📷 📽️ МИКРО ШПИОНИ ЗА ГОЛЕМИ МИСИИ Рој „живи роботи“ влегуваат каде дроновите не можат

Германскиот стартап „SWARM Biotactics“ со седиште во Касел објави дека успеал за само една година да ја претвори идејата за програмирани киборг-инсекти во реално распоредена технологија кај платени клиенти на НАТО, меѓу кои и германскиот Бундесвер.

Компанијата, основана во 2024 година, користи живи инсекти, најчесто мадагаскарски шишкави цврчки или таракани, кои ги претвора во биоелектронски платформи за разузнавање, надзор и други мисии. Технологијата веќе минала теренски тестирања и оперативна употреба во Европа и во САД.

Извршниот директор и ко-основач Штефан Вилхелм го оцени напредокот како пресвртница во одбранбените иновации.

– Пред една година ова не постоеше. Денес имаме програмирани киборг-инсектиски роеви, изградени, тестирани на терен и распоредени кај платени НАТО-клиенти – изјави Вилхелм во соопштение од 25 февруари 2026 година.

Тој објаснува дека станува збор за живи организми контролирани преку биоелектронски неврални интерфејси, опремени со сензори, вградена вештачка интелигенција за обработка на податоци и безбедни комуникациски врски.

– Се движат како координирана единица, а се скалираат преку природно размножување, а не преку фабричко производство – додава тој, нагласувајќи ја предноста во масовно распоредување и ниска цена.

Влегуваат таму каде што дроновите не можат

Киборг-инсектите се дизајнирани да навлегуваат во простори недостапни за класични дронови или роботи. Тие можат да ползат низ тесни пукнатини, да се качуваат по ѕидови и да влегуваат во цевки, подземни тунели или урнатини по земјотрес или бомбардирање.

Благодарение на природната еволуција, инсектите се отпорни на тешки услови, хемикалии, топлина и радијација, и речиси нечујни, што им дава исклучително низок „потпис“ во споредба со механичките системи. Еден рој може да брои десетици или стотици инсекти кои работат со часови, па и денови, поради високата енергетска ефикасност.

Што носи секој инсект

Секој инсект е опремен со ултралесно „ранче“ тешко до 15 грама, кое компанијата планира да го намали на 10 грама за поголема издржливост. Во него има:

– минијатурни камери и микрофони за видео и аудио во живо

– „Doppler“ радар за детекција на движење

– дополнителни сензори според мисијата

Невралните интерфејси, преку електроди на антените, овозможуваат нежно насочување на инсектот, процес што компанијата го нарекува „nudging“. Вградената edge-AI технологија обработува податоци директно на уредот и помага во автономното однесување.

Роевите се координираат преку софтверски алгоритми, а операторите добиваат фузирани податоци од повеќе инсекти, вклучително и триангулација за прецизна локација во затворени или подземни простори.

– Можете да управувате со цел рој од 10, па дури и 100 инсекти. Некои носат камера, некои комуникација, некои позиционирање. Триангулираме за точна локација под земја или во забранети области“ -објаснува Вилхелм.

Тој нагласува дека технологијата е „dual-use“, односно има и воени и цивилни примени.

Од бојното поле до спасувачки мисии

Главната намена е разузнавање и надзор (ISR) во урбани борби, близу непријател или во колабирани зони со висок ризик. Но системот може да се користи и за:

– пребарување и спасување преживеани во урнатини

– инспекција на критична инфраструктура

– надзор во густи урбани средини за безбедносни операции

– Ова дава можност што ниту еден друг систем не може да оди таму каде што технологијата не стигнува – вели Вилхелм.

Милионска инвестиција и планови за ширење

Компанијата досега обезбедила 13 милиони евра финансирање, три милиони во „pre-seed“ и десет милиони во „seed“ рунда во јуни 2025 година од инвеститори како „Vertex Ventures US“, „Possible Ventures“ и „Capnamic“.

Со тим од повеќе од 40 инженери и научници во Германија и САД, „SWARM Biotactics“ брзо преминува од лабораторија кон теренска примена. Поголеми оперативни распоредувања се планирани во следните 18 до 24 месеци.

Видеото што кружи на социјалните мрежи е официјално објавено од Вилхелм на „LinkedIn“ и е дел од промотивниот материјал на компанијата, со што се потврдува автентичноста на демонстрацијата.

 

In Germany, prototypes of bioelectronic insects for military purposes were unveiled

The company SWARM Biotactics has developed a technology that combines living insects with neural interfaces, AI, and sensors, turning them into autonomous reconnaissance platforms.

The project… pic.twitter.com/hhSjoJyN0J

— NEXTA (@nexta_tv) February 26, 2026