Време е законите целосно да почнат да се применуваат, а реформата да даде резултати што граѓаните ќе ги почувствуваат, порача министерот за јавна администрација Горан Минчев од Рим.

Минчев денеска со министерот за јавна администрација на Република Италија, Паоло Зангрило, потпиша Меморандум за соработка меѓу Министерството за јавна администрација на Република Македонија и Одделот за јавна администрација при Претседателството на Советот на министри на Италијанската Република.

Како што информираат од кабинетот на министерот за јавна администрација, партнерството претставува инвестиција во луѓето кои ја носат јавната администрација. Важен дел од соработката ќе биде насочен кон воспоставувањето и развојот на Академијата за професионален развој и обука на административните службеници.

Преку Академијата, како што се наведува, ќе се создадат услови за континуирано стекнување нови знаења, унапредување на вештините и градење професионална и компетентна администрација.

Минчев нагласил дека за Македонија Меморандумот е особено значаен бидејќи е насочен кон зајакнување на професионалните капацитети на администрацијата и создавање систем во кој развојот на административните службеници ќе биде постојан и системски процес.

– Токму затоа, една од клучните области на соработката ќе биде воспоставувањето и развојот на нашата Академија за професионален развој и обука на административните службеници. Сакаме да изградиме систем во кој административниот службеник постојано ќе учи, ќе се усовршува и ќе има можност стекнатото знаење да го претвори во подобри резултати во својата работа. Крајната цел се подобри услуги за граѓаните – изјави Минчев.

Италијанскиот министер за јавна администрација, Паоло Зангрило, посочил дека процесот на проширување на Европската Унија, кој се темели на заслуги, бара силни и професионални јавни администрации засновани на принципот на заслуги, како во земјите кандидати, така и во земјите членки на ЕУ.

– Подготвени сме да го споделиме искуството од реформите што ги спроведовме во последните години, од дигитализираниот процес на вработување, преку обуките, до Законот за заслуги. Италија цврсто го поддржува европскиот пат на Македонија, а квалитетот на јавната администрација е еден од неговите темели – порача Зангрило.

Во рамки на посетата, министрите одржале и билатерална средба на која, како што информираат, разговарале за тековните реформи во јавната администрација, можностите за размена на италијанското искуство и експертиза, како и за конкретизирање на идните активности во повеќе области од заеднички интерес.

Меѓу нив се управувањето со квалитет, иновациите во јавниот сектор и Партнерството за отворена власт.

Двете страни се договориле во наредниот период да ја дефинираат и првата програма за заеднички активности за 2027 година, со која ќе се операционализира соработката предвидена со Меморандумот.

Од Министерството за јавна администрација оценуваат дека соработката со Италија е дел од традиционално добрите и пријателски билатерални односи меѓу двете земји и претставува нивно конкретно продлабочување во област од особено значење за европската интеграција на Македонија.

Италија е поддржувач на европскиот пат на Македонија, а размената на искуства и институционалната соработка во реформата на јавната администрација, според Министерството, претставуваат придонес кон изградбата на професионални, ефикасни и европски ориентирани институции.

The post ОД РИМ НАЈАВА ЗА НОВА ЕРА ВО ЈАВНАТА АДМИНИСТРАЦИЈА Македонија и Италија ќе разменуваат искуства и експертиза appeared first on plusinfo.mk.

Јавната администрација е тука за сите граѓани. А тоа значи дека секој граѓанин, без разлика на своите потреби и предизвици, треба да може да добие информација, услуга и помош на начин што му е разбирлив и достапен – рече денеска министерот за јавна администрација Горан Минчев на промоцијата на Практичниот водич за комуникација и обезбедување услуги на лицата со оштетен слух.

Прирачникот е изработен на иницијатива од Министерството за јавна администрација, со цел да се придонесе кон подобра комуникација меѓу институциите и лицата со оштетен слух и кон полесен и поеднаков пристап до јавните услуги. Автор е Даниела Дичовска, лиценциран толкувач на знаковен јазик, со практични насоки за административните службеници во нивната секојдневна работа.

