Платформата „Разговори за иднината во 12:05“ реагираше на денешната прес-конференција на лидерот на СДСМ, Венко Филипче, обвинувајќи го дека со нападите врз учесниците на иницијативата се обидува да ја дискредитира платформата.

Во писмената реакција испратена до медиумите, организаторите наведуваат дека имаат разбирање за, како што велат, „растечката нервоза“, но дека нема да премолчат, особено поради учесниците на вчерашната сесија кои не се политичари.

Тие тврдат дека Филипче и тесниот круг околу него претставуваат фракција во СДСМ и го оспоруваат неговиот легитимитет во партијата.

„Венко Филипче со малата група се фракција во СДСМ. Тој не е претседател на членството туку претседател на фиктивни картички за гласање“, се наведува во реакцијата.

Организаторите оценуваат дека присуството на денешната прес-конференција на СДСМ не соодветствувало со бројот на гласови што Филипче ги добил на внатрепартиските избори и додаваат дека нема основа за обвинувањата што ги упатил кон нив.

Во реакцијата тие се осврнуваат и на односот со Левица, наведувајќи дека меѓу нив постојат значителни политички разлики, но дека имаат заедничка цел – политички пораз на Христијан Мицкоски и на Венко Филипче.

Од платформата тврдат дека на втората сесија на „Разговори за иднината во 12:05“ се водела идеолошка, експертска и демократска дебата каква што, според нив, долго време немало во СДСМ. Тие проценуваат и дека учесниците на средбата претставувале политички потенцијал од најмалку 150.000 гласа.

Организаторите понатаму го обвинуваат Филипче дека со јавните настапи намерно го попречува поширокото обединување на опозициската и прогресивна јавност.

„Главен кочничар на обединувањето на опозициската демократска и прогресивна јавност е ова изгубено партиско раководство чија единствена цел му е да се докопаат до пратенички мандати“, се наведува во реакцијата.

Тие дополнително тврдат дека мнозинството членови на СДСМ не го делат ставот на актуелното раководство и дека умеат самостојно да проценат кој какви политички цели има.

Во завршницата на реакцијата, организаторите упатија и најостро обвинување кон Филипче, тврдејќи дека тој „не е жртва“, туку „егзекутор на највалканиот дил во поновата политичка историја на Македонија“.

The post НЕ Е ПРЕТСЕДАТЕЛ НА ЧЛЕНСТВОТО, ТУКУ НА ФИКТИВНИ КАРТИЧКИ Жесток одговор од „12:05“ по прес-конференцијата на Филипче appeared first on plusinfo.mk.

Движењето ЗНАМ – За наша Македонија денеска во Гевгелија продолжи со средбите со граѓаните под мотото ‘Две години работа. Две години резултати. Една љубов – Македонија’, на кои пред јавноста го презентира сработеното во изминатите две години на своите именувани и избрани функционери и отвора директен разговор за она што е направено и постигнато за Македонија, пишува во денешното соопштение.

Пред граѓаните во Гевгелија, претседателот на Движењето ЗНАМ и градоначалник на Општина Куманово, Максим Димитриевски, порача дека ЗНАМ не бега од одговорноста, туку напротив, застанува пред граѓаните со отчет за сработеното и јасна визија за периодот што следува.

– Ние сме единствената политичка партија која на половина мандат излегува пред граѓаните и кажува што сме ветиле, што сме направиле и што останува да направиме. Затоа што знаеме кои сме, знаеме зошто сме влезени во политиката, знаеме што сме сработиле, знаеме што сме постигнале и знаеме каде одиме. Не бегаме од одговорноста и не се плашиме од отчетот пред граѓаните – порача Димитриевски.

Оттука, од ЗНАМ посочуваат дека политичката одговорност не завршува со изборите. Довербата не се бара само во моментот кога се гласа, таа се оправдува со работа, со резултати и со подготвеност јавно да се застане зад донесените одлуки и преземените обврски.

Димитриевски истакна дека најважно е граѓаните сами да можат да го видат резултатот од преземената одговорност и да препознаат што е направено во изминатиот период.

– Не бараме од граѓаните да ни веруваат само затоа што сме кажале дека ќе направиме нешто. Сакаме граѓаните да видат што е направено, да го почувствуваат резултатот и самите да оценат дали сме ја оправдале довербата што ни ја дадоа. Пред нас има уште работа, уште многу предизвици, но имаме јасна цел и знаеме по кој пат треба да продолжиме – потенцираше Димитриевски.

На панел-дискусијата свои обраќања имаа и координаторот на пратеничката група на ЗНАМ, проф. Бобан Карапејовски, државниот секретар во Министерството за земјоделство, шумарство и водостопанство, Надица Џерковска, и државниот секретар во Министерството за внатрешни работи, Сашо Петрушевски. Тие говореа за конкретните резултати од работата во Собранието и Владата, за донесените законски решенија, поддршката за земјоделството и македонскиот земјоделец, како и за мерките и активностите за унапредување на безбедноста на граѓаните.

