МАКРОН ГО МОЛИ, ПУТИН ЗБОРУВА ЗА ХОКЕЈ Еве што муабетеле лидерите 4 дена пред војната во Украина

„Да бидам целосно искрен, сега ќе играм хокеј на мраз. Разговарам со вас од теретана. Треба да се консултирам со моите советници”.

Вака му вели рускиот претседател Владимир Путин на францускиот колега Емануел Макрон при крајот на нивниот телефонски разговор од кој француската државна телевизија „Франс 2“  направи документарна емисија која ќе ја прикаже овој четврток, пишува британски Телеграф.

– Во секој случај, благодарам Владимир. Остануваме во контакт. Ако нешто се случи, јавете ми се – одговара Макрон.

– Ви благодарам, господине претседателе – вели Путин, ненадејно зборувајќи на француски.

Претходно Макрон пробува да го вразуми Путин во врска со Украина. За телефонскиот разговор, Борис Џонсон, кој исто така се јавува во документарниот филм, ќе рече дека „Путин звучи сѐ поагресивно, а ние сме сѐ послаби“.

Еве како течел разговорот четири ноќи пред окупацијата.

– Владимир, за почеток, едно… – се слуша гласот на Макрон на почетокот на разговорот на 20 февруари. Но, Путин не сакаше да го слуша.

– Слушај, Емануел… – го пресече рускиот лидер.

– Би сакал прво да ми го кажете вашето мислење за ситуацијата и можеби сосема искрено, како што секогаш сме имале обичај, да ми кажете кои се вашите намери – се обиде Макрон да создаде атмосфера на доверба.

– Што да кажам, можете сами да видите што се случува – одговори Путин, обвинувајќи ја Украина за прекршување на договорот од Минск.

Путин потоа го осуди прозападниот украински претседател Владимир Зеленски, обвинувајќи го Киев за набавка на нуклеарно оружје.

– Ова се глупости – се слушна глас на влијателниот дипломатски советник на Макрон, Емануел Боне.

– Покрај тоа, нашиот драг колега, господинот Зеленски, не прави ништо за спроведување на договорот од Минск, ве лаже – рече Путин и додаде дека треба да се земат предвид предлозите на проруските сепаратисти во источна Украина.

– Но, ние не сме заинтересирани за сепаратистички предлози. Не знам дали вашиот правен советник го знае законот! Што се однесува до мене, јас само ги гледам законите и се обидувам да ги спроведам. Не знам кој правен советник би можел да ви каже дека во една суверена земја правните текстови предлагаат сепаратисти – продолжува Макрон.

– Тоа не е демократски избрана влада. Тие дојдоа до власт со крвав пуч. Живи запалија луѓе. Тоа беше крвопролевање. А Зеленски е еден од виновниците за тоа – одговори Путин.

И покрај тензиите, Макрон продолжи да се обидува да ја игра улогата на посредник, велејќи дека ќе го охрабри Зеленски да ги „смири тензиите“ не само меѓу украинските вооружени сили, туку и на социјалните мрежи.

– Не станувајте жртва на провокации од секаков вид во часовите и деновите што следат – вели Макрон.

Повикот завршува со тоа што Макрон му предлага на Путин веднаш да разговара со Џо Бајден, американскиот претседател. Путин лежерно вели дека прво треба да се подготви за средбата. Потоа, како да се сетил на нешто, му одговора на Макрон. Тогаш следува делот со хокејот.

Ден подоцна, Макрон повторно разговараше со Путин, на 21 февруари. Но, на 24 февруари Русија веќе ја започна окупацијата.

Таа ноќ, филмската екипа повторно доби пристап до првиот разговор на Макрон со Зеленски, откако првите руски проектили паднаа врз Киев.

– Тие се тука во Киев. Руските сили се борат во Киев – рече украинскиот претседател.

– Дали донесоа специјални сили и хеликоптери или…? – праша Макрон загрижено.

– Да, авиони и хеликоптери, сè… Го гледаме тоа преку медиумите, ги гледаме насекаде, ги има многу – одговори неговиот украински колега.

– Дали знаете колку цивили веќе се убиени? – прашува Макрон.

– Не знам, илјадници… – одговара Зеленски.

– А што е со тебе, дали си безбеден? – се прашува Макрон.

– Мислам дека направив – му одговори Макрон на Зеленски.

Комуникацијата меѓу Макрон и Путин набрзо се разреди, а францускиот претседател се најде под бран критики затоа што минатата недела отпатува во Киев за да се сретне со Зеленски.

– Не успеавме да го убедиме Путин. Мислев дека преку доверба и интелектуална дебата можеме да најдеме заедничко решение – рече Макрон пред неколку дена во Киев.

На прашањето дали мисли дека Путин е опасен човек, францускиот претседател енигматично одговори:

– Никогаш нема да ви го кажам моето мислење.