По седум години, културата и туризмот повторно се во фокусот на Владата, со јасна цел повторно да бидат препознатливо обележје и двигател на развојот на Македонија, рече денеска на прес конференција Велика Стојкова Серафимовска, пратеничка од ВМРО-ДПМНЕ.

– Особено значајно во оваа насока е зголемувањето на средствата за Годишната програма во културата, па така од доделени 768 милиони денари во 2023 година се зголеми на 1 милијарда и 71 милион денари во 2026 година, што претставува раст од речиси 40 проценти.

Ваквото покачување на буџетот води кон зајакнување на националната култура, што се гледа преку зголемената поддршка на програмите во националните установи за 25 проценти, односно од 399 милиони денари во 2023 година на 493,5 милиони денари во 2026 година. Како резултат на тоа, сопствените приходи на националните установи се зголемени за 150 проценти во споредба со 2023 година.

По седум години повторно е реализиран конкурсот за креативни индустрии, преку кој во изминативе две години се поддржани 108 проекти. Во соработка со научната и стручната јавност започнато е и национално мапирање на креативните индустрии, кое ќе послужи како основа за изработка на првата Национална стратегија во оваа област.

По речиси една деценија е обновен и откупот на ликовни дела, при што се откупени 37 дела од значајни македонски автори во вкупна вредност од 6,6 милиони денари.

Буџетот на Агенцијата за филм е зголемен од 100 милиони денари во 2024 година на 187 милиони денари во 2026 година, а со законските измени ќе се обезбедат и дополнителни средства од игрите на среќа за развој на домашната филмска продукција.

Во изминатиот период значително се зголемени и средствата за капитални инвестиции од 230 милиони денари во 2023 година на 485 милиони денари во 2026 година. Во тек е реализацијата или завршната фаза на повеќе капитални проекти, меѓу кои Театарот во Струмица, реконструкцијата на киното „Партизан” во Битола, новите простории на Џез оркестарот, реконструкцијата на Македонскиот народен театар и други.

Значително е интензивирана и заштитата на културното наследство преку инвестиции во археолошки локалитети, реконструкција на споменици на културата, како и продолжување на проектот за возобновување на Светиклиментовиот универзитет на Плаошник.

Во областа на туризмот, буџетот е зголемен од 58 милиони денари во 2023 година на 186 милиони денари во 2026 година, што претставува раст од повеќе од 200 проценти.

Отворени се нови пазари во соработка со туристичкиот сектор, а во завршна фаза е подготовката на Националната стратегија за развој на туризмот со акциски план, која треба да ја позиционира Македонија како конкурентна европска туристичка дестинација – рече пратеничката Стојкова Серафимовска.

The post БУЏЕТОТ ЗА КУЛТУРАТА ДОСТИГНА РЕКОРДНИ 17,4 МИЛИОНИ ЕВРА Буџетот за туризам порасна повеќе од двојно во однос на 2023 година appeared first on plusinfo.mk.

Владата предводена од ВМРО-ДПМНЕ успеа да ја стабилизира состојбата, да спроведе клучни системски реформи и да реализира значајни инвестиции во културата и туризмот. Во изминативе две години, фокусот беше ставен на воспоставување системски пристап во управувањето со културата и тоа преку стратешко планирање, започнување на законски реформи, финансиска стабилизација и капитални инвестиции – се вели во соопштение на ВМРО-ДПМНЕ.

„Наследен беше долг од 273 милиони денари по основ на неисплатени плати во националните и локалните установи, кој експресно се реши со ребалансот, при што се изнајдоа и дополнителни 71 милион денари за програмски активности и над 78 милиони денари за проекти во општините.

Паралелно со сервисирањето на наследените обврски се започна со системско решавање на долгогодишните проблеми во културата и туризмот, за која цел се изготви длабинска анализа за рационализација на националните установи и преземени се конкретни чекори за спроведување на реформските приоритети.

Македонскиот јазик беше еден од главните приоритети на Владата и затоа уште веднаш започна имплементацијата на Законот за употреба на македонскиот јазик, се основаше Инспекторатот и Советот за македонски јазик, а во тек е и изработката на Стратегијата за употреба на македонскиот јазик.

Се финализираат подготовките за отворање на музеите на Скопско Кале, процес кој беше целосно запрен од претходната влада, а деблокирани се и повеќе национални и меѓународни проекти во областа на културното наследство.

Се спроведоа реформи во финансирањето на националните установи и за првпат е воведен моделот на делегиран, што овозможувајќи поголема автономија, подобро планирање и поефикасно управување со јавните средства, кој годинава се применува во 28 институции и ќе продолжи да шири.