По две години работа, ЗНАМ продолжува со истата обврска, да работи, да испорачува резултати и да биде меѓу граѓаните. Со јасна цел, со одговорност и со верба во Македонија.

The post НЕ БЕГАМЕ ОД ОДГОВОРНОСТА, ИЗЛЕГУВАМЕ ПРЕД ГРАЃАНИТЕ СО ОТЧЕТ Димитриевски со порака од Гевгелија appeared first on plusinfo.mk.

Претседателот на Социјалдемократскиот сојуз на Македонија, Венко Филипче, на денешната прес-конференција го оцени вчерашниот настан на Платформата за промени во СДСМ како обид за дефокусирање на јавноста од владините политики и порача дека партијата останува единствениот опозициски бастион во државата.

Според Филипче, настанот претставува здружување на лица кои дејствуваат во интерес на власта со цел да се фрагментира опозицијата во период кога, како што рече, раководството отвора клучни општествени и економски прашања. Поранешните партиски функционери на СДСМ, вели, ги потцениле членовите на партијата и дека нивните постапки се дел од подолг процес насочен против социјалдемократите.

– Вчера видовме на едно место мала група на пучисти, поранешни функционери на СДСМ, но и членови на други партии, на ЛДП, луѓе вработени од ЗНАМ, и, внимавајте, на Левица, партијата којашто има целосно спротивни вредносни политики од нашите, партијата којашто отворено застапува руски и кинески интереси тука кај нас и е финансирана од Русија и од Кина…Вчера се докажа дека Социјалдемократскиот сојуз на Македонија е единствениот опозициски бастион во земјата. СДСМ вчера се покажа и се докажа дека е единствената партија којашто може да биде и е носител на опозициското движење и да ја канализира целата опозициска енергија во земјата. Жалам што тие поранешни партиски наши функционери, партиски другари, ги потценија членовите на СДСМ – рече претседателот на СДСМ.

Филипче наведе дека нивната цел е јавноста да не го насочува вниманието кон темите за рудниците, задолжувањата, земјоделството, платите, пензиите и меѓународните претставувања.

– Зошто не зборуваат или не го одземаат вниманието од тоа така силно и аргументирано, опозициски да ја критикуваме власта, за лошите политики коишто ги води, зошто не зборуваат за дата-центрите, за намерата на Христијан Мицкоски и на неговата банда да ја земат водата од земјоделците, зошто не зборуваат за петте нови рудници коишто за првпат се впишуваат во просторниот план, план изготвен од Министерството за животна средина? Ќе се копа антимон за туѓи интереси. Антимон којшто ќе влезе и во земјата и во водата и ќе ги загади и земјата и водата, и ќе го загрози здравјето на луѓето коишто живеат во тие региони. Пет нови рудници, тие против коишто ние се боревме – нагласи Филипче.

Одговарајќи на новинарско прашање за поддршката од пратеничката група и позицијата на пратеничката Славјанка Петровска, Филипче истакна дека пратеничката група функционира сложно.

– Пратеничката група не само што дава поддршка, туку имаме секојдневни координации. Заеднички градиме политики, даваме предлози. Минатата недела работевме интензивно и се спремавме за состаноците и со францускиот Сенат, и со Мешовитиот парламентарен комитет. Понесовме закони за минимална плата, за финансиска поддршка на земјоделците. Славјанка Петровска ја слушав вчера, многу е принципиелна. Треба да каже дали, според нејзините принципи, сега сите луѓе коишто смета дека седат околу неа и не работат добро во Парламентот, тоа е пратеничката група, или се криминалци, таа само така ќе продолжи да седи со нив – рече Филипче.

Прашан во врска со законските измени на Кривичниот законик донесени во 2023 година, претседателот на СДСМ посочи дека тогаш не бил дел од партиското раководство.

– Јас тогаш ниту се занимавав со политика, ниту бев дел од раководството. Прашајте ги тие што го изгласаа. Дел од луѓето коишто седеа вчера на таа маса, овие тројца што ги споменав, седеа таму. Прашајте ги нив и дали тогаш можеби не биле дел од некој пазар, како што сега тоа го прават. Ние ја зачувавме партијата од 2025 година. Како беше тргната работата, можевме да останеме без организација и структура – посочи Филипче.

На прашање дали е можно помирување со актуелната пратеничка од редовите на СДСМ Славјанка Петровска и каква ќе биде соработката во иднина, Филипче порача дека е подготвен за дијалог со секој што има искрени намери.

– Таа има некои нејзини принципи. Нека одлучи според нејзината принципиелност. Јас добро знам дека Славјанка Петровска има принципи, ама ако не одговараат, има и други, резервни. Така да, нека се одлучи сама. Јас сум спремен да разговарам, да дебатирам со било којшто има добра намера. Што ќе ни предложат, а што не знаеме ние сега? Што е намерата на таа група, на сите сателити на Христијан Мицкоски седнати на едно место, тогаш кога ги отвораме најголемите скандали на Владата – заклучи претседателот на СДСМ на денешната прес-конференција.

