ОВА Е ПРОБЛЕМ И ЗА МАСК Течна вода за првпат регистрирана длабоко под површината на Марс

Течна вода беше регистрирана длабоко во карпите на Марс, објави Би-Би-Си. Се работи за надворешната кора на планетата. Откритието доаѓа од анализата на податоците од лендерот „Инсајт“, (во превод Увид) на НАСА, кој однесе сеизмометар до Марс.

Ова е прво откритие од ваков вид. На научниците им беше познато дека на Марс има ледена вода и одреден процент водена пареа во атмосферата, но ова е првпат да се најде течна вода.

Сеизмометарот за четири години регистрирал повеќе од 1.319 години на Црвената планетата, како своевиден пулс. Мерејќи ја брзината на сеизмичките бранови научниците заклучиле дека тоа може да биде течна вода.

– Тоа се всушност истите техники што ги користиме за да бараме вода на Земјата или да бараме нафта и гас – објасни професорот Мајкл Манга од Универзитетот во Калифорнија, Беркли, кој беше вклучен во истражувањето.

Резервите на течна вода, според анализата, се на длабочина од околу 10 до 20 километри во кората на Марс.

Професорот Манга додаде дека водата е „најважната молекула во обликувањето на еволуцијата на планетата“. Ова откритие, рече тој, одговара на големото прашање „каде отиде целата вода на Марс?“.

Студиите на површината на Марс, со неговите канали и бранови, покажуваат дека, во античко време, на планетата имало реки и езера.

Но, веќе три милијарди години, Марс е пустина.

Дел од таа вода се изгубила во вселената кога Марс ја загубил атмосферата. Но, вели професорот Манга, овде на Земјата, „голем дел од нашата вода е под земја и нема причина тоа да не биде случај и на Марс“.

Сондата „Инсајт“ („Увид“) можеше да снима само директно од кората под нејзините стапала, но истражувачите очекуваат дека ќе има слични резерви низ целата планета. Ако е тоа така, тие проценуваат дека има доволно течна вода на Марс за да се формира слој низ површината кој би бил длабок повеќе од 800 метри.

Сепак, истакнуваат тие, локацијата на оваа подземна вода на Марс не е добра вест за милијардерите со планови за колонизација на Марс кои можеби ќе сакаат да ја искористат.

Професорот Манга вели дека дури и на милијардерот Илон Маск би му било тешко да ископа дупка од 10 километри за да ја најде водата.

A секако, ова го отвора и прашањето за живот на  Марс. Ако постои некое место на Марс погодно за живи организми, тогаш тоа е длабоко под земјата, смета Манга.