ПРОТЕКОА НОВИ ДЕТАЛИ Американската војска работи на моќна супервакцина
„SpFN“ е протеинска вакцина, а принципот на дејство е сличен на оној на производот на „Новавакс“, кој беше одобрен од Европската агенција за лекови (EMA) кон крајот на декември.
„Супер вакцина“, „пан-коронавирусна вакцина“, „чудотворно оружје“, сето ова треба да биде „SpNF“ вакцината против коронавирус, која моментално ја тестира Воениот истражувачки институт на САД.
Оваа шилеста-феритин-наночестичка-вакцина (Spike-Ferritin-Nanoparticle), скратено „SpFN“, е наменета да заштити од зараза со голем број на варијанти на коронавирус, а со тоа и да спречи идни пандемии. Редовното обновување на вакцинацијата би станало непотребно, дури и во случај да се појават нови варијанти, пишува Дојче веле.
Како функционира супервакцината?
„SpFN“ е протеинска вакцина, а принципот на дејство е сличен на оној на производот на „Новавакс“, кој беше одобрен од Европската агенција за лекови (EMA) кон крајот на декември.
„SpFN“ се базира на феритин, протеинска молекула која може да складира железо. Оваа молекула се претвора во „топка“ со 24 полиња, слично на фудбалска топка. Така, на секое од овие полиња може да се стави маркантен шилест протеин со различна варијанта на коронавирусот. Ова ја прави вакцината променлива и погодна за модификации.
Шилестата структура на таканаречените шилести протеини ја користат и вакцините кои веќе се одобрени. Шилците се како отворачи на врата кои се врзуваат за рецепторот „ACE-2“, дозволувајќи им на коронавирусите да навлезат во човечките клетки.
Со примањето на оваа вакцина се создаваат антитела кои се врзуваат за шилестиот протеин така што врзувањето со рецепторот повеќе не функционира и вирусот повеќе не може да ги инфицира клетките. Во исто време, вакцинацијата ги активира Т-клетките, кои во случај на инфекција ги препознаваат и убиваат заразените клетки и на тој начин го спречуваат размножувањето на вирусот.
Покрај тоа, за разлика од вакцината „mRNA“, „SpFN “не мора да се чува на многу ниски температури, што ја прави многу полесна за дистрибуција. Ова важи и за протеинската вакцина на „Новавакс“.
Успешен експеримент на мајмуни
Вакцината „SpFN“ беше развиена во американскиот воен институт за истражување Волтер Рид (WRAIR). Прво беше тестирана на резус мајмуни.
Вакцината создаде силни неутрализирачки антитела против оригиналниот коронавирус, како и против четири други соеви: алфа, бета, гама и делта. Таа била ефикасна дури и против вирусот САРС-1, иако овој тип на вирус значително се разликува од САРС-КоВ-2, информираат истражувачите од Институтот „WRAIR“ во списанието „Science Translational Medicine“.
Според „WRAIR“, по успешното тестирање на мајмуни, почна првата фаза на тестирање на луѓе, што треба да покаже дали вакцината е подеднакво ефикасна и кај луѓето и дали добро се поднесува.
Следниот коронавирус е на повидок
Според медицинскиот советник во Белата куќа, Ентони Фаучи, развојот на универзална вакцина против коронавирус може да помогне да се спречат нови пандемии на долг рок.
– Се инвестира многу, не само во подобрувањето на вакцината што ја имаме против САРС-КоВ-2, туку и во развојот на следната генерација вакцини, особено универзални вакцини против коронавирус – рече Фаучи во Конгресот на САД.
Не е случајно што американската војска сака да развие ефективно „чудотворно оружје“ против коронавирусот. Последните децении покажаа дека во иднина може да се очекуваат агресивни коронавируси.
Опасноста од коронавирус одамна е потценета
Коронавирусите всушност се познати уште од 1960-тите. Тие вклучуваат широк спектар на патогени кои досега главно заразиле глодари, птици, но и цицачи. Досега само неколку коронавируси се прилагодени на луѓето. Околу една третина од обичните настинки се предизвикани од овие РНК коронавируси.
Нивниот геном се состои од рибонуклеинска киселина, која игра клучна улога во претворањето на генетските информации во протеини. Сосема различен калибар беше првиот коронавирус САРС, кој во 2002 година уби речиси 1.000 луѓе ширум светот.
Акронимот САРС веќе го опишува текот на болеста. Во случај на „тежок акутен респираторен синдром“, инфекцијата започнува со висока температура, главоболка, болки во грлото и мускулите, а потоа се развива во тешка атипична пневмонија со силна кашлица и отежнато дишење. САРС повторно се појави во 2004 година.
Но, во јуни 2012 година, кај луѓето се појави нов, агресивен коронавирус: МЕРС-КоВ (Middle East Respiratory Syndrome Coronavirus). До мај 2014 година, тој се прошири од Европа на Блискиот Исток и предизвика слични симптоми на заразените како САРС. Најдоцна во тоа време, беше јасно колку мутираните коронавируси можат да бидат опасни за луѓето, како и фактот дека тие претставуваат постојана закана.
Сомнежи за „чудотворното оружје“
Останува да се види дали вакцината развиена од американската војска е навистина „чудотворна оружје“ што треба да донесе пресврт во пандемијата и да спречи нови.
– Не би ја нарекол супервакцина – изјави за ДВ имунологот Карстен Ватцл, генерален секретар на Германското имуно друштво (DGfI).
– Прво, вакцината допрва треба да биде подложена на клинички студии за да се потврдат податоците од експериментите со животни. Второ, вакцините иРНА, исто така, може да се прилагодат за да формираат различни варијанти на „спајк“ протеини, со што се обезбедува широк имунитет.
И Андреас Радбрух, имунолог и директор на германскиот центар за истражување на ревматизам во Берлин, исто така не мисли дека SpNF е „чудотворно оружје“.
– Останува да се види дали оваа вакцина навистина штити од сите можни варијанти на САРС-КоВ-2 – рече Радбах.
Значи, не треба да се надеваме на „чудотворно оружје“ бидејќи веќе имаме вакцини кои го држат САРС-КоВ-2 под контрола. Тие значително го намалуваат бројот на тешко болни луѓе и, благодарение на новата технологија РНА, може брзо да се модифицираат во случај на идни коронавируси.