The post „ВИДОВМЕ МАЛА ГРУПА ПУЧИСТИ, ЛУЃЕ ОД ЗНАМ И ЛЕВИЦА“ Филипче жестоко по Платформата за промени во СДСМ appeared first on plusinfo.mk.

Додека Владата работи на подобрување на условите за граѓаните, во опозицијата се случува хаос, оцени денеска пратеникот на ВМРО-ДПМНЕ, Бране Петрушевски, обвинувајќи го лидерот на СДСМ, Венко Филипче, дека наместо да се занимава со проблемите во сопствената партија, вината ја бара во владејачката партија.

– Додека надлежните од власта работат на сите полиња што водат кон подобри услови во државата за секој еден граѓанин, во опозицијата се случува хаос – изјави Петрушевски на прес-конференција.

Тој се осврна на актуелностите околу СДСМ и на политичките активности на премиерот Христијан Мицкоски во САД.

Според Петрушевски, Мицкоски во САД има динамична агенда насочена кон привлекување нови инвестиции во Македонија, продлабочување на партнерствата со САД и НАТО, како и изнаоѓање начини за забрзување на процесот на интеграција во Европската Унија.

– Во меѓувреме, во опозицијата наместо консолидирање и размислување што би им понудиле реално на граѓаните, се случува циркус – рече Петрушевски.

Тој тврди дека во СДСМ има спротивставувања меѓу актуелното раководство и поранешни, но и актуелни функционери на партијата.

– Од една страна Венко Филипче и талогот на СДС, од друга страна поранешни функционери на СДС, но и актуелни се поставуваат контра Филипче – изјави пратеникот.

Петрушевски го обвини Филипче дека наместо да се занимава со состојбите во сопствената партија, критиките ги насочува кон ВМРО-ДПМНЕ.

– И во сиот овој циркус, Филипче наместо да си ја гледа домашната работа, тој ја обвинува ВМРО-ДПМНЕ. Сè додека за Филипче само другите се виновни, СДС тешко дека може да се извлече од дното – рече тој.

Петрушевски порача дека ВМРО-ДПМНЕ, според него, нема намера да се меша во внатрешните односи во СДСМ.

– На Филипче и талогот од СДС повторно ќе им порачаме, прво, на ВМРО-ДПМНЕ му одговара ваков СДС, а ВМРО-ДПМНЕ ниту сака, ниту има намера да се меша во нивната внатрешна работа – изјави Петрушевски.

Тој додаде дека, според него, фокусот на владејачката партија е на реализација на проекти.

– Единствено нешто што прави ВМРО-ДПМНЕ е спроведување проекти во интерес на граѓаните и државата – заклучи пратеникот.

Изјавите на Петрушевски се партиски ставови и оценки за состојбите во опозицијата.

The post ВО ОПОЗИЦИЈАТА СЕ СЛУЧУВА ЦИРКУС Петрушевски му порача на Филипче да не ја бара вината во ВМРО-ДПМНЕ appeared first on plusinfo.mk.

ВМРО-ДПМНЕ со остри критики до лидерот на СДСМ, Венко Филипче, обвинувајќи го дека не може одговорноста за состојбата во СДСМ да ја префрла на други политички партии.

Од владејачката партија велат дека состојбата во СДСМ е последица на политиката на актуелното раководство и тврдат дека во опозициската партија се создаваат фронтови со цел Филипче да биде тргнат од лидерската позиција.

„Венко не може да ги обвинува сите за состојбата во која се наоѓа СДС. Партијата е во таа состојба заради тоа што конкретно Венко Филипче е на чело, а очигледно дека никој не се согласува со тоа, па дури се креираат цели опозициски фронтови за Венко да се тргне од чело на СДС“, велат од ВМРО-ДПМНЕ.

Од партијата наведуваат дека СДСМ по последните изборни резултати, според нивната оценка, се наоѓа на ниско ниво на поддршка. Тие тврдат и дека поранешни функционери на СДСМ подолг период јавно бараат Филипче да се повлече од лидерската позиција.

ВМРО-ДПМНЕ истовремено ја брани работата на актуелната влада, посочувајќи дека во изминатите две години спроведувала економски политики и проекти за кои, како што велат, постојат конкретни показатели дека државата се движи во позитивна насока.

Од партијата го обвинуваат Филипче дека во својство на претседател на СДСМ во јавноста шири, како што наведуваат, дезинформации и дека не успева да ја консолидира партијата.

„Две години како претседател на СДС само шири дезинформации и глупости во јавноста кои немаат никаква врска, кои постојано се демантирани дали од домашни дали од европски институции, две години лута и не може да се помири дека е опозиција и не може ни да ја консолидира партијата за да почнат да се однесуваат како опозиција“, наведуваат од ВМРО-ДПМНЕ.

