ОВА ЛЕТО СО 46 СТЕПЕНИ Е САМО ПОЧЕТОКОТ Европа ќе се вари, САД и Кина се исто така во „фурната“

Ова е само почеток, рече Сајмон Луис за пеколното време кое ја зафати Европа, САД, но и Кина со температури и над 45-тиот степен, пренесува Јаху Њуз. Сајмон е претседател на науката за глобални промени на Универзитетскиот колеџ во Лондон. Тој го предвидува следното:

– Сегашната политика на глобално ниво прави да достигнеме затоплување од 2,7 степени до 2100 година. Тоа е навистина застрашувачко.

Всушност глобалната температура веќе е зголемена за 1,2 степени од она што било кога во светот не постоеле фабрики, возила и индустрија. А Европа ќе се пече на максимални 46 степени летово, пишува Би-Би-Си. Тоа ќе се случи во Сардинија во Италија. А според ЕСА, Европската вселенска агенција, на Сардинија и Сицилија всушност се очекува пик од 48 степени!

Црвен аларм е вклучен во 20 градови во Италија. Во текот на денот и во сенка во централна-северна Италија температурата може да достигне 38-39 целзиусови степени, додека во Лацио, особено во Рим, ќе достигне од 42 до 43 степени, соопшти метеоролошката служба.

Јужна Шпанија на 45 степени се бори со Кербер, троглавото куче од митологијата или Харон кој ги носи душите во пеколот, како што некои го нарекоа африканскиот топлотен бран. Но, овој бран, наречен и антициклон се чини дека е глобален феномен.

Во САД синоќа на полноќ температурата на метеоролошката станица во Долината на смртта, Аризона сè уште беше 49 степени целзиусови – некои тоа го објавија како привремено нов рекорд за полноќна температура. Максималната температура до сега измерена таму беше 56 степени. Во Феникс, Аризона, минатата недела температурата остана над 43 степени целзиусови цели 17 дена.

Високите температури достигнаа 52,2 степени Целзиусови во неделата во северозападна Кина. На јужниот брег на Кина пак, тајфунот Талим исфрли кит на брегот откако претходно имаше бура. Ајкулите во плитките делови на морињата во Медитеранот се чести глетки летово, а и веројатно ќе бидат некое време.

Како сето ова ќе ги смени навиките на туристите низ целиот свет во годините што доаѓаат? Па, споредено со лани, 10 отсто помалку туристи допатувале на Медитеранот, сугерираат податоците на Европската комисија за патување(ЕТС). Опција за туристите сега е да одат на одмор напролет или наесен.

Пожар дури ги зафати и швајцарските алпиво областа Горна Вале на планината Бич. Безмалку 200 луѓе и неколку хеликоптери уште се борат целосно да го изгаснат.

Жешко е во Европа, а жештините не престануваат ни во утринските часови.

– Да ви дадам пример, кога вчера легнав веднаш по полноќ, во Аликанте на јужниот брег на Шпанија беше 30 степени целзиусови. Кога станав денес во 6 ипол часот за да ги направам моите први преноси, надвор имаше 27 степени Целзиусови – вели Џастин Роулат, уредник за климата на Би-Би-Си.

Глобалното затоплување е „закана за човештвото“ што бара нов вид соработка меѓу Кина и САД и покрај нивните разлики, рече денеска во Пекинг американскиот пратеник за климата Џон Кери, кој во неделата пристигна во Кина и се сретна со првиот кинески дипломат Ванг Ји по неколкумесечно заладување на дипломатските односи.