НА АМЕРИКАНЦИТЕ ИМ ФАЛИ ВОЈСКА Плаќаат и по 50.000 долари за нови регрути

Ковид-пандемијата направи САД, најголемата сила во светот, да има недостиг од млади војници, а земјата ќе плаќа и до 50.000 долари годишно за оние кои ќе се приклучат, дознава Асошиејтед прес. Короната ги затвори американските училишта и колеџи, институциите каде обично младите се пријавуваат за шестгодишна служба. Но, тука е и проблемот на затвореноста: кога луѓето не комуницираат одлуките да се влезе во нова работа потешко се носат.

– Сè уште ги живееме импликациите од 2020 година и почетокот на корона-кризата, кога училишните системи во основа се затворија. Изгубивме цела класа млади мажи и жени со кои немавме контакт, лице в лице – вели Кевин Верин, генерал-мајот и шеф на армиската команда за регрутирање.

Фалат 57.500 нови војници, ама нема сите да земаат 50.000 долари

Американците годинава планираат да регрутираат 57.500 нови војници, исто како лани. Бонусот од 50.000 долари е највисокиот бонус и не сите кандидати ќе можат да го добијат. Конечната плата ќе зависи од тоа дали и кога ќе се согласат да бидат испратени на обука, дали веќе имаат некои вештини и дали избираат да бидат ренџери или војници „во воздух“.

Одредени кариери – како што се екипажот за ракетна одбрана, специјалните сили, специјалистите за разузнавање и контрола на огнот за сигнали кои ги координираат операциите со оружје на бојното поле – честопати ги добиваат максималните бонуси.

Но, што е со пешадијата, или позицијата разузнавачки аналитичар, борбен лекар специјалист, борбен инженер? Тие се клучни и често побројни позиции, а се случува и да се менуваат секој месец, врз основа на достапните места.

И сегашните војници се мислат дали да продолжат да служат

Двете години од пандемијата го отежнаа регрутирањето во училиштата и на јавните настани, а конкуренцијата за квалитетни работници се интензивираше додека младите ги одмеруваат нивните опции. Некои, вели генералот Верин, си земаат година „за себе“ и „донесуваат одлука дека не мора да работат токму сега“.

Годишната цел за регрутирање варира бидејќи војниците кои моментално служат одлучуваат дали повторно да се пријават или да заминат. Во последните две години, додека беснееше пандемијата, многумина решија да останат таму, намалувајќи го притисокот за регрутирање.

– Ние сме на конкурентен пазар – раскажува Верин. – Начинот на кој ние поттикнуваме е апсолутно суштински, и тоа е апсолутно нешто што знаеме дека е важно за да се обидеме да натераме некој да дојде и да ѝ се приклучи на војската.

 

Без училиштата и стадионите нема кај да ги намамиме младите

Сепак, парите се намалуваат од година во година. Рекордот беше постигнат во 2018 година кога 485 милиони долари беа дадени, но Армијата не успеа да ја исполни својата годишна цел за регрутирање. Лани, Армијата потрошила повеќе од 233 милиони долари на бонуси, при што околу 16.500 од новите регрути добија просечен бонус за запишување од над 14.000 американски долари.

– Сакаме прво да ја промовираме вредноста на служењето на вашата земја. Но, ние исто така го знаеме тоа, оваа генерација и претпоставувам човечката природа, знаете, сето тоа е и до компензација – вели тој.

Проблемот го комплицира многу заразниот омикрон-сој, кој ги затвора училиштата и стадионите – местата каде регрутерите обично влегуваат за да ги привлечат младите да се приклучат на Армијата. Големата офанзива обично е напролет кога над 9.400 регрутери ќе пробаат да ги намамат младите Американци. Овојпат младите ќе можат да се пријават и само на две, а не на шест години служба само и само за да ја одбранат најголемата воена сила на планетата.