– Кога зборуваме за реформа на јавната администрација, не зборуваме само за закони, процедури и институции. Зборуваме за луѓето. За тоа дали еден граѓанин ќе може да добие навремена информација и дали ќе може рамноправно да ја оствари својата услуга. Нашата задача е да ги отстрануваме бариерите, а не граѓаните да се приспособуваат на бариерите на системот. Ова е уште еден чекор кон администрација која не гледа само на тоа дали постои услуга, туку и дали таа услуга навистина може да ја користи секој граѓанин. Бидејќи квалитетна јавна администрација е онаа која не остава никого зад себе. И токму затоа, пристапноста не треба да биде исклучок или посебна мерка. Таа треба да биде дел од начинот на кој институциите работат секој ден, со разбирање, почит и еднаква грижа за секој граѓанин – рече министерот Минчев.

На промоцијата присуствуваа и Снежана Трпевска, национална координаторка за лица со попреченост, Сузана Стојановска, претседателка на Дневен центар „Доза среќа“ и Благица Димитровска, претседателка на Здружението за промоција и развој на инклузивно општество „Инклузива“.

The post ДРЖАВАТА ГИ СЛУШНА ЛИЦАТА СО ОШТЕТЕН СЛУХ Изработи прирачник за комуникација со институциите appeared first on plusinfo.mk.

Премиерот на Словенија Јанез Јанша сака 50.000 луѓе постепено да ги пресели од државните канцеларии во приватниот сектор. Масовни откази, тврди словенечкиот премиер, нема да има – администрацијата треба да се намалува со пензионирање, дигитализација и со пренасочување на кадарот кон компаниите што бараат работници.

– Никој не треба да остане без работа. Преструктуирањето треба да се спроведе постепено и на мек начин – порача Јанша на 58. Меѓународен саем за занаетчиство и претприемништво во Целје.

Од 125.000 стигнале до 196.000

Зад идејата стои бројка што Јанша ја издвои како еден од главните аргументи. При осамостојувањето Словенија имала околу 125.000 вработени во јавниот сектор, а денес бројката е околу 196.000. Тоа е раст од приближно 70.000 луѓе.

Јанша признава дека дел од зголемувањето било оправдано. Словенија изградила институции на независна држава, влегла во ЕУ, а стареењето на населението создало поголеми потреби во здравството и социјалната заштита.

Но, неговата теза е дека истата логика не може да го објасни растот на целата администрација.

– Во 1999 година сè уште бевме во аналогна ера, денес сме во дигитална, а многу работи и покрај подобрите алатки ги извршуваат повеќе луѓе – рече Јанша.

Токму тука во равенката ги внесува дигитализацијата и вештачката интелигенција. Според него, новите технологии треба да донесат поголема ефикасност, но само ако претходно се оптимизира начинот на кој функционира системот.

Каде ќе заминат 50.000 луѓе?

Најголемата непозната во планот засега е каде точно Јанша гледа простор за толкаво намалување.

Тој не прецизираше кои институции или делови од јавниот сектор би требало да останат со помалку вработени, ниту даде рок до кога околу 50.000 луѓе би требало да преминат кон приватниот сектор.

Како главна причина за промената го посочува недостигот од работници во словенечкото стопанство. Неговата идеја е дел од домашниот човечки потенцијал што сега е врзан за јавниот сектор постепено да се прелее таму каде што компаниите бараат кадар.

Сепак, самата словенечка Влада во официјалното соопштение од настапот на Јанша не го претставува ова како план за масовно отпуштање, туку како долгорочно преструктуирање на вработеноста.

Вештачката интелигенција влегува во равенката

Јанша ја поврза промената и со образованието. Идејата е повеќе ученици и студенти да се насочуваат кон професии за кои стопанството нема доволно работници.

Паралелно, дигитализацијата и вештачката интелигенција треба да преземат дел од административниот товар.

– Ако само внесувате нови алатки во постојната структура, без претходно да ја оптимизирате, нема да го постигнете посакуваниот ефект – рече Јанша.

Конкретните решенија допрва треба да се претворат во предлози. Стратешкиот совет за стопанство, предводен од Марко Лотрич, работи на прашања од даноците и конкурентноста до дебирократизацијата и дигитализацијата, а Владата од него очекува конкретни предлози врз чија основа би се менувале и прописите.

The post ЈАНША НАЈАВИ 50.000 „СЕЛИДБИ“ НА АДМИНИСТРАТИВЦИ ВО ПРИВАТНО Словенија има 70.000 повеќе административци отколку при осамостојувањето appeared first on plusinfo.mk.