Владејачката партија го критикува и однесувањето на СДСМ во Собранието, тврдејќи дека пратениците на партијата избегнуваат работни групи, меѓу кои и оние поврзани со Изборниот законик, како и пратенички прашања.

Во соопштението се осврнуваат и на наводни несогласувања во самата СДСМ.

„А вчера на една национална телевизија повторно нивен член посочи дека Венко ја држи партијата окупирана и узурпирана, но и дека не може да се однесува во јавноста неодговорно и да се појавува кога ќе му текне за одредени теми да биде гласен, а за одредени теми да го нема на мапа и да нема став“, велат од ВМРО-ДПМНЕ.

Од владејачката партија додаваат дека политички гледано, како што наведуваат, им одговара Филипче да остане на чело на СДСМ, но оценуваат дека тоа не е во интерес на граѓаните и државата.

„На ВМРО-ДПМНЕ му одговара Венко Филипче да е претседател на СДС. Не им одговара на граѓаните и на државата. Но ако продолжи вака, на добар пат се да се уништат меѓусебно, Венко и остатокот од талогот на СДС“, заклучуваат од ВМРО-ДПМНЕ.

Од СДСМ во своја објава од 26 септември Филипче го критикуваше работењето на власта, особено во однос на животниот стандард и состојбата во земјоделството, и повтори дека СДСМ предлага зголемување на минималната плата на 600 евра и финансиска поддршка за земјоделците.

The post ВМРО-ДПМНЕ СО НОВА ПОРAКА ДО ФИЛИПЧЕ Престанете да обвинувате други за состојбата во СДСМ appeared first on plusinfo.mk.

Претседателот на Движењето ЗНАМ, Максим Димитриевски, ги критикуваше СДСМ и ДУИ, обвинувајќи ги дека по долгогодишно учество во власта денес се обидуваат да ја критикуваат актуелната власт и да даваат лекции за државништво.

Димитриевски ова го кажа во гостувањето во емисијата „Вести плус“ на Канал 5, осврнувајќи се на политичките односи во земјата и на, како што оцени, недоволната комуникација меѓу власта и опозицијата во изминатите години.

Тој порача дека политичките партии кои биле дел од власта не можат да избегаат од своето политичко наследство и од одлуките што ги носеле додека управувале со државата.

– Јас и луѓето заедно со мене во мојот тим, со СДСМ расчистивме многу одамна, уште кога сметавме дека државата ја водат во многу лоша насока – рече Димитриевски.

Говорејќи за актуелните случувања во СДСМ, тој посочи дека дел од луѓето кои денес ги критикуваат состојбите претходно биле дел од системот во кој, според него, имале влијание.

– Едниот беше еден од главните политички гуруа на Димитар Ковачевски. Другите беа членови по управни одбори и така натаму, тогаш молчеа, кога Максим зборуваше – истакна претседателот на ЗНАМ.

Димитриевски се осврна и на ДУИ, оценувајќи дека со нејзиното заминување во опозиција е променета политичката ситуација во земјата.

Според него, во минатото постоел простор за политички уцени, кој сега е намален.

Димитриевски порача дека СДСМ и ДУИ треба да се соочат со сопственото политичко наследство и со резултатите од периодот во кој биле дел од власта.

Неговата порака е дека политичката одговорност, според него, треба да се мери преку конкретните одлуки и резултати, а не само преку политички изјави и партиски прес-конференции.

The post ДИМИТРИЕВСКИ УДРИ ПО СДСМ И ДУИ Државата ја делеа 20 години, а денес даваат лекции за државништво appeared first on plusinfo.mk.

Собранието денеска на 112. седница, на предлог на премиерот Христијан Мицкоски во рамки на реконструкцијата на Владата ги разреши министрите за правда Игор Филков, за земјоделство, шумарство и водостопанство Цветан Трипуновски, за односи меѓу заедниците Игор Стоиљковиќ, за здравство Азир Алиу, за туризам и култура Зоран Љутков, за социјална политика, демографија и млади, Фатмир Лимани, за локална самоуправа Златко Перински, како и Шабан Салиу од функцијата министер без ресор.

Разрешени се и замениците министри за социјална политика, демографија и млади Ѓоко Велковски и за култура и туризам Седат Сулејмани.

– Од првиот ден, кога ја презедовме одговорноста, кажав дека оваа Влада нема да биде Влада на комфор, туку Влада на резултати. Нема да биде Влада во која функциите ќе се сметаат за стекнато право, туку за обврска што секој ден повторно мора да се заслужува. Тоа не беше политички слоган, тоа беше принцип. Денес, покажуваме дека тој принцип важи педнакво за сите – порача премиерот Христијан Мицкоски, образложувајќи го предлогот за разрешување членови на Владата.

Функцијата, посочи, не била и никогаш нема да биде цел сама по себе, таа е средство преку кое му се служи на народот – порача

Денес, нагласи, не се збогуваме со луѓе што не работеле, туку, напротив, со луѓе што во разни ресори дадоа свој придонес за реализација на програмата за која граѓаните дадоа доверба.