Од друга страна, реализирани се 320 нови вработувања и 35 унапредувања во националните установи и за првпат се воспостави отворен конкурс за мобилност, преку кој македонските културни работници се усовршуваат во престижни академски и културни институции во странство“ – се наведува во соопштението на ВМРО-ДПМНЕ.

The post ЌЕ СЕ ОТВОРАТ МУЗЕИТЕ НА СКОПСКАТА ТВРДИНА Деблокирани се и други проекти од културата appeared first on plusinfo.mk.

„Со длабока тага се простуваме од нашата долгогодишна актерка Тинка Ристеска (1953-2026) – уметник и човек што остави неизбришлива трага во историјата на Струмичкиот театар“, објавија денеска од НТ „Антон Панов“.

„На 12 јули 2026 година, Тинка замина кај оние за кои изминатиот месец говоревме низ серијалот ‘Сеќавања’, кај темелниците и великаните на Струмичкиот театар. Денес и таа станува дел од тој вечен пантеон на уметници што го создадоа и изградија нашиот театар“.

Ристеска на само 16 години, во 1969 година, првпат застанала на сцената на Струмичкиот театар со улогата на Донка во претставата „Бегалка“. Од тој момент таа го започнала патувањето долго 55 години.

Остави бројни улоги меѓу кои во претставите „Галеб“, „Стаклена менажерија“, „Магбет“, „Ромео и Јулија“, „Печалбари“, „Женидба“, „Крвави свадби“, „Тетовирани души“, „Бледица“, „Лет во место“, „Хамлет од Долно Гаштани“, „Чудо големо“, „Вечна игра“. Играла и во ТВ серии и долгометражни филмови.

Погребот ќе се изврши на утре на Градските гробишта во Струмица.

The post ПОЧИНА ДОАЈЕНКАТА НА СТРУМИЧКИОТ ТЕАТАР Тинка Ристеска остави неизбришлива трага во 55-годишната кариера appeared first on plusinfo.mk.

Халкбанк, банката што посветено и постојано ја поддржува културната и музичка сцена на нашите простори, ова лето ја продолжува својата поддршка и партнерство со многубројни културни настани и иницијативи. Официјално, оваа музичка и културна програма Халкбанк ја започнува со поддршката на филмскиот фестивал Ohrid Beach Film Fest, кој ќе започне на 22 јули, а во текот на летото ќе следуваат и голем број партнерства со различни културни и музички настани.

Дел од широката листа на настани што во претстојниот период ќе бидат дел од платформата за поддршка „Важна е културата“ се:

Ohrid Beach Film Fest, 22–26 јули, Охрид

Галичник Филм Фест, 31 јули – 3 август, Галичник

Македокс, 20–27 август, Скопје

30 години Фолтин, 29 август, Хераклеја, Битола

Ѕирни, филмски и музички фестивал, 28 септември – 5 октомври, Скопје

Skopje Vinyl Convention, септември, Скопје

Култиватор Фестивал, септември/октомври, Скопје

Како дел од партнерството со овие настани и иницијативи, корисниците на услугите на Халкбанк ќе можат да користат и ексклузивни придобивки, изненадувања и подароци.

– Културата е важна, неопходна и клучна. Кога зборуваме за култура, всушност зборуваме за нишка што ги поврзува луѓето, идеите и вредностите што траат и остануваат. Нашата цел е да ја поддржиме културата и културниот живот во време кога поддршката на иницијативите, настаните и фестивалите е клучна. Оваа наша поддршка не почнува сега, ниту, пак, завршува со оваа платформа. Веќе традиционално, повеќе од пет години поддржуваме голем дел од овие иницијативи, а добредојдени се и други што имаат потенцијал и на кои им е потребна поддршка – вели Маја Наумовска Савеска, директорка за маркетинг и корпоративни комуникации во Халкбанк.

Со платформата за поддршка „Важна е културата“, Халкбанк ја продолжува својата определба да поддржува проекти што создаваат вредност за заедницата и ја прават културата повидлива и подостапна за сите.

The post „КУЛТУРАТА Е ВАЖНА“ Халкбанк ја продолжува посветената поддршка на македонската културна сцена appeared first on plusinfo.mk.

– Градоначалникот на Скопје Орце Ѓорѓиевски попладнево информираше дека Град Скопје ќе даде поддршка за уредување на просторот околу седиштето на Македонската академија на науките и уметностите (МАНУ).

Тој на својот Фејсбук профил наведе дека МАНУ е една од најзначајните институции во државата, дом на науката, уметноста и знаењето што, како што рече, ја движат државата напред.

– Заедно со претседателот на Македонската академија на науките и уметностите, академик Живко Попов, извршивме обиколка на просторот околу седиштето на оваа значајна институција. Како Град Скопје, ќе дадеме поддршка во уредувањето на просторот, со цел овој дел да добие достоинствен, убав и репрезентативен изглед каков што ѝ прилега на институција од вакво национално значење – истакна Ѓорѓиевски.