Размена на искуствата и добрите практики, како и отворањето нови можности за соработка со Чешката Република во дигиталната трансформација и во сајбер-безбедноста беа во фокусот на семинарот за дигитализација на јавната администрација што се одржа во Владата, а на кој се обратија министерот за дигитална трансформација Стефан Андоновски и заменик-премиер и министер за надворешни работи на Чешка, Петр Мацинка.

Министерот Андоновски истакна дека дигитализацијата не е само технолошки процес, туку суштинска трансформација на начинот на кој функционира државата и на кој граѓаните ги остваруваат своите права и ги користат јавните услуги.

– Она што сакаме да го постигнеме е државата да биде поедноставна и поблиска до граѓаните и до компаниите, со услуги кои се достапни, брзи и лесни за користење. За нас, дигитализацијата има смисла само доколку носи реално подобрување во секојдневието – помалку административни чекори, помалку чекање и поголема сигурност и предвидливост за секој граѓанин и за секоја компанија – нагласи Андоновски.

Тој посочи дека Министерството работи на развој на дигиталните услуги, подобро поврзување на институциите, унапредување на интероперабилноста и создавање посигурна дигитална инфраструктура.

Министерот Андоновски ја нагласи важноста на меѓународната соработка и размената на практични искуства, оценувајќи дека знаењето и конкретните решенија на Чешката Република можат значително да придонесат кон натамошниот развој на дигиталната трансформација во земјава.

– Денешниот семинар го гледам како многу повеќе од презентација на две различни искуства. Го гледам како можност да започнеме нова, поконкретна и подлабока соработка меѓу Македонија и Чешката Република во областа на дигиталната трансформација – истакна Андоновски.

Посебен акцент беше ставен и на сајбер-безбедноста како неопходен дел од процесот на дигитализација.

– Колку повеќе услуги и процеси се дигитализираат, толку поважно е граѓаните да имаат доверба дека нивните податоци се безбедни и дека системите на државата се отпорни. Затоа, дигитализацијата и сајбер-безбедноста мора да одат рака под рака – порача министерот.

Претставниците на чешката делегација ги презентираа искуствата и успешните практики на Чешка во дигитализацијата на јавната администрација.

Министерот Андоновски изрази уверување дека семинарот ќе биде почеток на нови иницијативи, партнерства и конкретни проекти меѓу двете земји во областа на дигиталната трансформација.

Во рамките на дискусијата беа разгледани можностите за понатамошна соработка, воспоставување партнерства и реализација на заеднички иницијативи и проекти, вклучително и во областа на сајбер-безбедноста, соопшти Министерството за дигитална трансформација.

The post ЧЕШКА НИ ПРЕНЕСЕ ИСКУСТВА ВО ДИГИТАЛНАТА ТРАНСФОРМАЦИЈА Андоновски очекува соработка и заеднички проекти appeared first on plusinfo.mk.

Јавната администрација е еден од најважните столбови на функционална држава, а нејзината професионализација е клучен предуслов за европска Македонија, порача министерот за јавна администрација Горан Минчев во интервју за Слободен печат.

Министерот истакна дека Владата и Министерството за јавна администрација спроведуваат суштинска реформа на системот, чија цел е создавање модерна, ефикасна и професионална администрација ослободена од партиски влијанија.

– Јавната администрација е крвотокот на една држава. Без соодветна, добро обучена, квалитетна и со знаење исполнета јавна администрација, немаме држава – порача Минчев.

Тој нагласи дека во изминатиот период се направени значајни реформски исчекори преку донесување на системски закони кои со години беа дел од европските извештаи. Законот за висока раководна служба, законските решенија за административните службеници и формирањето на Академијата за обука на јавната администрација, според него, се темели за нов модел на функционирање на институциите.

Министерот потенцираше дека реформата не се мери само преку донесување закони, туку преку нивна реална примена и промена на институционалната култура.

– Законот е првиот чекор, но поважно е неговото спроведување. Реформата на јавната администрација значи систем во кој секој ќе има можност да напредува преку знаење, компетенции и резултати – истакна Минчев.

Во однос на Законот за правична застапеност, министерот посочи дека станува збор за ново, експертски подготвено решение кое за првпат го регулира овој принцип преку посебен закон, со јасна методологија и институционален механизам за следење на примената, нагласувајќи дека целта е воспоставување баланс меѓу уставните принципи и професионалните стандарди, без простор за злоупотреби.