Според него, на реконструкцијата на Владата не треба да се гледа како на крај на нечија работа. Заблагодарувајќи им се на членовите на Владата, кои, како што рече, во изминатиот период чесно, одговорно и посветено ги извршуваа функциите, потенцира – „со искрена благодарност за нивната работа ја отвораме следната етапа, не затоа што го негираме сработеното, туку затоа што сакаме врз она што е направено да изградиме уште повеќе“.

Во текот на расправата опозицијата оцени дека реконструкцијата е политичка, а не кадровска и е увертира за предвремени избори.

Пратеникот Борислав Крмов од Левица, говорејќи по првата точка на пленарната седница посветена на разрешувањето на министрите, праша зошто се менува министерот за земјоделство, ако работел добро.

– Пратениците на владејачката ВМРО-ДПМНЕ зборуваа за тоа какви резултати постигнал, како вовел ред во хаосот, колку било сега подобро во земјоделието од порано и слично. Прашањето е, ако е така, зошто сега го менуваме? ​Зборуваме за министер кој го донесе македонското земјоделие во колапс, којшто сега им должи околу 70 милиони евра неисплатени субвенции, 40 милиони евра субвенции скратени за 2026-та, којшто во моментот има криза за млекото, оризот, пченицата и јачменот…, рече Крмов.

Според него, Министерството за земјоделство се третира како еден вид жежок костен којшто се подава меѓу коалиционите партнери, иако тоа треба да биде еден од галвните сектори во државата бидејќи го третира производството на храна.

Од реконструкцијата, рече Крмов, најмногу ќе изгуби политичката партија ЗНАМ која го губи секторот правда, а ВЛЕН ќе излезат појаки затоа што добиваат ресор плус. Со давањето на секторот правда на ВЛЕН, според Крмов, се отвара можноста правосудниот испит да се полага и на албански јазик, а со тоа на долг рок правосудството ќе стане двојазично.

Политичка, а не кадровска реконструкција и увертира за предвремени избори, вака опозицијата ја оценува реконструкцијата на Владата за која се дебатира на денешната собраниска седница.

Пратеничката Бисера Костадиновска-Стојчевска од СДСМ говореше за работата на досегашниот министер за култура Зоран Љутков за кого рече дека ќе остане запаметен како министер со најголем број тужби за неисплатени плати и непочитување на колективните договори. За неговиот двегодишен мандат рече дека нема ниту еден капитален проект.

– Од двете години пред него ги продолжи Љубојно, просториите на Националниот џез оркестар, Кино Партизан, Кино во Валандово, нови локални центри за култура. Имавме прва реставрација на икони во регионот којашто тој за жал не ја продолжи. Имавме пет нови национални установи и секоја од нив е со посебна традиција, со посебен придонес на којшто на секое негово јавно излегување му се заканува затворање. ​Најголемиот придонес од тие две години пред него е Новиот закон за употреба на македонски јазик. И може да релативизира дека тоа бил само посебен текст, како што кажа, ама не знае да го спроведе две години. И во тој закон имаше Инспекторат за македонски јазик на којшто откако му го намали статусот, никако да го профункционира. Имаме статус УНЕСКО којшто е под сериозна закана. Најважно од сè, имаше две години пред него целосно почитување на колективниот договор. Во тие две години пред него имаше заштитен македонски јазик, признаен меѓународно и испочитуван, вреднуван и најважно непреговаран, рече Костадиновска-Стојчевска.
​Пратеничката Велика Стојкова – Серафимовска од ВМРО-ДПМНЕ во репликата на говорот на Костадиновска-Стојчевска рече дека за две години се решени многу проблеми кои СДСМ ги има оставено.

– Ја започнавме работата со УНЕСКО за што имаме и конкретни резултати. Вие го закочивте проектот за Универзална сала, во ваше време се потпиша колективниот договор без анализа. Не може за две години да се решат проблемите кои вие ги натрупавте – рече Стојкова-Серафимовска.

На местото на Филков за министер за правда треба да биде изберан Јетон Шасивари („Вреди“). Стоилковиќ (коалиција ВМРО-ДПМНЕ) ќе ја преземе министерската функција во Локалната самоуправа, Златко Перински директорската функција во Фондот за здравствено осигурување, каде што на чело е Сашо Клековски (ВМРО-ДПМНЕ), кој ќе биде нов министер за здравство на местото на Азир Алиу. За министер за односи меѓу заедниците е предложен Агон Ферати („Вреди“). На местото на Цветан Трипуновски ќе дојде Борче Серафимовски (ЗНАМ), а на местото Шабан Салиу, министер без ресор, е предложен Ерџан Демир (ВМРО-ДПМНЕ).

Во тек е расправата за избор на нови членови на Владата.

