СЕКОЈ МОЖЕ ДА КУПИ РИНГИШПИЛ Српските институции си ја префрлаат топката за несреќата

По вчерашниот инцидент со рингишпилот во српскиот град Куршумлија, новинарите на ТВ „Блиц“ во Србија стапиле во контакт со министерствата кои треба да бидат надлежни за оваа активност, објави српски Блиц.

Во српскиот град Куршумлија вчера се случила несреќа кога на локалниот саем се урнала конструкцијата на рингишпил, а биле повредени повеќе деца.

Пред само два месеца сличен инцидент се случил на саемот во Лазаревац. Ваквите настани кои сериозно ја загрозуваат безбедноста на најмладите го наметнаа прашањето, кој ги контролира и е одговорен за исправноста и за безбедноста на конструкциите во забавните паркови во Србија?

Министерството за труд и Министерството за локална администрација и самоуправа не им дале одговор на новинарите на Блиц, туку ја префрлувале надлежноста од министерство во министерство, па во одредена локална самоуправа.

Од Министерството за труд рекле дека оваа област е во надлежност на Министерството за локална самоуправа, додека, пак, тие од Министерство за локална самоуправа ја префрлиле одговорноста на градските општини.

Проблемот е што нема јасен закон кој ја регулира оваа област, но работењето на објектите во забавните паркови е регулирано со одредени законски и подзаконски акти.

„Сопственикот на објектот е Бог кога станува збор за безбедноста на објектите“

Според Саша Драгин, кој 33 години е сопственик на забавниот парк на белградската населба Земунски Кеј, за жал, нема агенција или институција задолжена за проверка на безбедноста на објектите во забавните паркови.

– Кога купувате објект во фабрика, првично добивате сертификат, односно документ со кој се потврдува дека производот е на нивото на квалитет пропишано според одредени технички услови. Фабриката гарантира дека објектот е исправен. Но, секој сертификат има одреден временски рок, како гаранција, по што повторно земаме потврда или гаранција дека објектот е апсолутно исправен – објаснил Драгин, за кого поседувањето забавен парк е семеен бизнис.

Но, сертификатот не значи ништо, туку сопственикот на тој објект е апсолутно одговорен за сѐ што се случува таму.

– Сепак, најинтересно е што овој сертификат не значи ништо, сопственикот на објектот е Бог! Јас го составувам, го расклопувам, ако згрешам, јас сум крив. Можам да добијам потврда и од Свети Петар, ако јас што ја склопувам таа вртелешка не ги следам упатствата, џабе. Сопственикот на зградата е одговорното лице – додал Саша.

Посочил и дека посебен проблем е тоа што секој со пари денес може да купи вртелешка.

– Секој денес може да купи рингишпил, особено ако сака „бргу“ да земе пари. Сепак, најважно е да се проверува секој ден пред да се отвори! Во моментот кога со татко ми и со брат ми ќе утврдиме дека сѐ е во ред и ќе кажеме „пуштај“, од тој момент станувам одговорен за сѐ што се случува – рекол Саша и нагласил дека направата никогаш не се пушта ако има некој во него.

– Направите секогаш се пуштаат празни. Кога ќе утврдиме дека сѐ е во ред, публиката може да дојде и да се вози – заклучил Саша.

Нема агенција за обезбедување на направите

Саша посочил и дека не постои агенција која се занимава со безбедноста и проверката на овие конструкции и дека е крајно време да се отвори такво нешто. Посочил и дека е исклучително важно некој што би го регулирал тоа да биде човек кој се занимава со забавни паркови и ги разбира.

Саша навел и дека поверојатно е нешто да се случи со конструкциите кои се мобилни и постојано се преместуваат од едно на друго место.

– Постои замор на материјалот. Визуелно можете веднаш да видите ако нешто не е во ред. Иако понекогаш визуелно се чини дека делот е добар, доколку гаранцијата е истечена, мора да земете нов. Подобро е да платите шестпати повеќе, но земете квалитетен и оригинален дел – објаснил Саша.

Посочил и дека е неопходно родителите да ги држат очите отворени кога ги испраќаат децата на направите.

– Родителот мора да види дали објектот е нормален, дали изгледа здрав и силен. Не да му висат каблите и да му е пукната шипката. И газдата и машината треба да им влеат доверба – рекол Драгин.