– Правичната застапеност и квалитетот не се спротивставени. Нашата цел е секој граѓанин да има еднаква можност, а институциите да добијат најквалитетни кадри – рече Минчев.

Министерот посочи дека реформите во јавната администрација се дел од пошироката европска агенда на државата и дека процесот продолжува со силен фокус на професионализација, дигитализација, обуки и подобрување на услугите кон граѓаните.

Тој додаде дека вистинската вредност на реформите ќе се гледа преку довербата на граѓаните во институциите и преку создавање администрација која работи брзо, ефикасно и одговорно.

– Европските институции се градат со професионални луѓе, јасни правила и политичка волја за промени. Тоа е патот по кој чекориме – заклучи министерот за јавна администрација Горан Минчев.

The post ГРАДИМЕ СИСТЕМ ВО КОЈ ЗНАЕЊЕТО И РЕЗУЛТАТИТЕ СЕ ЕДИНСТВЕН КРИТЕРИУМ Министерот Минчев за реформите во јавната администрација appeared first on plusinfo.mk.

Професионалната јавна администрација не се гради само со закони. Таа се гради со јасни правила, објективни критериуми и алатки што секојдневно ќе се применуваат во институциите. Токму во таа насока, Министерството за јавна администрација, во партнерство со Мисијата на ОБСЕ во Скопје, денеска ја промовираше новата рамка за вработување заснована на заслуги, интегритет и компетенции, значаен чекор кон воспоставување модерен и професионален систем на вработување во јавниот сектор.

Обраќајќи се пред претставници на институциите, дипломатскиот кор и меѓународните партнери, министерот за јавна администрација Горан Минчев истакна дека со донесувањето на системските закони беше поставена цврста основа за реформите, но дека нивната вистинска вредност ќе се потврди преку доследна примена во пракса.

-Реформите не се успешни кога остануваат запишани во законските текстови. Тие се успешни кога институциите ги применуваат, кога службениците ги препознаваат како корисни алатки и кога граѓаните ги чувствуваат придобивките од нив. Токму затоа, денес мерит-системот добива своја практична примена – рече Минчев.

Во рамки на настанот беа претставени Правилникот за работните компетенции на административните службеници и Прирачникот за спроведување интервју базирано на компетенции, практични инструменти кои ќе овозможат појасни стандарди за проценка на компетенциите, поголема предвидливост на постапките и намалување на субјективноста при селекцијата на кандидатите.

– Денес не зборуваме само за закони. Денес зборуваме за конкретни механизми што ќе им помогнат на институциите да спроведуваат фер, транспарентни и објективни постапки за вработување, засновани на знаење, способности и интегритет – рече Минчев.

Тој додаде дека визијата на Министерството е јавна администрација во која вработувањето и напредувањето ќе зависат од знаењето, компетенциите и постигнатите резултати, а институциите ќе располагаат со професионални и мотивирани службеници кои ќе обезбедуваат поквалитетни услуги за граѓаните.

Посебна благодарност министерот упати до Мисијата на ОБСЕ во Скопје за континуираната експертска и партнерска поддршка во процесот на модернизација на јавната администрација.

Амбасадорот Килијан Вал, шеф на Мисијата на ОБСЕ во Скопје, нагласи дека Мисијата целосно го поддржува Министерството за јавна администрација во воведувањето на новиот систем за вработување заснован на компетенции.

– Новиот правилник, водичот и практичните алатки ќе обезбедат вработувања засновани на квалификации, испити и вештини, а не на политички фаворитизам. Тоа значи помалку простор за недозволено влијание, посилни институции и подобри јавни услуги за граѓаните. Вработувањето засновано на заслуги обезбедува јавните службеници да можат одговорно да управуваат со сложени процеси и ефикасно да испорачуваат услуги – оцени амбасадорот Вал.

Со воведувањето на овие реформски алатки, Министерството за јавна администрација прави нов исчекор кон воспоставување јавен сектор во кој мерит-системот не е само законски принцип, туку стандард што ќе се применува во секоја постапка за вработување.

The post ЗАПОЧНУВА ПРИМЕНАТА НА МЕРИТ-СИСТЕМОТ ВО ЈАВНАТА АДМИНИСТРАЦИЈА Минчев оцени дека отсега напредувањето и вработувањето во јавниот сектор ќе зависат од знаењето appeared first on plusinfo.mk.

