РАЗОТКРИЕНА ТУРСКАТА „ВРСКА“ ЗА АМЕРИКАНСКИ ЧИПОВИ ВО РУСИЈА Војната се храни преку таен синџир, учествуваат светски фирми

Американските чипови од гигантите како Интел, АМД, Аналго Дивајсис стигнуваат во Русија и се клучен дел од руските ракети и друга воена опрема во Украина. Дека санкциите на Западот бидуваат заобиколени се знаеше подолго време, но сега, истражување на Ројтерс покажува дека чиповите вредни милијарди долари влегуваат преку Турција, а се работи за „цела галаксија од нејасни увозници и извозници“ кои се дел од овој глобален синџир. Дури, делови пристигнуваат во Турција и од Хонг Конг.

Оваа „турска врска“ обезбедила увоз и извоз од најмалку 2,6 милијарди во изминатите седум месеци, а најмалку 777 милиони долари од овие производи се најдени во форма на електроника во руските системи за оружје.

Новата фирма во Турција со германски пријатели

Во март оваа година, нова фирма се појави во централниот регистар на Турција. „Азу Интернационал ЛТД“ се опишува себеси како трговец на големо со ИТ производи, а една недела подоцна фирмата почна да испорачува американски делови за компјутери во Русија.

Бизнисот одел динамично, покажуваат записите на руската царина. Фирмата ја коосновал Гоктурк Агваз, турски бизнисмен. Во текот на следните седум месеци, компанијата извезла компоненти во Русија во вредност од најмалку 20 милиони долари.

Брзорастечкиот бизнис на Азу Интернационал не поради врските на компанијата со други компании, покажува известувањето на Ројтерс. Газдата управувал и со големопродажба на ИТ производи во Германија во фирмата наречена „Смарт Импекс ГмбХ“. Пред инвазијата на Украина, руските царински записи покажуваат дека германската компанија испраќала американски и други производи на клиент од Москва, кој неодамна увезол стока од „Азу Интернационал “.

„Русија е нашата деловна тајна“

Во октомври газадата Агваз за Ројтерс изјавил дека „Смарт Импекс“престанала да извезува делови во Русија за да ги почитува трговските ограничувања на ЕУ, но дека ги продава во Турција, земја која не е членка на ЕУ и која не ги спроведува повеќето санкции на Западот против Москва.

– Не можеме да извезуваме во Русија, не можеме да продаваме во Русија и затоа само продаваме во Турција – рече тој.

Запрашан за продажбата на „Азу Интернационал “ во Русија, тој одговорил:

– Ова е наша деловна тајна.

Турските корпоративни записи покажуваат дека тој ѝ го продал својот 50% удел во компанијата во Истанбул на 30 ноември на ко-основачка, Хума Ѓулум Улучан.

А да ја регистрираш фирмата во куќа во шума?

Еден руски увозник, „Фортап“, со седиште во Санкт Петербург, беше основан од руски бизнисмен во април и оттогаш увезол електроника во вредност од најмалку 138 милиони долари, вклучително и американски делови за компјутери, според руските царински записи.

Тие покажуваат дека еден од најголемите добавувачи на „Фортап“ е турската компанија, „Бион Груп ЛТД“, поранешен трговец со текстил, кој неодамна се прошири во трговија на големо со електроника. Генералниот директор на Бион одбил да даде коментар за Ројтерс.

Друг руски увозник, „Титан-Микро“, има регистрирано адреса која е во куќа во шума на северниот раб на Москва. Компанијата исто така, увезува западни компјутерски компоненти, сугерира царинската евиденција.

Некои од добавувачите, вклучително и фирми во Хонг Конг и Турција, имаат врски со руски државјани, според прегледот на документите на компанијата.

Царинските записи, кои Ројтерс ги купил од три комерцијални провајдери, не го идентификуваат прецизниот тип на полупроводници и други електронски производи, ниту пак покажуваат што се случува со компонентите откако ќе пристигнат во Русија.