The post ПОЧНА ВЛАДИНАТА РЕКОНСТРУКЦИЈА Собранието разреши 8 министри, во тек е расправата за новиот тим appeared first on plusinfo.mk.

Реконструкцијата на Владата не е казна, туку порака дека функцијата мора постојано да се заслужува, порача премиерот Христијан Мицкоски. Денеска пред пратениците нагласи дека Владата не е создадена за комфор, туку за резултати и дека никој нема загарантирано место без оглед на вложениот труд и интегритет.

Зборувајќи на 112. седница на Собранието на која треба да бидат разрешени и избрани членови на Владата тој истакна дека довербата што Владата ја добила од граѓаните е обврска која секој ден повторно мора да се оправдува.

Во продолжение е говорот на премиерот.

„Пред вас стои предлог за разрешување на дел од министрите. Веднаш да ви кажам, сите до еден се луѓе со достоинство, луѓе со своја чест и пред се чесни луѓе. Сите ние и перцепцијата за нас ја градиме од одлуките кои ги носиме. Тоа сме ние со сите свои предности, маани, и со своето разбирање за состојбите.

Од првиот ден кога ја презедовме одговорноста кажав дека оваа Влада нема да биде влада на комфор, туку влада на резултати. Нема да биде влада во која функциите ќе се сметаат за стекнато право, туку за обврска што секој ден повторно мора да се заслужува. Тоа не беше политички слоган.

Тоа беше принцип. И денес покажуваме дека тој принцип важи подеднакво за сите. Функцијата никогаш не била и никогаш нема да биде цел сама по себе. Функцијата е средство преку кое му служите на народот. Довербата што граѓаните ја дадоа пред две години не му припаѓа ниту на премиерот, ниту на министрите, ниту на која било политичка партија.

Таа доверба им припаѓа единствено на граѓаните. Ние сме само привремени чувари на таа доверба. И затоа имаме обврска постојано да се преиспитуваме. Да проценуваме дали можеме повеќе. Дали можеме подобро. Дали можеме побрзо. Влада што престанува да се преиспитува, почнува да стагнира. А влада што стагнира, ја успорува и државата.

Нашата цел никогаш не била само да управуваме. Нашата цел беше да менуваме. Да ги менуваме институциите, навиките. Да ја менуваме политичката култура.

Да покажеме дека во Македонија конечно може да постои власт која нема да се плаши да носи одлуки, дури и кога тие не се лесни. Затоа денес не гледајте на оваа реконструкција како на крај на нечија работа.  Го велам затоа што граѓаните заслужуваат јасно да ја видат разликата. Разликата меѓу политика што се задоволува со изговори и политика што носи резултати.

Разликата меѓу оние што ветуваа промени и оние што денес секојдневно ги реализираат. И токму затоа, пред да ги предложам новите министри, чувствувам обврска да им се заблагодарам на луѓето кои во изминатиот период чесно, посветено и одговорно ги извршуваа своите функции.

Затоа што во оваа Влада не постои заборав за вложениот труд. Постои почит кон резултатите. И постои убедување дека секој што чесно работел за државата заслужува благодарност. Една од најважните лекции што ја научив низ политиката е дека зрелоста на една Влада не се гледа само во тоа како избира луѓе, туку и во тоа како се разделува од нив.

Во политиката најлесно е да се заборави. Најлесно е да се препише секој успех само на актуелниот момент, а секој предизвик на оној што бил пред нас. Јас нема да го правам тоа. Затоа што секој човек кој чесно, професионално и со чувство на одговорност ја извршувал својата должност заслужува почит.

Денес не се збогуваме со луѓе кои не работеле. Напротив. Денес им оддавам признание на луѓе кои во различни околности, во различни ресори и со различни предизвици дадоа свој придонес во реализацијата на програмата за која граѓаните ни ја дадоа довербата.

И вие од опозицијата ќе зборите со флоскули и невистини, а јас со конкретни бројки и резултати. На Зоран Љутков сакам искрено да му се заблагодарам за работата што ја направи во Министерството за култура. Кога ја презеде функцијата, ресорот беше оптоварен со наследени долгови, недоволни средства и институции кои предолго работеа во неизвесност.

Денес состојбата е суштински поинаква. Буџетот за култура е зголемен од 768 милиони денари во 2023 година на повеќе од 1 милијарда и 70 милиони денари во 2026 година. Буџетот за туризмот е зголемен од 58 милиони на 187 милиони денари, што претставува повеќе од тројно зголемување.

Исплатени се наследени долгови од 273 милиони денари, а дополнително се обезбедени 149 милиони денари за програмски активности, проекти и поддршка на културните институции и општините. Но најголемиот резултат не се бројките. Најголемиот резултат е што културата повторно стана државен приоритет.

Што уметниците повторно добија партнер во институциите. Што културното наследство повторно доби внимание какво што заслужува. И за тоа му благодарам.  Благодарност упатувам и до Цветан Трипуновски. Ресорот земјоделство беше еден од најтешките што ги наследивме.

