МОЖЕ ДА ИЗГЛЕДА ТУРОБНО И ВЕСЕЛО Портрет на Путин направен од 5.000 чаури (ФОТО)

Младата украинска уметница Дариа Марченко направи портрет на рускиот претседател Владимир Путин од 5.000 чаури собрани на бојното поле.

Сликата „Лицето на војната“ е реалистичен приказ на Путун во темен костум и црвена вратоврска. Висока е повеќе од два метра и доминира во студиото на уметницата.

Изразот на лицето на 63-годишниот претседател на Русија се менува под различно светло, неговите очи се менуваат од туробни во весели.

– Може да изгледа горд, збунет или сериозен. Може да изгледа како лик од советски постер или како Супермен. Ми беше страшно да спијам со него во иста соба, но се навикнав – додава 33-годишната уметница, која е и графички дизјанер.

Нејзината соба е полна со кошници со чаури. Прв ѝ ги донел нејзиниот дечко, активен член на движењето Евромајдан кое го урна корумпираниот и непопуларен претседател Виктор Јанукович и го принуди на самонаметнат егзил во Русија. Но, нејзините уметнички „алатки“ сега доаѓаат од пријатели кои војуваат на воените полиња во источна Украина.

– Чаурата е симбол на прекинат живот. Светот не разбира колку изгуби мојата земја. Така што оваа желба да работам со чаури дојде природно – вели Дариа.

Портретот на Путин е прв во серијата насловена „Петте елементи на војната“. Другите дела, кои би можеле да бидат направени од оружје или од други остатоци од фронтот, ќе бидат посветени на „срцето и духот“ на војната. Друго дело би можело да се нарече „Мозоците на војната“, но конечниот наслов е тајна.

– За жал, војната на уметници како нас ни дава материјал за работа – додаде таа.

Марченко вели дека е сигурна дека рускиот претседател веќе видел фотографии од нејзиното дело.

– Можеби сум наивна, но се надевам дека се прашал себеси како сака да биде запаметен – вели уметницата Марченко.