КРАТОК ТУШ ЗА ГЕРМАНЦИТЕ И ЗИМАВА ДА НОСАТ ДЕБЕЛИ ЧОРАПИ Министер ги подготвува граѓаните за сезона без рускиот гас

Германскиот вицеканцелар, шеф на „супер-министерството“ за економија и животна средина Роберт Хабек во интервју за „Шпигел“ им вели на Германците зимава кратко да се тушираат и топло да се облекуваат поради кризата со рускиот гас, кој за Германија може и целосно да секне, јавува Јутарни.

– Оние луѓе кои заработуваат многу можат да се справат со високите цени. Но, познавам и многу луѓе на кои парите не им траат до крајот на месецот. Има и такви кои минатата зима не можеа ни да ги загреат сите соби во својот стан. Мора да бидеме искрени: сè уште не е готово. Сѐ повеќе луѓе ќе ги чувствуваат последиците.

На прашањето што тој прави поинаку како приватен граѓанин од претходно, тој одговори дека ги следи советите на неговото министерство.

– Драстично го скратив времето што го поминувам под туш, но сум лош пример. Како министер заработувам плата за која другите можат само да сонуваат. Плус, доцна се враќам дома, станувам во шест сабајле и да излезете од дома до седум. Со тој распоред не мора ни да се греам во зима. За луѓето кои работат од дома, пензионерите со мали пензии и семејствата, приказната е сосема поинаква.

Новинарот се интересираше и колку точно време му треба на Хабек под туш.

– Мојот колега од Холандија неодамна гордо ми кажа дека започнале кампања со цел да го намалат просечното време на туширање од десет минути на пет. Морав да се смеам. Никогаш во животот не сум се туширал пет минути. Земам краток туш.

Откако рече дека не сака да ја вклучува климата во лето и дека слабо се загрева во зима, новинарот го праша дали е свесен дека многу луѓе се чувствуваат како Владата да им се обраќа надмено и од високо.

– Се разбира, имаше критики. Ги покануваме луѓето да се приклучат на кампањата и не им велиме: „Ако не учествувате, вие сте злобна личност!“. Предлагаме начини како да заштедите енергија под туш, но не мора да бидете совршени. Понекогаш на децата им треба убав долг туш или базен полн со топла вода. Мојата порака е: оставете ги вашите деца да се забавуваат. Немаме постојано да се казнуваме, но не можеме ни да се однесуваме како сѐ да е во ред – вели министерот.

Хабек објасни дека ако нема доволно гас, ќе мора да носи тешки одлуки – нема да има добри одлуки, само најмалку лоши.

– За некои индустрии, тоа ќе биде катастрофа. Зборуваме за луѓе кои ќе ги загубат своите работни места, региони кои ќе изгубат цели индустриски комплекси.

Хабек е инаку лидерот на германските Зелени. И покрај еко-агендата на партијата, тој годинава беше принуден да се залага за повторно палење на електраните и топланите на јаглен поради гасната криза.