Не само поради состојбите во секторот. Туку поради изгубената доверба кај земјоделците. Доверба што не се враќа со зборови. Туку со дела. Во првите месеци од мандатот беа исплатени речиси 4 милијарди денари заостанати обврски. Од јули 2024 година до денес се исплатени повеќе од 15 милијарди денари финансиска поддршка. Ставивме крај на праксата земјоделците со месеци, па и повеќе од една година, да чекаат за своите субвенции.

Од сектор што бележеше просечен пад од 4,4 проценти, денес зборуваме за повторен раст. Но најважно е што државата повторно стана партнер на земјоделецот. Тоа беше суштинската промена. Благодарност упатувам и до Игор Филков. Во Министерството за правда беа подготвени 33 реформски законски решенија за период од само две години.

Реформите во правосудството никогаш не се лесни. Тие не носат брзи политички поени. Но тие ја одредуваат довербата во државата. И затоа секој чекор направен во оваа област е важен чекор за иднината. Благодарност и до Азир Алиу, кој раководеше со еден од најсложените ресори во Владата.

Здравството е систем што секој ден носи нови предизвици. Тоа е ресор во кој секој успех изгледа мал, а секој проблем изгледа огромен. Токму затоа ја ценам неговата работа и неговата посветеност. Благодарност и до Фатмир Лимани, кој чесно и одговорно го извршуваше својот мандат и даде придонес во работата на Владата. Со Фатмир с епознаваме долго време, сме работеле, работиме и ќе работиме.

Почитувани пратеници, Ова не се зборови на формална благодарност. Ова е принцип. Во оваа Влада никој не се брише од историјата затоа што денес завршува една функција. Ниту, пак, некој ќе биде вреднуван според тоа дали останал или си заминал од кабинетот. Единственото мерило ќе остане она што го оставил зад себе.

Тоа е политичката култура што сакаме да ја изградиме. Култура во која функцијата не е награда. Не е сопственост, ниту право стекнато засекогаш. Туку привремена должност. Должност што секој ден повторно мора да се заслужува. И токму затоа денес, со искрена благодарност за нивната работа, ја отвораме следната етапа.

Не затоа што го негираме сработеното. Туку затоа што сакаме врз тоа што е направено да изградиме уште повеќе. Почитувани пратеници од опозицијата, Денес ќе нè убедувате како треба да се води држава. Но пред да ни делите лекции, погледнете што оставивте зад себе.

Ја презедовме државата со разнишани институции, нарушени јавни финансии, закочени капитални проекти, изгубена доверба кај граѓаните и чувство дека државата повеќе нема сила да ги штити сопствените интереси. Имате поранешни министри кои се дел од вашата пратеничка структура, обременети со скандали и сомневања за сторен криминал додека ја извршувале функцијата која ја извршувале.

Во вашето владеење премногу често националните интереси беа ставани во втор план. Донесувавте одлуки за кои голем дел од граѓаните сметаа дека се спротивни на националното достоинство и идентитет. Наместо да ја обединувате државата, оставивте длабоки политички и општествени поделби.

Промената на уставното име на државата останува една од најконтроверзните политички одлуки во поновата историја. Ние не сме овде за да го менуваме минатото. Но сме овде да не дозволиме повторно да се повтори. Затоа денес ја градиме државата од темелите. Ја враќаме довербата во институциите. Ја стабилизираме економијата.

Инвестираме во земјоделството, културата, здравството, инфраструктурата и локалниот развој. Работиме секој ден за да можеме повторно да биде држава што одлучува со самодоверба, што ги штити своите интереси и што се развива со јасен правец. Разликата меѓу нас и вас е едноставна. Вие ја потрошивте довербата што ја добивте.

Ние секој ден работиме повторно да ја заслужиме довербата на граѓаните. И токму затоа, денес граѓаните нека судат според нашите дела, а не според зборовите. Токму затоа сакаме да зборуваме за резултатите кои што ги оставивте и резултатите кои што ги остваруваме. Тие се најдобриот одговор на секоја критика и најсилниот доказ за разликата помеѓу две политики и две визии за Македонија.

На крајот, ова не е избор само меѓу две политички партии. Ова е избор меѓу две визии за Македонија. Едната визија ја видовме. Визија во која државата беше ослабена, институциите заробени од партиски интереси, а довербата на граѓаните потрошена. Визија во која премногу често личниот интерес беше над државниот, а националните прашања оставаа длабоки поделби што и денес ги чувствуваме.

Другата визија е онаа што ја градиме денес. Држава во која институциите му служат на народот, во која чесниот труд се вреднува повеќе од привилегијата, во која законот важи подеднакво за сите и во која успехот се мери според резултатите, а не според политичките врски. Ние не бараме граѓаните да ни веруваат на збор. Бараме да ги споредат двете визии. Да го споредат она што беше со она што денес се создава. Да ги споредат годините на застој со годините на обнова.