Со цел дополнително да се зајакнат знаењата и капацитетите на административните службеници во оваа област, Министерството за јавна администрација и проектот „Поддршка на ЕУ за владеење на правото”, финансиран од Европската Унија, денес потпишаа Меморандум за соработка и ја промовираа новата онлајн алатка за е-учење за човекови права.

На настанот се обратија министерот за јавна администрација Горан Минчев, амбасадорот на Европската Унија, Михалис Рокас, како и Барбара Лигл, лидерка на Компонента 4 во рамки на проектот.

Во своето обраќање, министерот Минчев порача дека квалитетот на јавната администрација не се оценува само според прописите што ги применува, туку и според довербата што ја создава кај граѓаните.

– Довербата во институциите се гради тогаш кога граѓаните чувствуваат дека системот ги почитува нивните права, постапува правично и обезбедува еднаков третман за сите. Токму затоа знаењето, професионалноста и одговорноста на административните службеници се од суштинско значење за функционирањето на едно демократско општество –  истакна Минчев.

Тој нагласи дека реформите во јавната администрација не се сведуваат само на нормативни промени, туку подразбираат и создавање култура на континуирано учење, професионален развој и постојано унапредување на институционалните капацитети.

Во тој контекст, новата алатка за е-учење претставува практичен механизам преку кој човековите права ќе станат составен дел од процесот на стручно усовршување на административните службеници. Преку современи методологии и интерактивни содржини, платформата ќе придонесе кон подобро разбирање и примена на принципите на еднаквост, недискриминација, отчетност и почитување на човековото достоинство во секојдневното работење на институциите.

Во рамки на настанот беше истакнато и значењето на континуираното следење и спроведување на препораките на националните и меѓународните механизми за заштита на човековите права, како и потребата од нивно поефикасно интегрирање во работата на јавниот сектор.

The post ЧОВЕКОВИТЕ ПРАВА НЕ СЕ ДЕКЛАРАЦИЈА, ТУКУ ОБВРСКА ЗА АДМИНИСТРАЦИЈАТА Минчев промовираше онлајн алатка за обука appeared first on plusinfo.mk.

Реформата на јавната администрација не може да биде успешна доколку се спроведува исклучиво во институциите. Таа мора да се гради заедно со граѓаните, преку партнерство, транспарентност и активно учество во процесите на донесување политики. Токму ова беше централната порака што ја упати министерот за јавна администрација, Горан Минчев, на четвртата регионална конференција „Граѓаните на прво место: Деценија на унапредување на јавна администрација насочена кон граѓаните“, која се одржува во Белград, по повод десет години од иницијативата WeBER во Западен Балкан.

Конференцијата претставува значајна регионална платформа за размена на искуства и добри практики во реформата на јавната администрација, со учество на претставници на институциите, граѓанските организации, Европската Унија, ОЕЦД/СИГМА, ReSPA и други меѓународни партнери, посветени на создавање поотворени, потранспарентни и поефикасни институции во интерес на граѓаните.

Во своето обраќање, министерот Минчев истакна дека суштината на реформите не е само во институционалните промени, туку во создавањето администрација која испорачува конкретни резултати и ја зајакнува довербата на јавноста.

– Успешната јавна администрација не се мери само преку донесени закони, стратегии и институционални промени. Таа се мери преку довербата на граѓаните, квалитетот на услугите што ги добиваат и нивното чувство дека се активен дел од процесите на донесување одлуки – истакна Минчев.

Тој нагласи дека Владата и Министерството за јавна администрација спроведуваат сеопфатна реформска агенда која има за цел изградба на професионална, модерна и ефикасна јавна администрација.

Во таа насока, како особено значајни ги посочи новата законска рамка за административните службеници и вработените во јавниот сектор, законот за стручно усовршување и обука, како и законот за високата раководна служба, кој претставува историски чекор кон професионализација на највисоките раководни позиции во извршната власт.

Посебен акцент во неговото обраќање беше ставен на транспарентноста и инклузивноста во креирањето на јавните политики, истакнувајќи дека во подготовката на новите законски решенија уште од најраната фаза беа вклучени граѓанските организации, синдикатите, академската и експертската јавност, а истиот принцип се применува и при ревидирањето на Акцискиот план за спроведување на Стратегијата за реформа на јавната администрација.

– Граѓаните не смеат да бидат само корисници на јавните услуги. Тие треба да бидат активни партнери во нивното креирање, затоа што најдобрите политики се создаваат преку дијалог, партнерство и заедничка одговорност –  посочи министерот Минчев.