Градоначалникот додаде дека институциите што го чуваат знаењето, идентитетот и културната меморија на државата, заслужуваат почит, грижа и вистинско внимание.

The post НОВ ИЗГЛЕД ЗА ПРОСТОРОТ ОКОЛУ МАНУ Ѓорѓиевски најави поддршка за уредување за домот на науката и уметноста appeared first on plusinfo.mk.

Премиерот Христијан Мицкоски вели дека зголемувањето на буџетот за култура ќе бидат доволен да засили градежната активност на нови објекти и ако биде потребно со последниот  ребаланс на буџетот, културата ќе добие дополнителен износ.

Тој рече дека споредено со 2023 година буџетот во културата е зголемен за  34% а во фокус се реализирањето на капитални проекти.

– Тука пред сѐ се оние тековни, како што Библиотеката во Тетово, Универзалната сала во Скопје, Турскиот театар, Џез салата и така натаму, сега да не ги редам еден по еден, тоа се многу проекти коишто се во фаза на реализација или ќе отпочнат со фаза на реализација. И очекувам дека овие средства ќе бидат доволни оваа година да се засилат градежните активности на нови објекти и ако е потребно на крај на година, при таа конечна прераспределба, ќе додадеме и дополнително – реле Мицкоски.

Според него, важно е да се трошат пари за капитални инвестиции, бидејќи тие создаваат додадена вредност и тие се тие кои што влијаат врз квалитетот на граѓаните.

-Да не се трошат за друг тип на трансфери или како што веќе споменав, наместо да се гради, да се краде. Така за жал имавме случаи во државата со децении во минатото – рече Мицкоски.

The post БУЏЕТОТ ЗА КУЛТУРАТА Е ЗГОЛЕМЕН ЗА 34% ВО ОДНОС НА 2023 ГОДИНА Мицкоски вели дека ќе биде доволен за реализација на капиталните проекти appeared first on plusinfo.mk.

Почина режисерот Сашо Миленковски, потврдија од Драмски театар – Скопје. Имаше 63 години.

Миленковски остави повеќе од 50 режии на театарски претстави во Македонија, регионот и во Европа. Кариерата ја започнал уште пред дипломирањето на Факултетот за драмски уметности, преку ангажман во проектот КПГТ во Суботица.

Режираше дела од Шекспир, Молиер, Достоевски и Бекет, а значаен дел од неговото творештво беше посветено на современата македонска драма.

Меѓу неговите најпознати претстави се „Балканот не е мртов“ и „Буре барут“ од Дејан Дуковски, како и „Тетовирани души“, „Црна дупка“ и „Баханалии“ од Горан Стефановски.

Во 1999 година Миленковски го основал театарот „Бабилон“. Од 2006 до 2010 година бил директор на Македонскиот народен театар, а потоа драматург во Драмски театар – Скопје.

Годинава ја доби наградата за животно дело на фестивалот „Војдан Чернодрински“ во Прилеп.

The post ПОЧИНА РЕЖИСЕРОТ САШО МИЛЕНКОВСКИ Македонскиот театар остана без познатиот творец appeared first on plusinfo.mk.

Актерот Тони Наумовски е овогодинешниот добитник на престижната награда „Мето Јовановски” за високо уметничко достигнување во уметноста на филмот за 2026 година, на петтото јубилејно издание на Фестивалот на балкански и медитерански филм „Преку езерото” во Дојран.

– Секое признание значи, исполнува, мотивира, обрзува и е привилегија посебно кога тоа признание доаѓа од дома. Мето Јовановски е голем мајстор кој што играше во лига на светски шампиони. За жал никогаш немав прилика да соработувам со него но секогаш уживам, се радувам и му се воодушевувам на неговите маестрални актерски остварувања – вели Наумовски.

Тони Наумовски е единствениот македонски актер, но и еден од малкумината балканци кои во Њујорк имаат своја кариера во театар, на филм и телевизија.

Актерот има одиграно во повеќе од осумдесет карактери, во исто толку продукции на филм и телевизија, на повеќе од десетина јазици меѓу кои и неколку продукции во Македонија. Во „Мојот Њујорк” се игра себе самиот, емигрант и лунатик. Но значајни се и неговите улоги како  Марко во „Ноќен агент”, Виктор во „Лос Кос”, Иван Асланов во „Крајот на играта”, Александар Леко во „Ѓоспоѓата Министерка”,  Ајнштајн во „Медени ноќи”, како и Олег во „Портокалово е новото црно”.

