РЕВОЛУЦИОНЕРЕН ЛЕК ЗА АЛЦХАЈМЕР МОЖЕ ДА ГО БАНКРОТИРА СВЕТСКОТО ЗДРАВСТВО Функционира, ама ќе биде изгор скап и за Американците

Нов и револуционерен лек против Алцхајмеровата болест се очекува да биде одобрен во САД, но истиот може да го банкротира здравството во оваа земја, а потоа пошироко во светот. Слично како скапите третмани за рак, овојпат јапонскиот Лекемби ни дава нова надеж дека можеме да ги ублажиме ефектите на оваа болест, која е најчестиот облик на деменцијата.

Но, годишно еден пациент во САД би платил 26.000 долари за терапијата. Лекемби исто така има некои сериозни несакани ефекти, како што се оток и крварење на мозокот, кои бараат редовно следење и може да ја ограничат неговата употреба кај некои пациенти.

Гледано во перспектива, тоа може да му донесе на американското општество 10 милијарди за 10 години, но бројот на лекари и логистика кои би биле вклучени во таквиот подвиг, за кој се очекува да има прилично голем интерес, може да го дотолчи и веќе проблематичниот Медикер систем на субвенционирано здравство на САД.

Лекемби е моноклонално антитело кое дејствува на еден вид протеин наречен бета-амилоид, кој се акумулира во мозокот и ги оштетува нервните клетки и предизвикува болест. Лекот делува така што ги намалува овие оштетувања и го забавува опаѓањето на когнитивните способности.

Се очекува американската Агенција за храна и лекови (ФДА) да донесе конечна одлука за Лекемби до 6 јули 2023 година, пишува Политико. Доколку биде одобрен, Лекемби ќе биде достапен за пациентите кои имаат благо когнитивно оштетување или блага деменција поради Алцхајмерова болест и исто така имаат докази за бета-амилоидни оштетувања во нивниот мозок.

Лекот ќе се дава како интравенска инфузија на секои четири недели од страна на здравствен работник.

Најмалку 35 милиони луѓе кои годишно боледуваат од оваа болест можат да се надеваат на овој пробив, дело на јапонската компанија Еисаи. Тој е првиот лек во две децении на кој му беше дадено зелено светло од ФДА во јануари, иако потребни се повеќе испитувања.

Досегашните испитувања напревени на 1.800 пациенти покажаа дека лекот успешно го отстранува бета-амилоидот од мозокот и дека дејствува подобро од терапијата со плацебо по третман од 18 месеци. Значително го намалил опаѓањето на когнитивните способности на луѓето.

Сепак, на научниците уште не им е јасно дали лекот навистина ги подобрил симптомите или пак го подобрил квалитетот на животот на пациентите.