред да знаат каков ќе биде исходот – рече тој.

Министерот дури и ги прозва европратениците кои, според него, ја „инструментализираат“ дебатата во Брисел и се обидуваат да ја преформулираат вистината за идентитетот и јазикот.

– Европските институции не се алатка за промовирање на туѓи агенди. Ниту една земја-членка не се откажува од консензусот, Бугарија сигурно нема – заклучи Георгиев, алудирајќи дека секој обид да се форсира процесот ќе заврши со вето.

The post БУГАРИЈА ПОВТОРНО ГО СПОРИ ПАТОТ НА СКОПЈЕ КОН ЕУ Министерот Георгиев порача дека Извештајот за Македонија нема тежина appeared first on plusinfo.mk.