Владата и Министерството за јавна администрација ќе продолжат да градат политики засновани на транспарентност, отчетност и партнерство со граѓаните, затоа што само на тој начин ќе може да се создадат институции што ќе испорачуваат резултати и ќе ја зајакнат довербата во јавниот сектор.

The post УСПEХОТ НА АДМИНИСТРАЦИЈАТА СЕ МЕРИ СО ДОВЕРБАТА ОД ГРАЃАНИТЕ Минчев во Белград на регионална конференција appeared first on plusinfo.mk.

Министерот за јавна администрација Горан Минчев оствари работна средба со Баграт Тунјан, претставник на СИГМА – заедничката иницијатива на OECD и Европската Унија, посветена на тековните активности и реформски процеси во областа на јавната администрација.

Во фокусот на средбата беа унапредувањето на системот за Проценка на влијанието на регулативата (ПВР), подобрувањето на квалитетот на креирањето политики, јавните консултации и дигитализацијата на процесите, како и подготовката на нови методолошки и регулаторни решенија согласно Стратегијата за реформа на јавната администрација 2023–2030 и препораките на СИГМА.

Дополнително, се разговараше за потребата од понатамошна експертска и координативна поддршка во процесот на имплементација на препораките на СИГМА, подготовката на новиот Акциски план 2027–2030, како и за продолжување на активностите поврзани со Законот за организација и работа на органите на државната управа (ЗОРОДУ), преку инклузивен и транспарентен консултативен процес.

Министерството за јавна администрација останува посветено на спроведување на суштински и одржливи реформи кои ќе придонесат кон поефикасна, покоординирана и професионална јавна администрација, усогласена со европските стандарди и потребите на граѓаните и институциите.

The post ТРАНСПАРЕНТНОСТА И ЕФИКАСНОСТА КЛУЧНИ ЗА ЈАВНАТА АДМИНИСТРАЦИЈА Реформите претставени на претставници на СИГМА appeared first on plusinfo.mk.

Министерот за јавна администрација Горан Минчев денес се обрати на состанокот на Секторската работна група за реформи во јавната администрација, нагласувајќи ја клучната улога на реформите во унапредувањето на институционалната ефикасност и напредокот на европската интеграција на државата.

Тој посочи дека позитивниот фидбек од Европска комисија претставува значајно признание за досегашните напори и дополнителен поттик за засилување на реформскиот процес.

Во своето обраќање, министерот подвлече дека јавната администрација зазема централно место во реформската агенда и има суштинска улога во обезбедувањето функционални институции и квалитетни услуги.

– Ова е силна потврда дека се движиме во правилна насока, но и дополнителен мотив со уште поголема динамика да продолжиме со реформскиот процес – истакна Минчев.

Тој посочи дека имплементацијата на Стратегијата за реформа на јавната администрација 2023–2030 се одвива со висок степен на реализација, при што се спроведени 84% од предвидените активности. Паралелно, како што нагласи, воспоставена е нова системска рамка преку клучни законски решенија со кои се гради интегриран, мерит-базиран и професионализиран систем, насочен кон резултати и зголемен институционален интегритет.

Посебен акцент во обраќањето беше ставен на развојот на човечките ресурси, управувањето со квалитет и дигиталната трансформација, како и на потребата од доследна имплементација на реформите.

– И покрај силната нормативна и институционална основа која ја изградивме, најголемиот предизвик останува доследната и квалитетна имплементација на реформите – нагласи министерот, додавајќи дека фокусот во наредниот период ќе биде ставен на операционализација на законската рамка и постигнување конкретни резултати.

Минчев кажа дека Министерството за јавна администрација останува целосно посветено на реформската агенда и на испорака на мерливи резултати.

– Нашата порака до партнерите е јасна: потребна е координирана, таргетирана и имплементациски ориентирана поддршка која ќе произведе реални, мерливи и одржливи резултати – истакна Минчев, нагласувајќи дека крајната цел е реформите да се преточат во видливи придобивки за граѓаните и забрзување на европскиот пат на државата.

The post ОЦЕНКИТЕ ОД ЕВРОПСКАТА КОМИСИЈА СЕ СИЛНА ПОТВРДА Реализирани 84% од активностите за реформи во администрацијата appeared first on plusinfo.mk.