Верувам дека Македонија заслужува повеќе. Заслужува држава што ќе биде силна, достоинствена и успешна. Држава што нема да живее од минатото, туку ќе ја гради својата иднина со работа, чесност и одговорност. Тоа е онаа татковина во која верувам. Тоа е Македонија за која работиме. И тоа е Македонија што, заедно со нашиот народ, ќе ја направиме посилна отколку што ја затекнавме“, вели премиерот во своето обраќање на седницата.

The post ВЛАДАТА НЕ Е НА КОМФОР, ТУКУ НА РЕЗУЛТАТИ Премиерот Мицкоски опоменува дека функцијата е одговорност appeared first on plusinfo.mk.

Охридскиот договор не е сопственост на ДУИ и не е нивен имотен лист, вели партијата ВРЕДИ во соопштение.

– Тој договор е резултат на жртвувањето и напорите на еден цел народ. Во 24 години власт на оние што си го присвоија тоа наследство, Албанците видоа сè, но најмногу недовршени проекти и привремени решенија без суштински резултати – изјави на прес-конференција Мустафа Даути.

Даути вели дека во изминатите 24 години, Албанците никогаш не го виделе вистинското спроведување на децентрализацијата. Според него, доволно е да се погледнат општините со кои управуваа овие самопрогласени патриоти и сликата станува сосема јасна.

– Во текот на 24 години, уставниот принцип што произлегува од Охридскиот договор – правичната и соодветна застапеност, никогаш не го претворија во закон. 24 години слушавме многу ветувања, а видовме многу малку резултати за автопатот Скопје–Блаце. Го ветуваа во 2008, 2011, 2014, 2017, 2020 и 2023 година. Исходот секогаш беше ист, одолговлекување, недовршени работи и пропаганда. Ова е политичкото досие на една власт која 24 години зборуваше во име на Албанците, а работеше за сопствени интереси.

Даути тврди дека во изминатите 24 месеци, откако ВРЕДИ ја доби довербата на Албанците да ги претставува, партијата отворила процеси што ДУИ не ги отворила ниту за две децении.

– За 24 месеци, правичната и соодветна застапеност конечно добива законско решение. Го унапредуваме Охридскиот договор. Во изминатите 24 месеци, преку Оперативниот план за вработување, едно од највредните достигнувања на владата во која учествува ВРЕДИ, отвораме можности за вработување, самовработување и поддршка на младите, со цел да го запреме иселувањето.

Понатаму во говорот, Даути истакнува дека за 24 месеци, автопатот Скопје–Блаце од долгогодишен застој премина во фаза на реализација и деблокирање.

– За 24 месеци, Коридорот 8 повеќе не се користи за пропаганда. Денес се работи на терен, се градат патишта, се поврзуваат општините и се создава развој. За 24 месеци, децентрализацијата ја претворивме во конкретна политика, со реални средства и заслужен удел за општините. Обезбедивме 100 милиони евра за повеќе од 1.200 проекти во општините. За 24 месеци, го решивме статусот на медресантите, официјализиравме три факултети, инвестираме во кампусот на Мајка Тереза и потпишавме колективни договори со нашите универзитети.

Сонцето не може да се скрие со сито, порачува Даути во името на партијата ВРЕДИ.

„Тие од ДУИ го користеа Охридскиот договор за да ги полнат своите џебови, а ние градиме во општини, носиме закони и нудиме решенија“, се вели во партиското соопштение на ВРЕДИ.

The post РАМКОВНИОТ ДОГОВОР НЕ Е СОПСТВЕНОСТ НА ДУИ Партијата ВРЕДИ ги спореди своите 2 со 24 години на ДУИ appeared first on plusinfo.mk.

Пратеникот на ВМРО-ДПМНЕ, Миле Лефков, на прес-конференција изјави дека над 80% од граѓаните не поддржуваат уставни измени „под диктат на Бугарија“, додавајќи дека ваквите измени ги промовира и поддржува само опозицијата.

Според Лефков, СДСМ и Венко Филипче „се ставиле на располагање на бугарските интереси“ и, како што рече, „одработуваат во интерес на други држави затоа што се уценети“.

Тој оцени дека ваквиот пристап е спротивен на интересите на граѓаните, кои, според него, сакаат европска интеграција на Македонија „со достоинство, интегритет и заштита на идентитетот“.

Лефков ги обвини СДСМ дека и во периодот кога беа на власт, како што рече, „ги ставале личните интереси пред државните“, наведувајќи дека тоа се гледа преку „распродадени државни интереси и лични придобивки“.

– Мекото ткиво во Македонија, предводено од Филипче и СДСМ, носи штета на државата – изјави Лефков.

Тој додаде дека граѓаните даваат поддршка на ВМРО-ДПМНЕ за, како што рече, „исправено претставување на македонската историја, култура, јазик и идентитет“.

The post НАРОДОТ ПРОТИВ УСТАВНИ ИЗМЕНИ Лефков цитира висока поддршка против предлозите appeared first on plusinfo.mk.