The post ТОНИ НАУМОВСКИ ЈА ДОБИ НАГРАДАТА „МЕТО ЈОВАНОВСКИ“ НА ФЕСТИВАЛОТ „ПРЕКУ ЕЗЕРОТО“ Актерот има одиграно повеќе од 80 карактери во театар на филм и на телевизија appeared first on plusinfo.mk.

Филмот „Силјан“ на македонската режисерка Тамара Котевска ја освои FIPRESCI наградата на 66. Krakow Film Festival во Полска.

Станува збор за признание што го доделува Меѓународната федерација на филмски критичари, една од најрелевантните професионални организации во областа на филмската критика. Наградата има особена тежина бидејќи доаѓа од меѓународната критичка јавност и претставува признание за авторската вредност, филмскиот јазик и уметничката сила на делото.

Со ова признание, „Силјан“ продолжува да го надградува својот меѓународен успех и силниот фестивалски одек што филмот го остварува на светската сцена.~

FIPRESCI наградата на Krakow Film Festival е уште една важна потврда за позицијата на Тамара Котевска како еден од најпрепознатливите современи авторски гласови од Македонија, но и за присуството на македонскиот документарен филм во меѓународниот филмски контекст.

The post „СИЛЈАН“ ГО ОСВОИ И СВЕТОТ НА ФИЛМСКАТА КРИТИКА Тамара Котевска наградена на престижниот фестивал во Краков appeared first on plusinfo.mk.

Ве информираме дека во рамките на Интернационалниот фестивал „Share” во Братислава, Словачка, вечерва ќе настапат студентите на Катедрата за современ танц при Универзитетот „Гоце Делчев” со продукции на Скопје танцовиот театар 2, во рамки на програмата на театарот за 2026та под наслов „Современи кореографи”.

Претставата ќе се одржи во рамки на изведувачката програма на фестивалот, на сцената „Театар – ЛАБ” на Академијата за изведувачки уметности во Братислава, а ќе бидат изведени две кореографии, продукции на Скопје танцов театар 2: „Трендинг апокалипса” (фрагмент), на кореографката Адријана Данчевска Ровчанин, и кореографијата „Сè уште гледам” на италијанската кореографка Џилда Цесарио, која беше гостин кореограф на Скопје танцовиот театар.

Ќе настапат: Надја Луканова, Нина Петрушевска, Ивона Маневска, Елена Терзиева, Теона Ѓуровска, Михалеа Колцунова, Миа Петровиќ и Марија Андовска, дипломци на УГД.

Во рамки на фестивалот проф. д-р Рисима Рисимкин вчера го презентираше трудот „Современиот танц и нови технологии”, а денеска своја презенатција под наслов „Ритамот како кореографски генератор: Композиција на движење преку енергијата на рејв културата” ќе има доцент Адријана Данчевска Ровчанин, актуелна деканка на Катедрата за современ танц при УГД.

Интернационалниот фестивалот на танцови универзитети „Share” се оддржува од 9-13 јуни 2026, по шести пат во Братислава, Словачка, како платформа  на повеќе европски танцови академии и универзитети, и тоа: „Академијата за изведувачки уметности” во Братислава, Словачка; „Антон Брукнер” универзитетот од Линц и „Универзитетот за музика и уметност на Градот Виена” од Австрија; Литванската „Академија за музика и театар”; Конзерваториумскиот центар „Данкан” од Прага, Чешка; „Колеџот за циркуска уметност и современ танц” од Будимпешта, Унгарија; „Академијата за изведувачки уметности” од Прага, Република Чешка и Катедрата за современ танц при Универзитетот „Гоце Делчев” од Штип, Македонија.

Огромен број млади уметници, студенти и професори деновиве ги споделуваат своите искуства низ работилници и вечерни програми. Фестивалот „Share” се формираше во 2017 година, кога за прв пат се одржа во Братислава, Словачка, со цел да се постави платформа за соработка на млади европски современи танчери.

Во Братислава фестивалот се одржува секоја втора година, а во 2018 година, второто издание на „Share” се одржа во рамки на „Танц Фест” во Скопје и Штип, со учество на преку сто млади уметници и професори.

Од фестивалот произлегуваат голем број на соработки, меѓу кои е и проектот „Споделување танцови практики” на Ceepus програмата, кој се одржува во 2025-26, а ќе продолжи и во сезоната 2026-27 и кој овозможува поголема мобилност на студенти на повеќе европски танцови академии и универзитети, меѓу кои партнер во програмата е и Катедрата за современ танц при УГД.

The post МАКЕДОНСКИ ТАНЧЕРИ ВЕЧЕРВА ИЗЛЕГУВААТ ПРЕД ЕВРОПСКАТА ЕЛИТА Братислава е домаќин на престижниот фестивал „Шер“ appeared first on plusinfo.mk.